ଭୁବନେଶ୍ୱର,୨୪ ।୩: ଫ୍ଲ।ଟ୍ ଓ ଜମି ଯୋଗାଇ ଦେବାକୁ କହି ବିଭିନ୍ନ ଲୋକଙ୍କ ଠାରୁ କୋଟି କୋଟି ଟଙ୍କା ଠକେଇ। ଏହି ଘଟରାରେ ଖାରବେଳନଗର ଥାନା ପୁଲିସ ଅଲଟ୍ରା ଲୁକ୍ ଭେନ୍ଚର୍ସ ପ୍ରାଇଭେଟ୍ ଲିମିଟେଡ୍ର ଏମ୍ଡିଙ୍କୁ ଗିରଫ କରିଛି । ତାଙ୍କ ନାମ ନରୋତ୍ତମ ମହାନ୍ତି(୪୩) । ଘର ବଲେଶ୍ୱର ସୋର ଥାନା ମଙ୍ଗଳପୁର । ସେ ସୋନପୁର ଧୋବାବାହାଲି ରୋଡ୍ରେ ରହୁଥିଲେ ।
ନରୋତ୍ତମ ଖାରବେଳନଗର ପ୍ଲଟ୍ ନଂ-୨୬୯ରେ ଏମ୍ଏସ୍ ଅଲଟ୍ରା ଲୁକ୍ ଭେନ୍ଚର୍ସ ପ୍ରାଇଭେଟ୍ ଲିମିଟେଡ୍ ନାମକ ଏକ ବିଲ୍ଡର ସଂସ୍ଥା ଖୋଲିଥିଲେ । ପୁଲିସ ସୂଚନା ଅନୁଯାୟୀ, ବାଲେଶ୍ୱରର ଉମାକାନ୍ତ ପାଣିଗ୍ରାହୀ ଭୁବନେଶ୍ୱରରେ ରହୁଥିଲେ । ସେ ସିଆରପିଏଫ୍ର ଜଣେ କନ୍ଷ୍ଟେବଳ ଭାବେ ଛତିଶଗଡ଼ରେ କାର୍ଯ୍ୟରତ ଥିଲେ । ଭୁବନେଶ୍ୱରରେ ମା’ ସନ୍ତୋଷୀ ଏନ୍କ୍ଲେଭରେ ଏକ ଫ୍ଲାଟ୍ କିଣିବା ପାଇଁ ସେ ନରୋତ୍ତମଙ୍କୁ ୧୮ ଲକ୍ଷ ୬୫ ହଜାର ଟଙ୍କା ଅଗ୍ରୀମ ଦେଇଥିଲେ । ହେଲେ ନରୋତ୍ତମ ତାଙ୍କୁ ଫ୍ଲାଟ୍ ଦେଇ ନଥିଲେ । ଉମାକାନ୍ତ ଟଙ୍କା ଫେରସ୍ତ ମାଗିବାରୁ ନରୋତ୍ତମ ବନ୍ଧୁକ ଦେଖାଇ ଧମକଚମକ ଦେଇଥିଲେ । ଏନେଇ ଉମାକାନ୍ତ ଖାରବେଳନଗର ଥାନାରେ ଅଭିଯୋଗ କରିଥିଲେ । ଉମାକାନ୍ତଙ୍କ ପରି ଅନ୍ୟ ୨ ଜଣ ମଧ୍ୟ ନରୋତ୍ତମଙ୍କ ବିରୋଧରେ ୧୦ ଲକ୍ଷ ଏବଂ ୧୫ ଲକ୍ଷ ଟଙ୍କା ଠକେଇର ଶିକାର ହୋଇଥିବା ଖାରବେଳନଗର ଥାନାରେ ଅଭିଯୋଗ କରିଥିଲେ । ନରୋତ୍ତମଙ୍କ ନାମରେ ଖାରବେଳନଗର ଥାନା ସମେତ ତମାଣ୍ଡୋ ଏବଂ ପଶ୍ଚିମବଙ୍ଗରେ ମଧ୍ୟ ଜମି ଠକେଇ ମାମଲା ଥିବା ଜଣା ପଡ଼ିଛି । ପୁଲିସ ଗତକାଲି ରାତିରେ ନରୋତ୍ତମଙ୍କୁ ଉଠାଇ ଆଣିଥିଲା । ତାଙ୍କ ଠାରୁ ବିଭିନ୍ନ ଜମିଜମା କାଗଜପତ୍ର, ୨ଟି ମୋବାଇଲ ଫୋନ୍, ଅନେକ ପରିଚୟପତ୍ର, ଗୋଟିଏ କାର୍, ମାଉଜର ସହ ୯ ରାଉଣ୍ଡ୍ ଗୁଳି ଜବତ କରିଥିଲା । ସୋମବାରନରୋତ୍ତମଙ୍କୁ କୋର୍ଟ ଚାଲାଣ କରା ଯାଇଛି । ନରୋତ୍ତମ ଏପରି କେତେ ଲୋକଙ୍କୁ ଠକିଛନ୍ତି ସେନେଇ ପୁଲିସ ଖୋଳତାଡ଼ ଚଳାଇଛି । ଆବଶ୍ୟକ ପଡିଲେ ନରୋତ୍ତମଙ୍କୁ ରିମାଣ୍ଡରେ ଆଣି ଅଧିକ ଜେରା କରାଯିବ ବୋଲି କମିଶନରେଟ୍ ପୁଲିସ ପକ୍ଷରୁ କୁହାଯାଇଛି ।
