ଠାକୁରମୁଣ୍ଡା ୧୫/୫( ଆପ୍ର ) ଠାକୁରମୁଣ୍ଡାରୁ ୭ କିମି ଦୂର ପତରତୋଳା ଛକ ନିକଟରେ ଏକ ହୁଣ୍ଡାଇ କାର ଗଛକୁ ଧକ୍କା ଦେଇ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ସୁଜନପୁର ଗ୍ରାମର ତନ୍ମୟ ବିଶ୍ଵାଳ ଗୁରୁତର ହୋଇଛନ୍ତି।
ଯାଜପୁର ଜିଲ୍ଲା ସୁଜନପୁର ଗ୍ରାମର ତନ୍ମୟ ବିଶ୍ଵାଳ ଏକ ହୁଣ୍ଡାଇ କାର ଯୋଗେ ନିଜ ଘରୁ କରଞ୍ଜିଆ ଆସୁଥିଲେ। ଭାରସାମ୍ୟ ହରାଇ ଏକ ଅଶନ ଗଛକୁ କାର ଧକ୍କା ଦେଇଥିଲା। ଛକ ନିକଟରେ ଥିବା କେତେକ ଗ୍ରାମବାସୀ ଦୁର୍ଘଟଣା ସ୍ଥଳରୁ ତନ୍ମୟ ବିଶ୍ଵାଳଙ୍କୁ ଉଦ୍ଧାର କରି ଏକ ବାଇକ୍ ଯୋଗେ ଠାକୁରମୁଣ୍ଡା ଗୋଷ୍ଠୀ ଚିକିତ୍ସାଳୟରେ ଭର୍ତ୍ତି କରିଥିଲେ। ତନ୍ମୟଙ୍କ ମୁଣ୍ଡରେ ଓ ବାମ ହାତରେ ଆଘାତ ଲାଗିଛି। ଅବସ୍ଥା ଗୁରୁତର ଥିବାରୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ଅଧିକ ଚିକିତ୍ସା ପାଇଁ ପଠାଯାଇଛି। ତନ୍ମୟ ବିଶ୍ଵାଳ କରଞ୍ଜିଆ ଦେଓ ନଦୀବନ୍ଧ ଯୋଜନାରେ କେନାଲ ବିଭାଗରେ ଠିକାଦାର ଭାବେ କାର୍ଯ୍ୟ କରନ୍ତି।ଠାକୁରମୁଣ୍ଡା ଥାନା ପୋଲିସ୍ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରୀ ରଖିଛି।
