ନୂଆଦିଲ୍ଲୀ: ନର୍ସିଂ ଅଫିସର ନିଯୁକ୍ତି ସାଧାରଣ ଯୋଗ୍ୟତା ପରୀକ୍ଷା (NORCET) ଏବେ ବର୍ଷକୁ ଦୁଇଥର କରାଯିବ। ଏପର୍ଯ୍ୟନ୍ତ ଏହି ପରୀକ୍ଷା ବର୍ଷକୁ କେବଳ ଥରେ ଅନୁଷ୍ଠିତ ହେଉଥିଲା। ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଅନୁସାରେ, ନର୍ସିଂ ଅଫିସର ନିଯୁକ୍ତି ସାଧାରଣ ଯୋଗ୍ୟତା ପରୀକ୍ଷା, ବର୍ଷକୁ ଥରେ ନୁହେଁ ଦୁଇଥର ଅନୁଷ୍ଠିତ ହେବ। ଏହି ପଦକ୍ଷେପ ସମୟସୀମା ମଧ୍ୟରେ ଭର୍ତ୍ତି ଏବଂ ରୋଗୀ ସେବା ସୁନିଶ୍ଚିତ କରିବ । ଏହି ନୀତିଗତ ପରିବର୍ତ୍ତନ AIIMS ଏବଂ ମନ୍ତ୍ରଣାଳୟର ରଣନୈତିକ ଯୋଜନା ଉପରେ ଆଧାରିତ । 

NORCET 2025 ନୂଆଦିଲ୍ଲୀ ଏମ୍ସ ଦ୍ୱାରା ସମସ୍ତ ଏମ୍ସ ପାଇଁ ଆୟୋଜନ କରାଯାଇଥିଲା । ଏହା ସହିତ ପ୍ରଧାନମନ୍ତ୍ରୀ ସ୍ୱାସ୍ଥ୍ୟ ସୁରକ୍ଷା ଯୋଜନା ଅଧୀନରେ ନୂତନ ଏମ୍ସ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଅଧୀନରେ ଥିବା ଅନ୍ୟାନ୍ୟ ସରକାରୀ ହସ୍ପିଟାଲ ମଧ୍ୟ ଅନ୍ତର୍ଭୁକ୍ତ। ନର୍ସିଂ ଅଫିସର ନିଯୁକ୍ତି ଲାଗି ହେଉଥିବା ଏହି ପରୀକ୍ଷା AIIMS ଦ୍ୱାରା ପରିଚାଳିତ ଏକ ନିଯୁକ୍ତି ପରୀକ୍ଷା। ଏହି ପରୀକ୍ଷା ନର୍ସିଂ ଅଫିସରଙ୍କ ନିଯୁକ୍ତି ପାଇଁ ପରିଚାଳିତ ହୁଏ । 

ଏହି ପରୀକ୍ଷା ଦେବା ପାଇଁ ପ୍ରାର୍ଥୀମାନଙ୍କର B.Sc ନର୍ସିଂ କିମ୍ବା ପୋଷ୍ଟ ବେସିକ୍ ନର୍ସିଂ ଡିଗ୍ରୀ ଥିବା ଆବଶ୍ୟକ । ଏହା ସହିତ ପ୍ରାର୍ଥୀ ରାଜ୍ୟ ନର୍ସିଂ ପରିଷଦ କିମ୍ବା କେନ୍ଦ୍ରୀୟ ନର୍ସିଂ ପରିଷଦରେ ପଞ୍ଜୀକୃତ ହୋଇଥିବା ଜରୁରି । ଆବେଦନ ଲାଗି ବୟସ ସୀମା ସର୍ବନିମ୍ନ ବୟସ ୧୮ ବର୍ଷ ଏବଂ ସର୍ବାଧିକ ୩୦ ବର୍ଷ ମଧ୍ୟରେ ହୋଇଥିବା ଦରକାର । ପରୀକ୍ଷା ଦୁଇଟି ପର୍ଯ୍ୟାୟରେ ଅନୁଷ୍ଠିତ ହୁଏ । ଚଳିତ ବର୍ଷ ପ୍ରିଲିମିନାରୀ ପରୀକ୍ଷା ୧୨ ଏପ୍ରିଲରେ ଏବଂ ମୁଖ୍ୟ ପରୀକ୍ଷା ୨ ମେ’ରେ ଅନୁଷ୍ଠିତ ହୋଇଥିଲା। ପ୍ରିଲିମିନାରୀ ପରୀକ୍ଷାରେ ସଫଳ ହୋଇଥିବା ପ୍ରାର୍ଥୀମାନେ ମୁଖ୍ୟ ପରୀକ୍ଷାରେ ଯୋଗ ଦେଇଥିଲେ। ପରୀକ୍ଷା ପାଇଁ ଆବେଦନ ପ୍ରକ୍ରିୟା ୨୪ ଫେବୃଆରୀରେ ଆରମ୍ଭ ହୋଇଥିଲା ଏବଂ ଆବେଦନ କରିବାର ଶେଷ ତାରିଖ ୧୭ ମାର୍ଚ୍ଚ ଥିଲା ।