ଭୁବନେଶ୍ୱର,୨୯/୦୫: ବର୍ଷ ପୂର୍ତ୍ତି ପାଇଁ ରାଜ୍ୟ ସରକାର କରୁଛନ୍ତି ବିଶାଳ ଆୟୋଜନ । ଜିଲ୍ଲାରୁ ରାଜ୍ୟସ୍ତର ପର୍ଯ୍ୟନ୍ତ ଆୟୋଜିତ ହେଉଛି ଅନେକ କାର୍ଯ୍ୟକ୍ରମ । ଜୁନ୍ ୫ ତାରିଖରୁ ହିଁ ବ୍ଲକ ସ୍ତରରେ ବୁଲିବ ସରକାରୀ ରଥ । ରଥ ବୁଲିବୁଲି ସରକାରଙ୍କ ବର୍ଷକର ସଫଳତାର ବାର୍ତ୍ତା ପ୍ରଚାର କରିବ । ୧୯ ତାରିଖ ପର୍ଯ୍ୟନ୍ତ ଏହି ରଥ ପ୍ରତି ବ୍ଲକରେ ସରକାରଙ୍କ ସଫଳତା କାର୍ଯ୍ୟକ୍ରମ, ଯୋଜନା ଓ ପ୍ରକଳ୍ପ ଏବଂ ନିଷ୍ପତ୍ତି ବାବଦରେ ଲୋକଙ୍କୁ ଅବଗତ କରାଇବ ।
ବର୍ଷ ପୂର୍ତ୍ତି ଅବସରରେ ଆସନ୍ତା ଜୁନ୍ ୧୧ରେ ମୁଖ୍ୟମନ୍ତ୍ରୀ ପୁରୀ ଯାଇ ଜଗନ୍ନାଥ ଦର୍ଶନ କରିବାର କାର୍ଯ୍ୟକ୍ରମ ଅଛି । ଏହାପରେ ମୁଖ୍ୟମନ୍ତ୍ରୀ ସାମ୍ବାଦିକ ସମ୍ମିଳନୀ କରି ବର୍ଷକର ସଫଳତା ଓ ରିପୋର୍ଟ କାର୍ଡ ଉପସ୍ଥାପନ କରିବେ । ସରକାରଙ୍କ ସଫଳତା ବଖାଣିବାକୁ ଏକ ଗୀତ ପ୍ରସ୍ତୁତ କରାଯାଉଛି । ୧୨ ତାରିଖରେ ଜନତା ମଇଦାନରେ ରାଜ୍ୟସ୍ତରୀୟ ସମାରୋହ ଅନୁଷ୍ଠିତ ହେବ । ବିକାଶ ମେଳା ଆୟୋଜିତ ହେବ । ଏହି ଆୟୋଜନରେ ଏବେ ଲାଗି ପଡ଼ିଛନ୍ତି ପୂର୍ତ୍ତ ଓ ଶିଳ୍ପ ବିଭାଗ ।
ଭୁବନେଶ୍ୱର ବାଦ୍ ଅନ୍ୟ ସହରରେ ବି ରାଜ୍ୟସ୍ତରୀୟ କାର୍ଯ୍ୟକ୍ରମ ହେବ । ଜୁନ୍ ୧୩ରେ ବ୍ରହ୍ମପୁରରେ ନାରୀ ଶକ୍ତି ସମ୍ମିଳନୀ, ୧୮ରେ ଢେଙ୍କାନାଳରେ ଯୁବ ଶକ୍ତି ସମାବେଶ, ୧୯ରେ ମୟୂରଭଞ୍ଜରେ ଆଦିବାସୀ ଶକ୍ତି ସମ୍ମେଳନ ଓ ୨୦ରେ ବରଗଡ଼ରେ ରାଜ୍ୟସ୍ତରୀୟ କୃଷକ ଶକ୍ତି ସମାବେଶ ହେବ ।
ଗତ ବର୍ଷକରେ ବିଭିନ୍ନ ଜିଲ୍ଲାରେ ଲୋକାର୍ପଣ ଓ ଶିଳାନ୍ୟାସ ହୋଇଥିବା ପ୍ରକଳ୍ପ ଭିତରୁ ୩୬୫ଟି ଶ୍ରେଷ୍ଠ ପ୍ରକଳ୍ପକୁ ଚିହ୍ନଟ କରି ସରକାର ସେଗୁଡିକୁ ବ୍ରାଣ୍ଡିଂ କରିବା ପାଇଁ ଯୋଜନା କରିଛନ୍ତି । ଫଳରେ ଏଗୁଡିକୁ ମିଳିବ ସ୍ୱତନ୍ତ୍ର ପରିଚୟ । ସରକାରଙ୍କ ସଫଳତା ମୋବାଇଲ୍ ଆପ୍ ମାଧ୍ୟମରେ ଲୋକଙ୍କ ନିକଟରେ ପହଞ୍ଚାଇବ ଇଲେକ୍ଟ୍ରୋନିକ୍ସ ଓ ଆଇଟି ବିଭାଗ । ମାଇଁ ଗଭ୍ ଆପ୍ରେ ଏ ସମ୍ପର୍କିତ ଭିଡିଓ, ଫଟୋ ଅପଲୋଡ୍ ହେବ । ପ୍ରଗତି ପ୍ରଭା ପତ୍ରିକାରେ ପ୍ରତି ବିଭାଗର ସଫଳତା କାହାଣୀ ପ୍ରକାଶିତ ହେବ । ଆଗକୁ ରଥଯାତ୍ରା ଥିବାରୁ ବିମାନବନ୍ଦର ଭଳି ପ୍ରମୁଖ ସ୍ଥାନରେ ସରକାରଙ୍କ ଉପଲବ୍ଧି ନେଇ ସୂଚନା ଓ ଲୋକସମ୍ପର୍କ ବିଭାଗ ବିଭିନ୍ନ ପ୍ରଦର୍ଶନୀ ମାଧ୍ୟମରେ ପର୍ଯ୍ୟଟକଙ୍କୁ ଅବଗତ କରାଇବ । ସୋସିଆଲ୍ ମିଡିଆରେ ଅଡିଓ ଏବଂ ଭିଡିଓରେ ବର୍ଷକର ସଫଳତା ବଖଣାଯିବ ।
ରବୀନ୍ଦ୍ର ମଣ୍ଡପରେ ୧୨ରୁ ୧୯ ଯାଏଁ ଓଡ଼ିଶାର ବରପୁତ୍ରମାନଙ୍କ କାହାଣୀ ପ୍ରଦର୍ଶିତ ହେବ । ଜୟଦେବ ଭବନରେ ବିଭିନ୍ନ ସଫଳ ଓଡ଼ିଆ ଚଳଚ୍ଚିତ୍ର ପ୍ରଦର୍ଶନ କରାଯିବ । ଭଞ୍ଜକଳା ମଣ୍ଡପରେ ବିଶିଷ୍ଟ କଣ୍ଠଶିଳ୍ପୀଙ୍କ ଗୀତ ପରିବେଷିତ ହେବ । ଜିଲ୍ଲାସ୍ତରରେ ବିକାଶ ମେଳା, ପଲ୍ଲିଶ୍ରୀ ମେଳା ଏବଂ ପାରମ୍ପରିକ ଖାଦ୍ୟ ଉତ୍ସବ ଆୟୋଜିତ ହେବ । ୧୨ଟି ନୀତିକୁ ନେଇ ରାଜ୍ୟ ସରକାର ବର୍ଷ ପୂର୍ତ୍ତି କାର୍ଯ୍ୟକ୍ରମରେ ଆଗକୁ ବଢ଼ିବେ । ଏ ନେଇ ସମସ୍ତ ବିଭାଗ ୩୧ ତାରିଖ ସୁଦ୍ଧା ନିଜ ତାଲିକା ଯୋଜନା ଓ ସଂଯୋଜନ ବିଭାଗକୁ ପଠାଇବାକୁ କୁହାଯାଇଛି ।
ଜୁନ୍ ୧୨ରୁ ୧୯ ଭିତରେ ପ୍ରତି ବ୍ଲକରେ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ପ୍ରତିଷ୍ଠା ପାଇଁ ଭିତ୍ତିପ୍ରସ୍ତର ଦିଆଯିବ । ସ୍କୁଲସ୍ତରରେ ଛାତ୍ରଛାତ୍ରୀଙ୍କୁ ନେଇ ଭିଜନ୍ ଓଡ଼ିଶା-୨୦୩୬ ଓ ବିକଶିତ ଭାରତ-୨୦୪୭ ଶୀର୍ଷକ ବିଷୟକୁ ନେଇ ପ୍ରବନ୍ଧ ଓ ଚିତ୍ରାଜ୍ଞନ ପ୍ରତିଯୋଗିତା ହେବ । ସମୃଦ୍ଧ ଓଡ଼ିଶା ଶୀର୍ଷକ ଜାତୀୟ ସେମିନାର ଆୟୋଜନ ପାଇଁ ସ୍ଥିର ହୋଇଛି । ଜିଲ୍ଲାସ୍ତରରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମର ପରିଚାଳନା ପାଇଁ କମିଟି ଗଢ଼ା ହେବ । ବିଭିନ୍ନ ଜିଲ୍ଲା ପାଇଁ ମନ୍ତ୍ରୀ ଦାୟିତ୍ୱ ନେବେ । ବର୍ଷ ପୂର୍ତ୍ତି ଅବସରରେ ଗଣମାଧ୍ୟମ ପ୍ରତିନିଧି, ଶିଳ୍ପ ସଂସ୍ଥା ପ୍ରମୁଖ, ସିଭିଲ୍ ସୋସାଇଟି, ବିଧାୟକ ଓ ସାଂସଦଙ୍କ ସହ ମୁଖ୍ୟମନ୍ତ୍ରୀ ଭାବ ବିନିମୟ କରିବାର କାର୍ଯ୍ୟକ୍ରମ ରହିଥିବା ଜଣାପଡ଼ିଛି ।
