ଶିମଲା,୨୮ ।୧(ଏଜେନ୍ସି): କଂଗ୍ରେସ ପାଇଁ ଓଆରଓପି ଅର୍ଥ ହେଉଛି ‘ଓନ୍‌ଲି ରାହୁଲ, ଓନ୍‌ଲି ପ୍ରିୟଙ୍କା । ସେନାରେ ଲାଗୁ ହୋଇଥିବା ଓଆରଓପି (ୱାନ ର‌୍ୟାଙ୍କ ୱାନ ପେନ୍‌ସନ)ର ଏଭଳି ଅର୍ଥ ଅର୍ଥ ବାହାର କରି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ କଂଗ୍ରେସକୁ ଟାର୍ଗେଟ କରିଛନ୍ତି । ନିକଟରେ କଂଗ୍ରେସ ଅଧ୍ୟକ୍ଷ ରାହୁଲଙ୍କ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା ସକ୍ରିୟ ରାଜନୀତିରେ ପ୍ରବେଶ କରିବା ଓ ତାଙ୍କୁ ଦଳର ସାଧାରଣ ସମ୍ପାଦକ ନିଯୁକ୍ତ କରାଯିବା ସହ ଉତ୍ତରପ୍ରଦେଶର ପୂର୍ବାଞ୍ଚଳ ଦାୟିତ୍ୱ ଦେବା ପରିପ୍ରେକ୍ଷୀରେ ଶାହା ଏକଥା କହିଛନ୍ତି । ସହିଦ ଭୂମି ଭାବେ ପରିଚିତ ହିମାଚଳ ପ୍ରଦେଶର ହମିରପୁରଠାରେ ଆୟୋଜିତ ବିଜେପି କାର୍ଯ୍ୟକର୍ତ୍ତା ସମ୍ମିଳନୀରେ ଉଦ୍‌ବୋଧନ ଦେଇ ଶାହ କହିଲେ ଯେ ଓଆରଓପି ଲାଗୁ କରିବା ଲାଗି ପୂର୍ବତନ ସୈନିକମାନେ ବହୁଦିନ ହେଲା ଦାବି କରିଆସୁଥିଲେ । ଗତ ୭୦ ବର୍ଷ ହେଲା ସେମାନଙ୍କ ଦାବି ପ୍ରତି କେହି କର୍ଣ୍ଣପାତ କରୁନଥିଲେ । ବାସ୍ତବରେ କେନ୍ଦ୍ରରେ ନରେନ୍ଦ୍ର ମୋଦିଙ୍କ ନେତୃତ୍ୱରେ ସରକାର କ୍ଷମତାକୁ ଆସିବା ପରେ ଓଆରଓପି ଲାଗୁ କରିଛନ୍ତି ।