କେନ୍ଦ୍ରାପଡ଼ା/ମହାକାଳପଡ଼ା,୦୪/୦୭: ଓଡ଼ିଶାରେ ବାଂଲାଦେଶୀ ଚିହ୍ନଟ ପ୍ରକ୍ରିୟା ଜାରି ରହିଛି । ଗୁରୁବାର କେନ୍ଦ୍ରପଡ଼ା ଜିଲ୍ଲା ବଉଳକଣି ପଞ୍ଚାୟତର ୬ଜଣଙ୍କୁ ଜମ୍ବୁ ସାମୁଦ୍ରିକ ଥାନା ପୁଲିସ ଉଠାଇ ଆଣିଥିଲା । ସେମାନଙ୍କ ମଧ୍ୟରେ ଜଣେ ଦଶମ ଶ୍ରେଣୀ ଛାତ୍ର ଥିବା ସୂଚନା ମିଳିଛି । ସେହିଭଳି କେନ୍ଦ୍ରାପଡ଼ା ଟାଉନ୍ର ବିଭିନ୍ନ ସ୍ଥାନରେ ବୁଲି ବୁଲି ଫେରି ବେପାର କରୁଥିବା ବଙ୍ଗ ଭାଷାଭାଷୀ ୧୫ଜଣଙ୍କୁ ଉଠାଇ ନେଇଛି ପୁଲିସ । ସେମାନଙ୍କୁ ଜିଲ୍ଲା ପ୍ରଶାସନ ନିକଟକୁ ନିଆଯାଇ ବିଭିନ୍ନ ପରିଚୟ ପ୍ରମାଣପତ୍ର ଓ ଠିକଣା ପ୍ରମାଣପତ୍ର ଯାଞ୍ଚ୍ କରାଯାଉଛି ।
ମହାକାଳପଡ଼ା ବ୍ଲକ୍ର ବଙ୍ଗ ଭାଷାଭାଷୀ ଅଞ୍ଚଳରେ ବସବାସ କରୁଥିବା ଅଣଭାରତୀୟମାନେ ବିଭିନ୍ନ ଗଳାବାଟ ଦେଇ ଭାରତରେ ପ୍ରବେଶ କରୁଥିଲେ । ପରେ ଅବୈଧ ଆଧାର କାର୍ଡ ଯୋଗାଡ଼ କରି ନିଜକୁ ଭାରତୀୟ ବୋଲି ପ୍ରମାଣିତ କରିବାକୁ ଚେଷ୍ଟା କରିଛନ୍ତି । ରାସନ କାର୍ଡ ଯୋଗାଡ଼ କରିବା, ଭୋଟର ପରିଚୟପତ୍ରରେ ନାମ ପଞ୍ଜିକରଣ କରିବାରେ ଏମାନେ ସକ୍ଷମ ହୋଇଥିଲେ । କିନ୍ତୁ ରାଜ୍ୟ ସରକାର ବାଂଲାଦେଶୀ ଚିହ୍ନଟ ପ୍ରକ୍ରିୟା ଆରମ୍ଭ କରିବା ପରେ ଏବେ ଛନକା ପଶିଛି । ଯାହା ସୂଚନା ମିଳିଛି, ଲୁଚାଛପାରେ ଏଠାରେ ରହୁଥିବା ବାଂଲାଦେଶୀ ନିଜ ଦେଶକୁ ପ୍ରତ୍ୟାବର୍ତ୍ତନ କରିବା ପାଇଁ ପ୍ରସ୍ତୁତି ଚଳାଇଛନ୍ତି । ଏମିତିକି କିଛି ପ୍ରତ୍ୟାବର୍ତ୍ତନ ଆରମ୍ଭ କରିଥିବା ଜଣାଯାଇଛି ।
ଜଣେ ବରିଷ୍ଠ ପୁଲିସ ଅଧିକାରୀଙ୍କ ସୂଚନା ଅନୁସାରେ, କିଛି ଅଣହିନ୍ଦୁ ମହାକାଳପଡ଼ା ଅଞ୍ଚଳରେ ଚିଙ୍ଗୁଡ଼ିଘେରି ଜଗିବା ଓ ବୋଟ୍ରେ ମତ୍ସ୍ୟଜୀବୀ ଭାବେ କାମ କରିବାକୁ ନିଜର ବେଉସା ଭାବେ ଆଦରି ନେଇଛନ୍ତି । ଏ ସବୁ ତଦନ୍ତ ଭିତରେ ୨୦୦୫ ମସିହାରେ ସରକାରୀ ଭାବେ ମହାକାଳପଡ଼ା, ରାଜନଗର ଓ ପଟ୍ଟାମୁଣ୍ଡାଇ ବ୍ଲକ୍ରେ ଚିହ୍ନଟ ୧୬୪୯ ବାଂଲାଦେଶୀ ଗଲେ କୁଆଡ଼େ ତାକୁ ନେଇ ପ୍ରଶ୍ନ ଉଠିଲାଣି ?
