ଭୁବନେଶ୍ୱର,୨୮/୪ : ଓଡ଼ିଶାର ଦୀର୍ଘ କାଳୀନ ବିକାଶର ରୂପ ରେଖ ପ୍ରସ୍ତୁତ କରିବା ଦିଗରେ ଏକ ପ୍ରମୁଖ ପଦକ୍ଷେପ ସ୍ୱରୂପ, ଆଜି ପ୍ରଶାସନିକ ଓ ଶାସନ ସଂସ୍କାର କମିଟିର ସଦସ୍ୟ ଓ. ପି. ଅଗ୍ରୱାଲଙ୍କ ସହ ଏକ ଉଚ୍ଚସ୍ତରୀୟ ପରାମର୍ଶଦାତା ବୈଠକ ଅନୁଷ୍ଠିତ ହୋଇଯାଇଛି । ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢ଼ୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଗୃହ ନିର୍ମାଣ ଓ ନଗରଉନ୍ନୟନ ବିଭାଗର ବରିଷ୍ଠ ପ୍ରଶାସନିକ ଅଧିକାରୀମାନେ ଯୋଗଦେଇଥିଲେ। “ବିକଶିତ ଓଡ଼ିଶା ୨୦୩୬”ର ଲକ୍ଷ୍ୟକୁ ସାକାର କରିବା ପାଇଁ ସମନ୍ୱିତ ଯୋଜନା ପ୍ରଣାଳୀକୁ ସୁଦୃଢ଼ କରିବା ଏବଂ ପ୍ରଶାସନିକ ସଂସ୍କାରକୁ ଆଗେଇ ନେବା ବିଷୟରେ ଏଠାରେ ବିସ୍ତୃତ ଆଲୋଚନା କରାଯାଇଛି ।
ପାରମ୍ପରିକ ଯୋଜନା ପ୍ରଣାଳୀ ପରିବର୍ତ୍ତେ ଏକ ଗତିଶୀଳ ତଥା ଭବିଷ୍ୟତ-ମୁଖୀ ମଡେଲ ଆପଣାଇବା ଉପରେ ଏହି ବୈଠକରେ ବିଶେଷ ଗୁରୁତ୍ୱ ଦିଆଯାଇଥିଲା । ଏହି ନୂତନ ମଡେଲ ମୁଖ୍ୟତଃ ବିଭିନ୍ନ ବିଭାଗ ମଧ୍ୟରେ ସମନ୍ୱୟ, ତଥ୍ୟ-ଭିତ୍ତିକ ନିଷ୍ପତ୍ତି ଗ୍ରହଣ ଏବଂ ସାଂସ୍ଥାନିକ ସଂହତି ଉପରେ ପର୍ଯ୍ୟବେସିତ। ରାଜ୍ୟର ସାମଗ୍ରିକ ବିକାଶ ପାଇଁ ଅର୍ଥନୈତିକ, ସ୍ଥାନିକ ଏବଂ ପ୍ରଶାସନିକ ଯୋଜନାକୁ ଏକତ୍ରିତ କରି ସ୍ଥାୟୀ ତଥା ସମାବେଶୀ ଅଭିବୃଦ୍ଧି ନିଶ୍ଚିତ କରିବାକୁ ଲକ୍ଷ୍ୟ ରଖାଯାଇଛି । ଏଥିସହ ଭୂ-ଉପଯୋଗ ଯୋଜନାରେ ସ୍ପଷ୍ଟତା ଆଣିବା ଏବଂ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ରଣନୈତିକ ଅର୍ଥନୈତିକ କ୍ଷେତ୍ରଗୁଡ଼ିକୁ ଚିହ୍ନଟ କରିବା ଉପରେ ମଧ୍ୟ ଆଲୋଚନା ହୋଇଥିଲା।
ସରକାରୀ ପ୍ରକ୍ରିୟାର ସରଳିକରଣ, ସେବା ପ୍ରଦାନରେ ଉନ୍ନତି ଏବଂ ବିଭାଗୀୟ ସମନ୍ୱୟ ରକ୍ଷା ଭଳି ପ୍ରଶାସନିକ ସଂସ୍କାର ହିଁ ରାଜ୍ୟର ଦୀର୍ଘକାଳୀନ ଆଶା ଓ ଆକାଂକ୍ଷାକୁ ପୂରଣ କରିବାରେ ସହାୟକ ହେବ। ଏଥିସହିତ ଦକ୍ଷତା ବୃଦ୍ଧି, ସାଂସ୍ଥାନିକ ସୁଦୃଢ଼ୀକରଣ ଏବଂ ପରିବର୍ତ୍ତିତ ବିଶ୍ୱସ୍ତରୀୟ ଆହ୍ୱାନର ମୁକାବିଲା କରିପାରୁଥିବା ଏକ ଚଳଚଞ୍ଚଳ ଶାସନ ବ୍ୟବସ୍ଥା ଗଠନ କରିବାକୁ ବୈଠକରେ ଗୁରୁତ୍ୱ ଦିଆଯାଇଥିଲା । ଏହି ବୈଠକଟି ସାଂସ୍ଥାନିକ ଢାଞ୍ଚାକୁ ଅଧିକ ଶକ୍ତିଶାଳୀ କରିବା ଏବଂ ବିଭିନ୍ନ ବିଭାଗୀୟ ରଣନୀତିକୁ “ବିକଶିତ ଓଡ଼ିଶା ୨୦୩୬” ର ଲକ୍ଷ୍ୟ ସହ ସମନ୍ୱିତ କରିବା ପାଇଁ ସହାୟକ ହୋଇପାରିବ । ସ୍ଥାୟୀ ବିକାଶ ଏବଂ ପ୍ରଶାସନିକ ଶ୍ରେଷ୍ଠତା କ୍ଷେତ୍ରରେ ଓଡ଼ିଶାକୁ ଏକ ଅଗ୍ରଣୀ ରାଜ୍ୟ ଭାବେ ପ୍ରତିଷ୍ଠିତ କରିବା ପାଇଁ ରାଜ୍ୟ ସରକାରଙ୍କ ପ୍ରତିବଦ୍ଧତା ଏହି ଆଲୋଚନାରୁ ସ୍ପଷ୍ଟ ପ୍ରତିଫଳିତ ହୋଇଛି ।
