କଟକ, ୦୮/୦୮: ସ୍ପେସାଲ୍ ଓଟିଇଟି ପ୍ରଶ୍ନ ଲିକ୍ ଘଟଣା। ବୋର୍ଡର ପୂର୍ବତନ ଉପସଭାପତି ଡ. ନିହାର ରଞ୍ଜନ ମହାନ୍ତି ଓ ଚୋରିର କିଙ୍ଗ୍ପିନ୍ ବୋର୍ଡର ଡାଟା ଏଣ୍ଟ୍ରି ଅପରେଟର୍ ଜିତନ ମହାରଣାଙ୍କ ଯୋଡ଼ି ସମ୍ପର୍କରେ କ୍ରାଇମ୍ବ୍ରାଞ୍ଚକୁ ଆଉ କିଛି ଗୁପ୍ତ ତଥ୍ୟ ମିଳିଛି । ନିହାରଙ୍କ ଲାପ୍ଟପ୍ରୁ ଯୋଜନାବଦ୍ଧ ଭାବେ ପ୍ରଶ୍ନ ଚୋରି କରିବ। ତାକୁ ନେଇ ଜିତନ୍ ତାକୁ ମୋଟା ଅଙ୍କରେ ବିକ୍ରି କରିବା ଘଟଣା ପଛରେ ବଡ଼ ଷଡ଼ଯନ୍ତ୍ର ରହିଛି ବୋଲି ତଦନ୍ତକାରୀ ଅଧିକାରୀ କହିଛନ୍ତି । ଏଣୁ ନିହାର-ଜିତନ ଯୋଡ଼ିଙ୍କ କଳା କାରନାମାରେ ଆଉ କେଉଁମାନେ ସାମିଲ୍ ଅଛନ୍ତି ତାହା ଜାଣିବା ପାଇଁ କ୍ରାଇମବ୍ରାଞ୍ଚ ଛାନ୍ଭିନ୍ ଚଳାଇଛି ।
ଗତ ୩୦ ତାରିଖରୁ ବିଚାର ବିଭାଗୀୟ ହାଜତରେ ଥିବା ଜିତନ୍ ଓ ରାୟଗଡ଼ା ଜିଲ୍ଲାର ଏକ୍ସକ୍ୟାଡର୍ ଶିକ୍ଷକ ସଂଘ ନେତା ଆମ୍ବଦୋଳା କୋମାସାହି ଅଞ୍ଚଳର ବିଜୟ କୁମାର ମିଶ୍ରଙ୍କୁ ରିମାଣ୍ଡ୍ରେ ଆଣିବାକୁ ଗୁରୁବାର କୋର୍ଟ ଅନୁମତି ଦେଇଛନ୍ତି । ଏଥିପାଇଁ କଟକ ଜେଏମ୍ଏଫ୍ସି-୩ କୋର୍ଟରେ ରିମାଣ୍ଡ୍ ଆବେଦନ କରାଯାଇଥିଲା । ଉଭୟଙ୍କୁ ଦୁଇ ଦିନ ଲାଗି ରିମାଣ୍ଡ୍ରେ ଆଣିବାକୁ ଅନୁମତି ମିଳିଛି । କ୍ରାଇମ୍ବ୍ରାଞ୍ଚ୍ ଦୁଇ ଅଭିଯୁକ୍ତଙ୍କୁ ଆସନ୍ତା ସୋମବାରଠୁ ଦୁଇଦିନିଆ ରିମାଣ୍ଡରେ ଆଣି ଜେରା କରିବ । ରିମାଣ୍ଡ୍ ଅବଧି ମଧ୍ୟରେ ସେମାନଙ୍କ ସହ ପ୍ରଶ୍ନ କିଣାବିକାରେ ଆଉ କେଉଁମାନେ ସାମିଲ୍ ଅଛନ୍ତି ତାହା ଖୋଜି ବାହାର କରିବ କ୍ରାଇମ୍ବ୍ରାଞ୍ଚ୍ । ସେହିପରି ପ୍ରଶ୍ନ ଲିକ୍ରେ ଜଡ଼ିତ ଆର୍ଥିକ କାରବାର ଓ ଅନ୍ୟମାନଙ୍କ ସମ୍ପୃକ୍ତିର ତଥ୍ୟ ପ୍ରମାଣ ଯୋଗାଡ଼ କରାଯିବ ବୋଲି କ୍ରାଇମ୍ବ୍ରାଞ୍ଚ୍ ଅଧିକାରୀ କହିଛନ୍ତି ।
ଅନ୍ୟପକ୍ଷରେ ନିହାର ଜେଲ୍ ଯିବା ପୂର୍ବରୁ ତଦନ୍ତକାରୀ ଅଧିକାରୀ ତାଙ୍କ ବୟାନ ରେକର୍ଡ କରିଥିଲେ । ବୟାନର ଭିଡିଓ ରେକର୍ଡିଂ ରହିଛି । ଜିତନ ବାବଦରେ ନିହାର ଅନେକ କଥା କ୍ରାଇମ୍ବ୍ରାଞ୍ଚ୍କୁ କହିଛନ୍ତି । ଜିତନ ବୋର୍ଡର ପରୀକ୍ଷା ପରିଚାଳନା ବ୍ୟବସ୍ଥାରେ ପୂର୍ବରୁ କିପରି ଗୋଳମାଳ କରିଥିଲା, ସ୍ପେସାଲ୍ ଓଟିଇଟିରେ ବି କିପରି ବିଶ୍ୱାସଘାତକତା କରିଛି ତାହା ନିହାର ବୟାନରେ କହିଥିଲେ । ବାସ୍ତବରେ ନିହାର କେତେ ସତ କହିଛନ୍ତି ତାହା ଜିତନର ରିମାଣ୍ଡ୍ ଅବଧି ସମୟରେ ଜେରା ବେଳେ ଜଣାପଡ଼ିବ । ଜିତନ ବିରୋଧରେ ନିହାର ଅନେକ ତଥ୍ୟ କ୍ରାଇମ୍ବ୍ରାଞ୍ଚ୍କୁ ଦେଇଥିବା ବେଳେ ଦୁଇ ଜଣଙ୍କ ମଧ୍ୟରେ ଅହରହ ମୋବାଇଲ୍ କଥୋପକଥନର ରେକର୍ଡ ଥିବାରୁ ଏହା ପଛରେ ଆଉ କିଛି ରହସ୍ୟ ଥିବା କ୍ରାଇମ୍ବ୍ରାଞ୍ଚ ଅନୁମାନ କରୁଛି ।
ଜିତନ୍ଠାରୁ ପ୍ରଶ୍ନ ନେବା ବାବଦରେ ଅଢ଼େଇ ଲକ୍ଷ ଟଙ୍କା ବିଜୟ ମିଶ୍ର ଫୋନ୍ ପେ’ରେ ପଠାଇଥିଲେ । ଏ କାରବାରରେ ଆହୁରି ଲକ୍ଷାଧିକ ଟଙ୍କା ନଗଦ ଦେଣନେଣ ହୋଇଥିବା ଜଣାପଡ଼ିଛି । ତେଣୁ ବିଜୟଙ୍କୁ ରିମାଣ୍ଡ୍ରେ ଅଣାଯାଉଛି । ବିଜୟ ଅଢ଼େଇ ଲକ୍ଷ ଟଙ୍କା ଜିତନର ପତ୍ନୀଙ୍କ ଫୋନ୍ ପେ’କୁ ପଠାଇଥିବା ଓ ରାୟଗଡ଼ା, କୋରାପୁଟ ଅଞ୍ଚଳର ଶିକ୍ଷକ ସଂଘ ନେତାଙ୍କୁ ପ୍ରଶ୍ନ ବିକ୍ରି କରିଥିବା କଥା ୧୦ରୁ ଅଧିକ ଶିକ୍ଷକ କ୍ରାଇମ୍ବ୍ରାଞ୍ଚ୍କୁ ସୂଚନା ଦେଇଛନ୍ତି । ଜିତନ୍ ଓ ବିଜୟଙ୍କୁ ମୁହାଁମୁହିଁ ଜେରା କରି ସେମାନଙ୍କଠାରୁ ନିହାରଙ୍କ ସିଣ୍ଡିକେଟ୍ ବାବଦରେ ଗୁରୁତ୍ୱପୂର୍ଣ୍ଣ ତଥ୍ୟ ଆଦାୟ କରିବାକୁ ତଦନ୍ତକାରୀ ଅଧିକାରୀ ଆଶା ରଖିଛନ୍ତି । ଗୁରୁବାର କ୍ରାଇମ୍ବ୍ରାଞ୍ଚ୍ ଆଉ ଦୁଇ ଜଣ ଶିକ୍ଷକଙ୍କୁ ଜେରା କରି ଛାଡ଼ିଥିବାର ସୂଚନା ମିଳିଛି । ସମ୍ପୃକ୍ତ ଶିକ୍ଷକ ଦ୍ୱୟ ପ୍ରଶ୍ନକୁ କିପରି ହାତେଇଥିଲେ ଏବଂ ସେମାନଙ୍କୁ ପ୍ରଶ୍ନ ମିଳିବା ସମ୍ପର୍କରେ ପ୍ରଥମେ କିଏ ସୂଚନା ଦେଇଥିଲା ସେ ବାବଦରେ ବହୁ ସତ ମାନିଛନ୍ତି ।
