- କେଉଁ ରେଳମନ୍ତ୍ରୀଙ୍କ ସମୟରେ କେତେ ହୋଇଛି ଟ୍ରେନ୍ ଦୁର୍ଘଟଣା?
- ପୂର୍ବରୁ ନୀତୀଶ, ମମତା ଓ ଲାଲୁ ରେଳମନ୍ତ୍ରୀ ଭାବରେ କାର୍ଯ୍ୟ କରିସାରିଛନ୍ତି
- ବାଲେଶ୍ବର ବାହାନଗା ରେଳ ଦୁର୍ଘଟଣା ପରେ ବିରୋଧିଙ୍କ ବୟାନବାଜି
ନୂଆଦିଲ୍ଲୀ,୦୪/୦୬: ବାଲେଶ୍ବର-ବାହାନଗା ରେଳ ଦୁର୍ଘଟଣା ସାରା ଦେଶକୁ ସ୍ତବ୍ଧ କରିଦେଇଛି। ତିନୋଟି ଟ୍ରେନ୍ ଦୁର୍ଘଟଣାଗ୍ରସ୍ତ। ପ୍ରଥମେ ମାଲ୍ଗାଡ଼ିକୁ ଧକ୍କା ଦେଲା କରମଣ୍ଡଳ, ପରେ ପରେ ଅନ୍ୟ ଏକ ଟ୍ରାକ୍ରେ ଯାଉଥିବା ୟଶବନ୍ତପୁର-ହାଓ୍ବଡ଼ା ଏକ୍ସପ୍ରେସର ପାଖାପାଖି ପାର୍ ହୋଇଯାଇଥିବା ବେଳେ ଶେଷ ଦୁଇଟି ବଗିରେ ମାଡ଼ ହୋଇଥିଲା ଦୁର୍ଘଟଣାଗସ୍ତ କରମଣ୍ଡଳ ସୁପରଫାଷ୍ଟ ଏକ୍ସପ୍ରେସ। ସଦ୍ୟତମ ରିପୋର୍ଟ ଅନୁସାରେ ୧୦୦୦ରୁ ଅଧିକ ଲୋକ ଆହତ ହୋଇଥିବା ବେଳେ ୨୭୫ ଜଣଙ୍କର ମୃତ୍ୟୁ ହୋଇଛି।
ଦୁର୍ଘଟଣାକୁ ନେଇ ଯାଞ୍ଚ କମିଟି ଗଠନ କରାଯାଇଛି। ଖୁବଶୀଘ୍ର ସମସ୍ତ କାରଣ ଜଣାପଡ଼ିଯିବ ବୋଲି କହିଛନ୍ତି ରେଳମନ୍ତ୍ରୀ ଅଶ୍ବିନୀ ବୈଷ୍ଣବ। ଦୁଇ ଦଶନ୍ଧି ମଧ୍ୟରେ ଏହା ସବୁଠାରୁ ବଡ଼ ଟ୍ରେନ୍ ଦୁର୍ଘଟଣା ହୋଇଥିବା ଯୋଗୁ ବିରୋଧୀ ମୋଦୀ ସରକାରଙ୍କ ଉପରେ ଆକ୍ରମଣ କରୁଛନ୍ତି ଏବଂ ରେଳ ମନ୍ତ୍ରୀଙ୍କୁ ହଟାଇବାକୁ ଦାବି କରୁଛନ୍ତି। ତେବେ ଏହାରି ଭିତରେ ମୋଦୀ ସରକାର କ୍ଷମତାକୁ ଆସିବା ପୂର୍ବରୁ ତିନି ଜଣ ଜଣାଶୁଣା ରେଳ ମନ୍ତ୍ରୀଙ୍କ କାର୍ଯ୍ୟକାଳ ମଧ୍ୟରେ ଘଟିଥିବା କେତେ ଟ୍ରେନ୍ ଦୁର୍ଘଟଣା ହୋଇଥିଲା ଆସନ୍ତୁ ଦେଖିବା
ମମତା ବାନାର୍ଜୀ:
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଯେତେବେଳେ ପ୍ରଥମ ଥର ରେଳମନ୍ତ୍ରୀ ହୋଇଥିଲେ, ସେତେବେଳେ କେନ୍ଦ୍ରରେ ଏନଡିଏ ସରକାର ଥିଲା। ୧୯୯୯ରେ ତତ୍କାଳୀନ ଅଟଳ ବିହାରୀ ବାଜପାୟୀ ତାଙ୍କୁ ରେଳ ମନ୍ତ୍ରାଳୟ ହସ୍ତାନ୍ତର କରିଥିଲେ। ତେବେ ୨୦୦୯ରେ ଅର୍ଥାତ ମନମାହନ ସିଂଙ୍କ ଦ୍ବିତୀୟ କାର୍ଯ୍ୟକାଳରେ ମମତାଙ୍କୁ ପୁଣିଥରେ ରେଳ ମନ୍ତ୍ରାଳୟ ସମ୍ଭାଳିବାର ସୁଯୋଗ ଦିଆଯାଇଥିଲା। ମମତା ବାନାର୍ଜୀ ରେଳମନ୍ତ୍ରୀ ଥିବା ବେଳେ ମୋଟ ୫୪ଟି ରେଳ ଦୁର୍ଘଟଣା ଘଟିଥିଲା। ଏଥିରେ ମୋଟ ୧୪୫୧ ଜଣ ଲୋକ ପ୍ରାଣ ହରାଇଥିଲେ। ଏଥିସହିତ ମମତା ରେଳମନ୍ତ୍ରୀ ଥିବା କାର୍ଯ୍ୟକାଳ ସମୟରେ ୮୩୯ଥର ଟ୍ରେନ୍ ଲାଇନଚ୍ୟୁତ ହୋଇଥିଲା।
ପଢ଼ନ୍ତୁ: ଦୁର୍ଘଟଣାର କାରଣ ସିଗନାଲିଂ ଫେଲ୍, କରମଣ୍ଡଳ ଏକ୍ସପ୍ରେସ୍ ପ୍ରଥମେ ଧକ୍କା ଦେଇଥିଲା: ରେଳ ବିଭାଗର ସ୍ପଷ୍ଟିକରଣ
ନୀତୀଶ କୁମାର:
ବିହାରର ବର୍ତ୍ତମାନର ମୁଖ୍ୟମନ୍ତ୍ରୀ ତଥା ଜେଡିୟୁ ନେତା ନୀତୀଶ କୁମାର ମଧ୍ୟ ଅଟଳ ସରକାରଙ୍କ ସମୟରେ ପ୍ରଥମ ଥର ପାଇଁ ରେଳ ମନ୍ତ୍ରୀ ହୋଇଥିଲେ। ୧୯୯୯ ରେ, ନୀତୀଶ କୁମାରଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ, ଗୈସୋଲରେ ଏକ ବଡ଼ ଟ୍ରେନ୍ ଦୁର୍ଘଟଣା ଘଟିଥିଲା, ଯେଉଁଥିରେ ୨୮୫ ଜଣଙ୍କର ମୃତ୍ୟୁ ହୋଇଥିଲା। ଦୁର୍ଘଟଣା ପରିଚାଳନାର ଦାୟୀତ୍ବ ନେବା ପରେ ସେ ଏହି ପଦରୁ ଇସ୍ତଫା ଦେଇଥିଲେ। ଗୁରୁତ୍ବପୂର୍ଣ୍ଣ କଥା ହେଉଛି ଟ୍ରେନ୍ ଦୁର୍ଘଟଣା ହେତୁ କେବଳ ଦୁଇଜଣ ମନ୍ତ୍ରୀ ସେମାନଙ୍କ ପଦରୁ ଇସ୍ତଫା ଦେଇଥିଲେ। ପ୍ରଥମ ହେଉଛନ୍ତି ଲାଲ ବାହାଦୂର ଶାସ୍ତ୍ରୀ। ୨୦୦୧ ରେ, ନୀତୀଶ କୁମାରଙ୍କୁ ପୁଣି ଥରେ ରେଳ ମନ୍ତ୍ରଣାଳୟ ମିଳିଥିଲା। ସେ ଏହି ପଦରେ ୨୦୦୪ ପର୍ଯ୍ୟନ୍ତ ରହିଥିଲେ। ତାଙ୍କ କାର୍ଯ୍ୟକାଳ ମଧ୍ୟରେ ୭୯ ଟି ରେଳ ଦୁର୍ଘଟଣା ଘଟିଥିଲା ଯେଉଁଥିରେ ୧୫୨୭ ଜଣଙ୍କର ମୃତ୍ୟୁ ହୋଇଥିଲା। ନୀତୀଶ ରେଳ ମନ୍ତ୍ରୀ ଥିବାବେଳେ ୧୦୦୦ଟି ଟ୍ରେନ୍ ଲାଇନଚ୍ୟୁତ ହୋଇଥିବା ତଥ୍ୟ ରହିଛି।
ଲାଲୁ ପ୍ରସାଦ ଯାଦବ:
ମନମୋହନ ସିଂଙ୍କ ନେତୃତ୍ବାଧିନ ପ୍ରଥମ ୟୁପିଏ କାର୍ଯ୍ୟକାଳରେ ଲାଲୁ ପ୍ରସାଦ ଯାଦବଙ୍କୁ ରେଳମନ୍ତ୍ରୀ କରାଯାଇଥିଲା। ସେ ସମ୍ପୁର୍ଣ୍ଣ ୫ ବର୍ଷର କାର୍ଯ୍ୟକାଳ ପୂରା କରିଥିଲେ। ଉପରୋକ୍ତ ଦୁଇ ପୂର୍ବତନ ରେଳମନ୍ତ୍ରୀଙ୍କ ତୁଳନାରେ ଲାଲୁଙ୍କ କାର୍ଯ୍ୟକାଳରେ ଖୁବ୍ କମ୍ ରେଳ ଦୁର୍ଘଟଣା ହୋଇଛି। ଲାଲୁଙ୍କ କାର୍ଯ୍ୟକାଳରେ ମୋଟ ୫୧ଟି ରେଳ ଦୁର୍ଘଟଣା ହୋଇଥିବା ବେଳେ ଏଥିରେ ୧୧୫୯ ଜଣ ଲୋକଙ୍କର ଜୀବନ ଯାଇଥିଲା। ଏହା ନୀତୀଶ ଓ ମମତାଙ୍କ ତୁଳନାରେ କମ୍ ଅଟେ। ତେବେ ଲାଲୁଙ୍କ କାର୍ଯ୍ୟକାଳ ସମୟରେ ରେଳ ଲାଇନ୍ଚ୍ୟୁତ ହେବା ଘଟଣା ବହୁତ କମ୍ ଅର୍ଥାତ୍ ମାତ୍ର ୫୫୦ ଥିଲା।
You can also read: ଶେଷରେ ସତ ମାନିଲେ ରାଜ ପରିବାର, ବ୍ରିଟେନ୍ ଜବରଦସ୍ତ ନେଇଯାଇଥିଲା କୋହିନୂର
