ମହଙ୍ଗା ହେବ ଓଲା-ଉବରରେଯାତ୍ରା ଭଡ଼ା; ପ୍ରତ୍ୟେକ ଯାତ୍ରାରେ ଦେବାକୁ ହେବ ୫% ସୁବିଧା ଶୁଳ୍କ
ନୂଆଦିଲ୍ଲୀ,୨୮/୧୧: ଆପଣ ଓଲା କିମ୍ବା ଉବରରେ ଯାତ୍ରା କରୁଛନ୍ତି କି? ଯଦି ହଁ… ତେବେ ଆପଣଙ୍କୁ ଏହି ଖବରଟି ଝଟ୍କା ଦେଇପାରେ। କାହିଁକି ନା ଏଥର ଆପଣ ଓଲା କିମ୍ବା ଉବର ଯାତ୍ରା କଲେ ପୂର୍ବାପେକ୍ଷା ଅଧିକ ଭଡ଼ା ଦେବାକୁ ହେବ। କିନ୍ତୁ ଏହା ଆମ ରାଜ୍ୟରେ ଲାଗୁ ହୋଇନଥିଲେ ବି କର୍ଣ୍ଣାଟକ ସରକାରଙ୍କ ଏକ ନିଷ୍ପତ୍ତି ଓଲା-ଉବର ପରି କ୍ୟାବ ଏଗ୍ରିଗେଟର ସହିତ ଜଡିତ ଅଟୋରିକ୍ସା ଡ୍ରାଇଭରମାନଙ୍କ ପାଇଁ ଗଳାରେ ଫାଶ ଭଳି ହୋଇଛି। ଡିସେମ୍ବର ୨୫ ରେ, ସରକାର ଆଞ୍ଚଳିକ ପରିବହନ କର୍ତ୍ତୃପକ୍ଷଙ୍କୁ ପ୍ରତ୍ୟେକ କ୍ୟାବ୍ ଯାତ୍ରା ପାଇଁ ଆପ୍ ଆଧାରିତ ଅଟୋ ଏଗ୍ରିଗେଟରମାନଙ୍କୁ ପାଞ୍ଚ ପ୍ରତିଶତ ସୁବିଧା ଶୁଳ୍କ ଏବଂ ଜିଏସ୍ଟି ଆଦାୟ କରିବାକୁ ନିର୍ଦ୍ଦେଶ ଦେଇଛନ୍ତି। ଅଟୋ ଡ୍ରାଇଭରମାନେ କହିଛନ୍ତି ଯେ ଏହା ଅଟୋ ରିକ୍ସା ଡ୍ରାଇଭର ଏବଂ ଯାତ୍ରୀଙ୍କୁ କ୍ଷତି ପହଞ୍ଚାଇପାରେ। ଓଲା ଉବେର ଡ୍ରାଇଭର ଏବଂ ମାଲିକ ସଂଘ (OUDOA) ସରକାର ଏହି ମାମଲାକୁ ହାଇକୋର୍ଟରେ ସଠିକ୍ ଭାବେ ଉପସ୍ଥାପନ କରିନାହାନ୍ତି ବୋଲି ଅଭିଯୋଗ କରିଛନ୍ତି।
ଅଟୋ ଡ୍ରାଇଭରମାନେ କହିଛନ୍ତି ଯେ ଧାର୍ଯ୍ୟ ଭଡା ବହୁତ ଅଧିକ ମନେ ହେଉନାହିଁ, କିନ୍ତୁ କମ୍ପାନୀଗୁଡିକ ଲୋକମାନଙ୍କଠାରୁ କିପରି ସୁବିଧା ଶୁଳ୍କ ଆଦାୟ କରିବେ ତାହା ହିଁ ଚିନ୍ତାଜନକ ବିଷୟ। ଲୋକଙ୍କ ଧାରଣା ଥିଲା ଯେ ଓଲା-ଉବେର କମ୍ପାନୀଗୁଡିକ ବହୁତ ଅଧିକ ଭଡ଼ା ଆଦାୟ କରୁଥିଲେ, ଯେଉଁଥିପାଇଁ ସରକାର ଏଥିରେ ହସ୍ତକ୍ଷେପ କରିବାକୁ ମଧ୍ୟ ଦାବି ହୋଇଥିଲା। କିନ୍ତୁ ଏହି ନୂତନ କ୍ରମକୁ କିପରି ଅନୁସରଣ କରାଯିବ ତାହା ହିଁ ସମସ୍ତଙ୍କ ମୁଣ୍ଡବ୍ୟଥାର କାରଣ ପାଲଟିଛି।
ସରକାରଙ୍କ ଉପରେ ଅଭିଯୋଗ:
ମନି କଣ୍ଟ୍ରୋଲର ରିପୋର୍ଟ ଅନୁଯାୟୀ, UDOA ମୁଖ୍ୟ ତନବୀର ପାଶା କର୍ଣ୍ଣାଟକ ସରକାରଙ୍କୁ ଏ ସଂକ୍ରାନ୍ତରେ କର୍ଣ୍ଣାଟକ ହାଇକୋର୍ଟରେ ସଠିକ୍ ଉପସ୍ଥାପନ ନକରିଥିବା ଅଭିଯୋଗ କରିଛନ୍ତି। ତନବୀର କହିଛନ୍ତି ଯେ ଅଟୋରିକ୍ସା ପାଇଁ କୌଣସି ବ୍ୟବସ୍ଥା ନ ଥିବାରୁ ସରକାର କର୍ଣ୍ଣାଟକ ଅନ୍-ଡିମାଣ୍ଡ ଟ୍ରାନ୍ସପୋର୍ଟ ଟେକ୍ନୋଲୋଜି ଏଗ୍ରିଗେଟର୍ସ ନିୟମରେ ସଂଶୋଧନ କରିବା ଉଚିତ୍। ପାଶା କହିଛନ୍ତି ଯେ ଯଦି ପରିବହନ ବିଭାଗ ହାଇକୋର୍ଟକୁ ସଠିକ୍ ସୂଚନା ଦେଇଥାନ୍ତେ ତେବେ କୋର୍ଟ ଏହି ନିୟମକୁ ସଂଶୋଧନ କରିବାକୁ ନିର୍ଦ୍ଦେଶ ଦେଇଥାନ୍ତେ। ପରିବହନ ବିଭାଗ ମଧ୍ୟ ବେଙ୍ଗାଲୁରୁ ସହରୀ ଜିଲ୍ଲାର ଆଞ୍ଚଳିକ ପରିବହନ ପ୍ରାଧିକରଣକୁ ଏଥିରେ ସମାଲ କରିନଥିଲେ କି ଏ ସମ୍ପର୍କରେ କୌଣସି ବି ସୂଚନା ଦେଇନଥିଲେ।
କର୍ଣ୍ଣାଟକ ସରକାର ଅଟୋରିକ୍ସାର ଭଡା ସ୍ଥିର କରିଛନ୍ତି। ସର୍ବନିମ୍ନ ଚାର୍ଜ ହେଉଛି ୩୦ ଟଙ୍କା ଏବଂ ତା’ଠାରୁ ଅଧିକ ଯାହା କିଲୋମିଟର ପିଛା ୧୫ ଟଙ୍କା ଚାର୍ଜ କରାଯାଇପାରିବ। ଅଟୋରିକ୍ସା ଡ୍ରାଇଭର ଥିମାପ୍ପା କହିଛନ୍ତି ଯେ ଏହି ନିର୍ଦ୍ଧାରିତ ଭଡ଼ା ଅଧିକ ନୁହେଁ, କିନ୍ତୁ କମ୍ପାନୀଗୁଡିକ କିପରି ଲୋକଙ୍କ ଠାରୁ ସୁବିଧା ଶୁଳ୍କ ଆଦାୟ କରିବେ ତାହା ଆକଳନ କରିବା କଷ୍ଟକର। ଦେଖିବାର କଥା ଏ ତମାମ ଅଭିଯୋଗ ଭିତରେ କର୍ଣ୍ଣାଟକ ସରକାରଙ୍କର ଆଭିମୁଖ୍ୟ କ’ଣ ରହୁଛି।
