ନୂଆଦିଲ୍ଲୀ: ପାକିସ୍ତାନ ଏହାର ପ୍ରତିଛବିକୁ ଉନ୍ନତ କରିବା ପାଇଁ ପ୍ରାଚୀନ ହିନ୍ଦୁ ଏବଂ ଶିଖ ଐତିହ୍ୟ ସହିତ ଜଡିତ ଐତିହାସିକ ସ୍ଥାନ ଗୁଡ଼ିକର ନାମ ପୁନରୁଦ୍ଧାର କରିବା ବିଷୟରେ ଚିନ୍ତା କରୁଛି । ଏଥି ସହ ଧାର୍ମିକ ଐତିହ୍ୟର ସୁରକ୍ଷା ବିଷୟରେ ନିରନ୍ତର ପ୍ରଶ୍ନର ସମ୍ମୁଖୀନ ହେଉଛି। ଏବେ ରିପୋର୍ଟ ଆସୁଛି ଯେ ପାକିସ୍ତାନର ଫାରୁକାବାଦର ଗୁରୁଦ୍ୱାର ସଚ୍ଚା ସୌଦା ନିକଟରେ ଅବସ୍ଥିତ ପ୍ରାୟ ୧୨୫ ବର୍ଷ ପୁରୁଣା ଗୁରୁଦ୍ୱାର ସିଂହ ସଭାକୁ ଭାଙ୍ଗି ଦିଆଯାଇଛି। ଏହା ଗୁରୁଦ୍ୱାର ସଚ୍ଚା ସୌଦା ନିକଟରେ ଅବସ୍ଥିତ ଏବଂ ଶିଖ ସମ୍ପ୍ରଦାୟ ପାଇଁ ଏକ ଗୁରୁତ୍ୱପୂର୍ଣ୍ଣ ଧାର୍ମିକ ଏବଂ ଐତିହାସିକ ସ୍ଥଳ ଭାବରେ ବିବେଚନା କରାଯାଉଥିଲା।
ସୋସିଆଲ ମିଡିଆରେ ପ୍ରସାରିତ ଭିଡିଓ ଏବଂ ଫଟୋ ଗୁଡ଼ିକ ଦାବି କରୁଛି ଯେ, ପ୍ରଥମେ ଗୁରୁଦ୍ୱାରର ଗମ୍ବୁଜକୁ ହଟାଯାଇଥିଲା, ଏବଂ ତା'ପରେ ସମ୍ପୂର୍ଣ୍ଣ କୋଠାକୁ ଭାଙ୍ଗି ଦିଆଯାଇଥିଲା। ଦାବି କରାଯାଉଛି ଯେ, ଏହି ପ୍ରସଙ୍ଗ ପୂର୍ବରୁ ସମ୍ପୃକ୍ତ କର୍ତ୍ତୃପକ୍ଷଙ୍କ ଦୃଷ୍ଟିକୁ ଅଣାଯାଇଥିଲା, କିନ୍ତୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିଲା। ଘଟଣା ବିଷୟରେ ସୂଚନା ପାଇବା ପରେ, ପାକିସ୍ତାନ ଶିଖ ଗୁରୁଦ୍ୱାର ପ୍ରବନ୍ଧକ କମିଟି (PSGPC) ଏବଂ ଆଖପାଖ ଅଞ୍ଚଳର ଶିଖ ଭକ୍ତଙ୍କ ଏକ ଗୋଷ୍ଠୀ ଘଟଣାସ୍ଥଳକୁ ପହଞ୍ଚିଥିଲେ। କିନ୍ତୁ, ପୋଲିସ ଉପସ୍ଥିତି ସତ୍ତ୍ୱେ, ଭକ୍ତ ମାନଙ୍କୁ ଗୁରୁଦ୍ୱାର ପରିସରରେ ପ୍ରବେଶ କରିବାକୁ ଦିଆଯାଇ ନଥିଲା। ସେମାନେ ବାହାରେ ପ୍ରାର୍ଥନା କରି ପ୍ରତିବାଦ କରିଥିଲେ।
ହିନ୍ଦୁ ନାମ ପୁନରୁଦ୍ଧାରର ନାଟକ ଶେଷ ହୋଇଛି…
ଏହି ଘଟଣା ପରେ, ସୋସିଆଲ ମିଡିଆରେ ଲୋକ ମାନେ ଧାର୍ମିକ ସ୍ଥଳ ଗୁଡ଼ିକରେ ପାକିସ୍ତାନ ସରକାରଙ୍କ ସୁରକ୍ଷା ଉପରେ ପ୍ରଶ୍ନ ଉଠାଇ ନିରପେକ୍ଷ ତଦନ୍ତ ଦାବି କରିଛନ୍ତି। ବର୍ତ୍ତମାନ, ଏହି ବିଷୟରେ ପାକିସ୍ତାନ ସରକାରଙ୍କ ପକ୍ଷରୁ କୌଣସି ବିସ୍ତୃତ ସରକାରୀ ପ୍ରତିକ୍ରିୟା ମିଳିନାହିଁ। ଏହି ସମୟରେ, ସୋସିଆଲ ମିଡିଆରେ ଲୋକ ମାନେ ଦାବି କରୁଛନ୍ତି ଯେ, ଯଦି ଗୁରୁଦ୍ୱାର ପ୍ରକୃତରେ ଭାଙ୍ଗି ଦିଆଯାଇଛି, ତେବେ ଦାୟୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ଏବଂ ପାକିସ୍ତାନରେ ହିନ୍ଦୁ, ଶିଖ ଏବଂ ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟର ଧାର୍ମିକ ଏବଂ ଐତିହାସିକ ଐତିହ୍ୟକୁ ପ୍ରଭାବଶାଳୀ ଭାବରେ ସୁରକ୍ଷିତ କରାଯାଉ। ସମ୍ପ୍ରତି, ପାକିସ୍ତାନ ଅନେକ ସହର ଏବଂ ସ୍ଥାନର ପୁରୁଣା ଐତିହାସିକ ନାମ ପୁନଃ ଗ୍ରହଣ କିମ୍ବା ପୁନଃପ୍ରତିଷ୍ଠା ବିଷୟରେ ଆଲୋଚନା କରିବା ଭଳି ପଦକ୍ଷେପ ନେଇଛି। ରାସ୍ତା ଏବଂ କୋଠା ଗୁଡ଼ିକର ପୁରୁଣା ହିନ୍ଦୁ ନାମ ପୁନରୁଦ୍ଧାର କରାଯାଇଥିଲା। କେତେକ ଏହି ପଦକ୍ଷେପ ଗୁଡ଼ିକୁ ସାଂସ୍କୃତିକ ଐତିହ୍ୟକୁ ସମ୍ମାନ ଦେବାର ପ୍ରୟାସ ଭାବରେ ବର୍ଣ୍ଣନା କରିଛନ୍ତି, କିନ୍ତୁ ସମାଲୋଚକ ମାନେ କହିଛନ୍ତି ଯେ ଯଦି ଧାର୍ମିକ ଏବଂ ଐତିହାସିକ ସ୍ଥଳ ଗୁଡ଼ିକର ସୁରକ୍ଷା ସୁନିଶ୍ଚିତ କରାନଯାଏ, ତେବେ ଏପରି ପ୍ରୟାସ କେବଳ ପ୍ରତୀକାତ୍ମକ ଭାବରେ ରହିଯିବ।
