ନୂଆଦିଲ୍ଲୀ: ପାକିସ୍ତାନ ପ୍ରତିଦିନ ଏପରି କିଛି ଘଟଣାକୁ ସାମ୍ନା କରୁଛି, ଯାହା ଯୋଗୁଁ ପାକିସ୍ତାନର ନାମ ଦିନକୁ ଦିନ ବଦନାମ ହେବାରେ ଲାଗିଛି। ବର୍ତ୍ତମାନ ଏକ ସଦ୍ୟତମ ମାମଲାରେ, ପାକିସ୍ତାନର ଏକ ଜେଲରୁ ୨୧୬ ଜଣ କଏଦୀ ଖସି ପଳାଇଛନ୍ତି। ପ୍ରକୃତରେ, ଭୂମିକମ୍ପ ପରେ, କଏଦୀମାନଙ୍କୁ ବାରାକରୁ ବାହାରକୁ ନିଆଯାଉଥିଲା। ବିପର୍ଯ୍ୟୟ ସମୟର ସୁଯୋଗ ପାଇ ୨୧୬ କଏଦୀ ଜେଲରୁ ଖସି ପଳାଇଛନ୍ତି।ତେବେ ପଳାୟନ କରିଥିବା କଏଦୀଙ୍କ ମଧ୍ୟରୁ ୮୦ ଜଣଙ୍କୁ ପୁଣି ଧରାଯାଇଛି। ବାକି ମାନଙ୍କୁ ଖୋଜା ଚାଲିଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ପାକିସ୍ତାନର କରାଚୀରେ ଭୂମିକମ୍ପର ଅନେକ ଝଟକା ଲାଗିଛି । କରାଚୀର ମାଲିର ଜେଲ ସୁପରିଣ୍ଟେଣ୍ଡେଣ୍ଟ ଅର୍ଶଦ ଶାହ କହିଛନ୍ତି ଯେ, ସୋମବାର ରାତିରେ ଭୂମିକମ୍ପ ମଧ୍ୟରେ ୬ ଶହ କଏଦୀଙ୍କୁ ଜେଲ ବାରାକରୁ ବାହାରକୁ ନିଆଯାଇଥିଲା। ଏହି ସମୟରେ୨୧୬ କଏଦୀ ଦଳାଚକଟାର ସୁଯୋଗ ନେଇ ଖସି ପଳାଇଛନ୍ତି। ଏହି ଦଳାଚକଟାରେ ଜଣେ କଏଦୀଙ୍କ ମୃତ୍ୟୁ ଘଟିଛି ଏବଂ ତିନି ଜଣ ସୁରକ୍ଷା କର୍ମୀ ଏବଂ ଜଣେ ଜେଲ କର୍ମଚାରୀ ଆହତ ହୋଇଛନ୍ତି। ଅର୍ଶଦ ଶାହ କହିଛନ୍ତି ଯେ, ପଳାୟନ କରିଥିବା କଏଦୀଙ୍କ ମଧ୍ୟରୁ ୮୦ ଜଣଙ୍କୁ ପୁଣିଥରେ ଧରାଯାଇଛି । ଏହି ଘଟଣାରେ ଏବେ ବି ୧୩୫ କଏଦୀ ଫେରାର୍ ଅଛନ୍ତି, ଯାହାଙ୍କ ପାଇଁ ଏକ ସନ୍ଧାନ ଅଭିଯାନ ଚାଲିଛି।
ଫେରାର୍ କଏଦୀ ମାନଙ୍କୁ ଧରିବା ପାଇଁ ପୋଲିସ ଏବଂ ତଦନ୍ତ ଏଜେନ୍ସି ଗୁଡ଼ିକ ଏକ ମିଳିତ ଅଭିଯାନ ଆରମ୍ଭ କରିଛନ୍ତି। ସିନ୍ଧ ଗୃହମନ୍ତ୍ରୀ ସ୍ୱୀକାର କରିଛନ୍ତି ଯେ ଏହା ଗତ କିଛି ବର୍ଷ ମଧ୍ୟରେ ସବୁଠାରୁ ବଡ଼ ଜେଲ୍ ଭାଙ୍ଗିବା ଘଟଣା। ଘଟଣାର ତଦନ୍ତ ପାଇଁ ଏକ ତଦନ୍ତ କମିଟି ଗଠନ କରାଯାଇଛି, ଯାହା ଏହି ଅବହେଳାର ତଦନ୍ତ କରିବ। ମାଲିର ଜେଲରେ ୬୦୦୦ ରୁ ଅଧିକ କଏଦୀ ବନ୍ଦୀ ଅଛନ୍ତି ଏବଂ ସେମାନଙ୍କ ମଧ୍ୟରୁ ଅଧିକାଂଶ ଡ୍ରଗ୍ସ ଚୋରା ଚାଲାଣ ଅଭିଯୋଗରେ ଜେଲରେ ଅଛନ୍ତି। ସୂଚନାଥାଉକି ରବିବାର ଠାରୁ କରାଚୀରେ ୧୬ ଥର ଭୂମିକମ୍ପ ହୋଇଛି।
