୩୦ ବର୍ଷ ପରେ ଚଳିତ ବର୍ଷ ପ୍ରଥମ ଥର ପାଇଁ ବିନା ହୋଷ୍ଟରେ ଅନୁଷ୍ଠିତ ହେବ ଓସ୍କାର ଆୱାର୍ଡ ଉତ୍ସବ
ଚଳିତ ବର୍ଷର ଓସ୍କାର ଆୱାର୍ଡ ଉତ୍ସବକୁ ପ୍ରଥମେ ହଲିଉଡର କମେଡିଆନ କେଭିନ ହାର୍ଟ ହୋଷ୍ଟ କରିବେ ବୋଲି ନିଷ୍ପତ୍ତି ହୋଇଥିଲା । କିନ୍ତୁ କେଭିନଙ୍କ ଏକ ଟୁଇଟ ବିବାଦୀୟ ହେବାପରେ ସେ ଏଥିରୁ ଓହରିଯାଇଛନ୍ତି । କେଭିନ ନିଜେ ହୋଷ୍ଟ କରିବା ପାଇଁ ମନା କରିଦେଇଛନ୍ତି । ଫଳରେ ଚଳିତବର୍ଷ ୯୧ତମ ଓସ୍କାର ଆୱାର୍ଡ ସେରିମନିରେ କେହି ହୋଷ୍ଟ କରିବେ ନାହିଁ। ପରଂପରାଗତ ଭାବେ ଆୱାର୍ଡ ସେରିମନିକୁ ଜଣେ ସେଲିବ୍ରିଟି ହୋଷ୍ଟ କରନ୍ତି। କିନ୍ତୁ ଏଥର ବିଭିନ୍ନ ବିଭାଗ ପାଇଁ ଅଲଗା ଅଲଗା ସେଲିବ୍ରିଟିଙ୍କ ଦ୍ୱାରା ଆୱାର୍ଡ ଦିଆଯିବ। ଗତ ୩୦ ବର୍ଷ ମଧ୍ୟରେ ପ୍ରଥମ ଥର ପାଇଁ ଓସ୍କାର ଆୱାର୍ଡ ସେରିମନିରେ କେହି ହୋଷ୍ଟ କରିବ ନାହିଁ। ଆସନ୍ତା ଫେବୃଆରୀ ମାସ ୨୪ ତାରିଖରେ (ଭାରତୀୟ ସମୟ ଅନୁସାରେ ଫେବୃଆରୀ ୨୫ ତାରିଖ ସକାଳ ୬:୩୦) ହଲିଉଡ ଡଲ୍ବି ଥିଏଟରରେ ସେରିମନି ପାଳନ ହେବ।
ଓସ୍କାର ଆୱାର୍ଡସେରିମନି ୧୯୨୯ ମସିହାରେ ପ୍ରଥମେ ଆରମ୍ଭ ହୋଇଥିଲା। ଇତିମଧ୍ୟରେ ୧୯୩୯, ୧୯୬୯, ୧୯୭୦, ୧୯୭୧ ଏବଂ ୧୯୮୯ ମସିହାରେ ଓସ୍କାର ଆୱାର୍ଡ ସେରିମନି ବିନା ହୋଷ୍ଟ ଅନୁଷ୍ଠିତ ହୋଇଛି। ତେବେ ଏହା ଦ୍ବାରା ଅର୍ଗାନାଇଜର୍ସଙ୍କ ପାଇଁ ଆୱାର୍ଡ ପ୍ରେଜେଣ୍ଟ କରିବା କଷ୍ଟକର ହୋଇଥାଏ।
କମେଡିଆନ କେଭିନ ହାର୍ଟ ଏହି ବର୍ଷ ସେରିମନି ହୋଷ୍ଟ କରିଥାନ୍ତେ। କିନ୍ତୁ କେଭିନଙ୍କୁ ହୋଷ୍ଟ ପାଇଁ ବଛା ଯିବା ପରେ ବିବାଦରେ ଥିବା ଟୁଇଟ୍ସ ଭାଇରାଲ ହୋଇଥିଲା। ଏହି ଟୁଇଟରେ ସେ ସମଲିଂଗୀଙ୍କ ସମ୍ପର୍କରେ ପ୍ରତିକୂଳ ମନ୍ତବ୍ୟ ପ୍ରଦାନ କରିଥିଲେ । ଅବଶ୍ୟ ତାଙ୍କର ଏହି ଟୁଇଟଟି ବହୁ ବର୍ଷ ପୁରୁଣା । ତଥାପି ଏହାକୁ ନେଇ କେଭିନଙ୍କ ବିଷୟରେ ଜୋରସୋର ଆଲୋଚନା ହୋଇଥିଲା। ଓସ୍କାର ଆୱାର୍ଡ ଆୟୋକମାନେ କେଭିନଙ୍କୁ ନିଜ ଟୁଇଟ୍ସ ପାଇଁ କ୍ଷମା ମାଗିବାକୁ କହିଥିଲେ। କେଭିନ କ୍ଷମା ମାଗିବେନି ଓ ହୋଷ୍ଟ ମଧ୍ୟ କରିବେନି ବୋଲି କହିଥିଲେ।
