ମଞ୍ଚେଶ୍ୱର,୨୧/୬ : ରାଜଧାନୀବାସୀଙ୍କ ଗମନାଗମନକୁ ସୁଗମ କରିବା ନିମନ୍ତେ ରାଜ୍ୟ ସରକାର ଆମ ବସ୍ ସେବା ଆରମ୍ଭ କରିଥିଲେ । ଲକ୍ଷ୍ୟ ଥିଲା ଲୋକେ ସୁବିଧାରେ ଯାତାୟାତ କରିବେ । ଲୋକେ ଏହାର ଫାଇଦା ପାଉଛନ୍ତି ସତ । କିନ୍ତୁ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ହୋଇଥିବା ଆମ ବସ୍ ଷ୍ଟାଣ୍ଡ କାମରେ ଆସୁନି । ବସ ଷ୍ଟାଣ୍ଡଟି ଯେଉଁ ସ୍ଥାନରେ ନିର୍ମାଣ ହୋଇଛି ସେଠାରେ ଲୋକ ହେଉନଥିବାରୁ ବସ୍ ସେଠାରେ ରହୁନାହିଁ । ହେଲେ ଯେଉଁଠି ଲୋକ ଛିଡା ହେଉଛନ୍ତି, ସେଠାରେ ବସ୍ଷ୍ଟାଣ୍ଡ ନାହିଁ । ଯାତ୍ରୀ ବସ୍କୁ ଅପେକ୍ଷା କରି କେତେବେଳେ ଖରାରେ ସିଝୁଛନ୍ତି ତ କେତେବେଳେ ବର୍ଷାରେ ଭିଜୁଛନ୍ତି।
ମଞ୍ଚେଶ୍ୱର ଶିଳ୍ପାଞ୍ଚଳ ଏଆରଏସ୍ଏସ୍ ନିକଟରେ ଏମିତି ଦୃଶ୍ୟ ଦେଖିବାକୁ ମିଳୁଛି । ଚକେଇସିହାଣୀ ମଞ୍ଚେଶ୍ୱର ଦେଇ ଯଦୁପୁରକୁ ୨୬ ନଂ ଆମ ବସ୍ ଚଳାଚଳ କରୁଛି । କିନ୍ତୁ ଏଠାରେ ଏକ ବିଚିତ୍ର ଚିତ୍ର ଦେଖିବାକୁ ମିଳିଛି । ବସ୍ ରହଣୀ ସ୍ଥାନ ଠାରୁ ପ୍ରାୟ ୩୦୦ ମିଟର ଦୂରରେ ରହିଛି ଆମ ବସ୍ ଷ୍ଟାଣ୍ଡ । ଯାହା ଫଳରେ ଲୋକେ ଗଛ ମୂଳେ ଛିଡାହୋଇ ବସ୍କୁ ଅପେକ୍ଷା କରୁଛନ୍ତି । ଖରାବେଳେ ଯାହା ଯେମିତି କଷ୍ଟେମଷ୍ଟେ ଚଳି ଯାଉଛି । ବର୍ଷା ହେଲେ ଓଦା ହୋଇ ଲୋକେ ସେଠାରେ ବସରେ ଯିବା ପାଇଁ ଠିଆ ହେଉଛନ୍ତି । ଅନ୍ୟପଟେ ଲକ୍ଷ ଲକ୍ଷ ଟଙ୍କା ବ୍ୟୟରେ ଏଆରଏସଏସ୍ ନିକଟରେ ନିର୍ମାଣ ହୋଇଥିବା ଆମ ବସ ଷ୍ଟାଣ୍ଡ କାମରେ ଆସୁନି । ସମାନ ଅବସ୍ଥା ଭିଏସ୍ଏସ୍ ନଗର ଅଞ୍ଚଳରେ ଦେଖିବାକୁ ମିଳୁଛି ।
ପ୍ରାରମ୍ଭିକ ପର୍ଯ୍ୟାୟରେ ରୁଟ୍ ନଂ ୨୫ ଆମ ବସ୍ ସେବା ଏହି ଠାରୁ ଆରମ୍ଭ ହୋଇଥିଲା । କିନ୍ତୁ ଏଠାରେ ଏଯାଏଁ ଆମ ବସ୍ ଷ୍ଟାଣ୍ଡ ବ୍ୟବସ୍ଥା ନାହିଁ । ଏଥିପାଇଁ ଗନ୍ତବ୍ୟସ୍ଥଳକୁ ଯିବା ପାଇଁ ଯାତ୍ରୀ କେଉଁ ଦୋକାନରେ ଛିଡା ହେଉଛନ୍ତି କିମ୍ବା ଗଛ ମୂଳ ଖୋଜୁଛନ୍ତି । ବସ ଷ୍ଟାଣ୍ଡ ପାଇଁ ଅନେକ ଥର ଦାବି ହୋଇଛି । ମାତ୍ର ଆଜି ପର୍ଯ୍ୟନ୍ତ ଏହି ଦାବି ପୂରଣ ହୋଇପାରିନି । ଏନେଇ ଚକେଇସିହାଣୀ ବାସିନ୍ଦା ସୌମ୍ୟରଞ୍ଜନ ପଣ୍ଡା କହିଛନ୍ତି, ଆମକୁ ଖରା ବର୍ଷାରେ ଗଛ ମୂଳେ ଅପେକ୍ଷା କରିବାକୁ ପଡୁଛି । ଲୋକେ ଛିଡା ହେଉଥିବା ସ୍ଥାନରେ ବସଷ୍ଟାଣ୍ଡ ଆବଶ୍ୟକ । ଭିଏସ୍ଏସ୍ ନଗରରେ ରହୁଥିବା ସନ୍ତୋଷ ମିଶ୍ର କହିଛନ୍ତି, ବସ୍ ଷ୍ଟାଣ୍ଡ ନଥିବାରୁ ଅନେକ ସମୟରେ ଆମେ ଅପେକ୍ଷା କରି କରି ଅଟୋରେ ଚାଲି ଯାଉଛୁ । ବସ୍ ଷ୍ଟାଣ୍ଡ ଥିଲେ ସେଠାରେ ବସି ଅପେକ୍ଷା କରିପାରନ୍ତୁ ।
