କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କଲେ କାମରାନ ଆକମଲ, ୨୦୧୭ ପରଠୁ ମିଳୁନଥିଲା ସୁଯୋଗ
ଇସଲାମାବାଦ ୦୭/ ୦୨: ପାକିସ୍ତାନର ଓ୍ବିକେଟ କିପର୍ ବ୍ୟାଟର୍ କାମରାନ୍ ଆକମଲ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି । ମଙ୍ଗଳବାର ଏ ନେଇ ଆକମଲ ଜଣାଇଛନ୍ତି । ଲମ୍ବା ସମୟ ଧରି କାମରାନ ଆକମଲଙ୍କୁ ଦଳରୁ ବାଦ୍ ଦିଆଯାଇଥିଲା । କିନ୍ତୁ ପାକିସ୍ତାନ ସୁପର ଲିଗ୍ ସମେତ ଅନ୍ୟାନ୍ୟ ଲିଗ୍ ମ୍ୟାଚ ଖେଳୁଥିଲେ । ଏବେ ସେ ଅନ୍ତର୍ଜାତୀୟ କ୍ରିକେଟ ସମେତ ସମସ୍ତ ଫର୍ମାଟକୁ ଅଲବିଦା କହିଛନ୍ତି ।
୨୦୦୨ ମସିହା ନଭେମ୍ବର ମାସରେ ଟେଷ୍ଟ ଜରିଆରେ ଡେବ୍ୟୁ କରିଥିଲେ କାମରାନ ଆକମଲ । ୨୦୧୦ରେ ଇଂଲଣ୍ଡ ବିପକ୍ଷ ମ୍ୟାଚ୍ ଥିଲା ତାଙ୍କର ଶେଷ ମୁକାବିଲା । ୨୦୦୨ ନଭେମ୍ବର ୨୩ ତାରିଖରେ ଜିମ୍ବାଓ୍ବେ ବିପକ୍ଷରେ ଦିନିକିଆ କ୍ୟାରିୟର ଆରମ୍ଭ କରିଥିଲେ । ସେହିଭଳି ଆକମଲଙ୍କ ଟ୍ବେଣ୍ଟି ଟ୍ବେଣ୍ଟି କ୍ୟାରିୟର କଥା କହିବାକୁ ଗଲେ ସେ ୨୦୦୬ ଅଗଷ୍ଟ ୨୮ ତାରିଖରେ ଇଂଲଣ୍ଡ ବିପକ୍ଷରେ ଟି-୨୦ ଖେଳିବା ଆରମ୍ଭ କରିଥିଲେ । ତାଙ୍କର ଶେଷ ଟି-୨୦ ଥିଲା ୨୦୧୭ ଏପ୍ରିଲ୍ ୨ ତାରିଖରେ ଯାହାକି ଓ୍ବେଷ୍ଟଇଣ୍ଡିଜ ବିପକ୍ଷରେ ଖେଳାଯାଇଥିଲା ।
ପାକିସ୍ତାନୀ ଓ୍ବିକେଟ୍ କିପର ବ୍ୟାଟର୍ କାମରାନ ଆକମଲ ୨୦୧୭ ମସିହାରୁ ହିଁ ଦଳରୁ ବାଦ୍ ପଡିଥିଲେ । ସେ ଦଳ ପକ୍ଷରୁ ମୋଟ ୫୩ଟି ଟେଷ୍ଟ ମ୍ୟାଚ୍ ଖେଳିଥିବା ବେଳେ ୬ଟି ଶତକ ଏବଂ ୧୨ଟି ଅର୍ଦ୍ଧଶତକ ସହାୟତାରେ ୨୬୪୮ ରନ କରିଥିଲେ । ସେହିଭଳି ଦିନିକିଆରେ ୧୫୭ଟି ମ୍ୟାଚ୍ ଖେଳି ୫ ଶତକ ଓ ୧୦ ଅର୍ଦ୍ଧଶତକ ସହ ୩୨୩୬ ରନ ଓ ଟ୍ବେଣ୍ଟି ଟ୍ବେଣ୍ଟିରେ ୫୮ଟି ମ୍ୟାଚ୍ରୁ ୫ଟି ଅର୍ଦ୍ଧଶତକ ଶତକ ସହ ୯୮୭ ରନ କରିଥିଲେ କାମରାନ ଆକମଲ ।
ପଢନ୍ତୁ ଏହି ଖବର: ବିବାହ ବନ୍ଧନରେ ବାନ୍ଧିହେଲେ ସିଦ୍ଧାର୍ଥ ଓ କିଆରା, ସୂର୍ଯ୍ୟଗଡ ପ୍ୟାଲେସ୍ରେ ହେଲା ବାହାଘର
