ନୂଆଦିଲ୍ଲୀ,୨୪।୫: ଲଗାତାର ଦେଶଦ୍ରୋହୀଙ୍କ ତାଲିକା ଲମ୍ବା ହେବାରେ ଲାଗିଛି। ଏବେ ଏହି ଲିଷ୍ଟରେ ଗୁଜରାଟର ସହଦେବ ସିଂହ ଗୋହିଲର ନାଁ ମଧ୍ୟ ସାମିଲ କରାଯାଇଛି। ସହଦେବ ଉପରେ ବିଏସ୍ଏଫ୍ ଓ ଭାରତୀୟ ବାୟୁସେନା ସମ୍ପର୍କୀତ ସମ୍ବେଦନଶୀଳ ଡାଟା ପାକିସ୍ତାନକୁ ପଠାଇଥିବାର ଅଭିଯୋଗ ରହିଛି। ସହଦେକୁ ଗିରଫ କରାଯାଇଥିବା ନେଇ ଗୁଜରାଟ ଏଟିଏସ୍ ଏସପି ସୂଚନା ଦେଇଛନ୍ତି। ସେ କହିଛନ୍ତି, ଆମକୁ ସୂଚନା ମିଳିଥିଲା ସେ ବିଏସ୍ଏଫ୍ ଓ ଆଇଏଏଫ୍ ସମ୍ପର୍କିତ ସୂଚନା ଜଣେ ପାକିସ୍ତାନୀ ଏଜେଣ୍ଟ ସହ ସେୟାର କରୁଥିଲେ।
ଗୁଜରାଟ ଏସ୍ପି କହିଛନ୍ତି ସହଦେବ ଜଣେ ସ୍ବାସ୍ଥ୍ୟକର୍ମୀ। ୧ ମଇରେ ପ୍ରାରମ୍ଭିକ ଯାଞ୍ଚ ପାଇଁ ଡକାଯାଇଥିଲା। ଯେଉଁଠି ଜଣାପଡିଥିଲା ଯେ, ଜୁନ୍-ଜୁଲାଇ ୨୦୨୩ ରେ ହ୍ବାଟସଆପ୍ରେ ଆଦିତି ଭରଦ୍ବାଜ ନାମକ ଜଣେ ମହିଳାଙ୍କ ସମ୍ପର୍କରେ ଥିଲା। କଥାବାର୍ତ୍ତା ପରେ ଜଣାପହିଥିଲା, ସେ ଜଣେ ପାକିସ୍ତାନୀ ଏଜେଣ୍ଟ। ବିଏସ୍ଏଫ୍ ଓ ଆଇଏଏଫ୍ର ନିର୍ମାଣଧୀନ ସ୍ଥାନର ଫଟୋ ଓ ଭିଡିଓ ମାଗୁଥିଲା। ଏହାପରେ ସେ ହ୍ବାଟସଆପ୍ ଜରିଆରେ ଫଟୋ ଓ ଭିଡିଓ ସେୟାର କରିବା ଆରମ୍ଭ କରିଦେଇଥିଲା ସହଦେବ।
ପୋଲିସର କହିବା ଅନୁସାରେ, ୨୦୨୫ ର ଆରମ୍ଭରେ ସହଦେବ ନିଜର ଆଧାର କାର୍ଡ ବ୍ୟବହାର କରି ଏକ ସିମ୍ କାର୍ଡ କିଣିଥିଲା। ଏହାପରେ ଆଦିତି ଭରଦ୍ବାଜର ବ୍ୟବହାର ପାଇଁ ସେ ନମ୍ବରରେ ହ୍ବାଟସଆପ୍ ଆକାଉଣ୍ଟ ମଧ୍ୟ ଖୋଲିଥିଲା। ଏହାପରେ ସେ ନମ୍ବରରୁ ବିଏସ୍ଏଫ୍ ଓ ଆଇଏଏଫର ନିର୍ମାଣଧୀନ ବିଲ୍ଡିଂର ଫଟୋ-ଭିଡିଓ ସେୟାର କରୁଥିଲା। ପାକିସ୍ତାନର ଏଜେଣ୍ଟ ଏହାକୁ ବ୍ୟବହାର କରୁଥିଲେ। ଏଥିପାଇଁ ସହଦେବ ଜଣେ ଅଜ୍ଞାତ ବ୍ୟକ୍ତିଠାରୁ ୪୦୦୦୦ ଟଙ୍କା ନେଇଥିଲା। କୁହାଯାଉଛି ଯେ, ସେହି ଲୋକ ମଧ୍ୟ ଜଣେ ଗୁପ୍ତଚର। ସହଦେବର ଫୋନ୍ ଏଫ୍ଏସ୍ଏନ୍କୁ ପଠଯାଇଥିଲା। ଆଦିତି ଭରଦ୍ବାଜ ନାମରେ ହ୍ବାଟସଆପ୍ ନମ୍ବର ପାକିସ୍ତାନରୁ ପରିଚାଳିତ କରାଯାଉଥିଲା। ସହଦେବ ଓ ପାକିସ୍ତାନୀ ଏଜେଣ୍ଟଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ କରାଯାଇଛି।
