ନୂଆଦିଲ୍ଲୀ: ପାକିସ୍ତାନରେ ଭୂମିକମ୍ପର ଝଟକା ଅନୁଭୂତ ହୋଇଛି । ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଅନୁଯାୟୀ, ଭାରତୀୟ ସମୟ ଅନୁସାରେ ବୁଧବାର ରାତି ୯.୫୮ରେ ଭୂମିକମ୍ପ ହୋଇଥିଲା । ରିକ୍ଟର ସ୍କେଲରେ ଏହାର ତୀବ୍ରତା ୪.୪  ଥିଲା । ଏପର୍ଯ୍ୟନ୍ତ କୌଣସି କ୍ଷୟକ୍ଷତିର ରିପୋର୍ଟ ମିଳି ନାହିଁ ।  ୪.୪ ତୀବ୍ରତାର ଏକ ଭୂମିକମ୍ପ ମଧ୍ୟମ ବର୍ଗରେ ପ୍ରଭାବ ପକାଇଥାଏ ଏବଂ ଏହା ଦ୍ବାରା ସାଧାରଣତଃ ବଡ଼ କ୍ଷତି ହେବାର ସମ୍ଭାବନା କମ୍ ଥାଏ ।  କିନ୍ତୁ ଏହାର ପ୍ରଭାବ ସମ୍ବେଦନଶୀଳ ଅଞ୍ଚଳରେ ଅନୁଭୂତ ହୋଇପାରେ । 

ବିଶେଷଜ୍ଞମାନେ କହିଛନ୍ତି ଯେ, ପାକିସ୍ତାନ ଏବଂ ଏହାର ଆଖପାଖ ଅଞ୍ଚଳ ଭୂମିକମ୍ପ ପ୍ରତି ବହୁତ ସମ୍ବେଦନଶୀଳ। ଭାରତୀୟ ଏବଂ ୟୁରେସିଆନ୍ ପ୍ଲେଟ୍‌ର ଧକ୍କା ଯୋଗୁଁ ଏଠାରେ ଭୂକମ୍ପ ସ୍ୱାଭାବିକଠାରୁ ଅଧିକ ହୋଇଥାଏ । ଏହି କାରଣରୁ ଆଫଗାନିସ୍ତାନ ଏବଂ ପାକିସ୍ତାନର ସୀମାବର୍ତ୍ତୀ ଅଞ୍ଚଳରେ ସମୟ ସମୟରେ ଭୂମିକମ୍ପ ଅନୁଭୂତ ହେଉଛି । ଗତ କିଛି ବର୍ଷ ମଧ୍ୟରେ ପାକିସ୍ତାନରେ ଅନେକ ଥର ତୀବ୍ର ଭୂମିକମ୍ପ ହୋଇଛି । ଯାହା ଫଳରେ ବହୁତ କ୍ଷତି ସହିଛି ପାକିସ୍ତାନ ।

ଯଦିଓ ଏଥର ଭୂମିକମ୍ପର ତୀବ୍ରତା କମ ଥିଲା, କିନ୍ତୁ ଏହା ନିଶ୍ଚିତ ଭାବରେ ଏକ ଚେତାବନୀ । ବିଶେଷଜ୍ଞମାନେଙ୍କ ଅନୁସାରେ ବାରମ୍ବାର ମୃଦୁ ଭୂମିକମ୍ପ ଏକ ବଡ଼ ଭୂମିକମ୍ପର ସଙ୍କେତ ହୋଇପାରେ । ଏପରି ପରିସ୍ଥିତିରେ ଭୂମିକମ୍ପ-ପ୍ରତିରୋଧୀ ଗଠନ ପ୍ରସ୍ତୁତ କରିବା ଏବଂ ଲୋକଙ୍କୁ ସମୟ ମଧ୍ୟରେ ସଚେତନ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଯାଇଛି । ବର୍ତ୍ତମାନ ସ୍ଥାନୀୟ ପ୍ରଶାସନ ପରିସ୍ଥିତି ଉପରେ ନଜର ରଖିଛି ଏବଂ ରିଲିଫ୍ ଦଳଗୁଡ଼ିକୁ ମଧ୍ୟ ପ୍ରସ୍ତୁତ ରଖାଯାଇଛି ।

ପୂର୍ବରୁ ମଙ୍ଗଳବାର ବିଳମ୍ବିତ ରାତିରେ ନ୍ୟୁଜିଲାଣ୍ଡର ପଶ୍ଚିମ ଉପକୂଳରେ ୬.୨ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା। ଅଧିକାରୀମାନେ କୌଣସି କ୍ଷୟକ୍ଷତିର ସୂଚନା ଦେଇନାହାନ୍ତି ଏବଂ ସୁନାମି ଚେତାବନୀ ମଧ୍ୟ ଜାରି କରାଯାଇ ନାହିଁ । ଆମେରିକାର ଭୂତତ୍ତ୍ୱ ସର୍ବେକ୍ଷଣ ସଂସ୍ଥା କହିଛି ଯେ, ସ୍ଥାନୀୟ ସମୟ ରାତି ୧.୦ ପରେ ଭୂମିକମ୍ପ ହୋଇଥିଲା। ଏହାର କେନ୍ଦ୍ରସ୍ଥଳ ନ୍ୟୁଜିଲାଣ୍ଡର ଇନଭରକାରଗିଲ ସହରରୁ 300 କିଲୋମିଟର ଦକ୍ଷିଣ-ପଶ୍ଚିମରେ ଏବଂ ସମୁଦ୍ରସ୍ତରରୁ ୧୦ କିଲୋମିଟର ତଳେ ଥିଲା ।