ମାଲକାନଗିରି, ୪/୩ : ଗ୍ରାମ୍ୟ ଉନ୍ନୟନ, ପଞ୍ଚାୟତିରାଜ ଓ ପାନୀୟଜଳ ବିଭାଗ ମନ୍ତ୍ରୀ ରବି ନାରାୟଣ ନାୟକ ମାଲକାନଗିରି ଜିଲ୍ଲା ଗସ୍ତ କରିଛନ୍ତି। ମାନ୍ୟମକୋଣ୍ଡା ଠାରେ ଥିବା ବଡ଼ଯାତ୍ରା ପୀଠରେ ବଡଠାକୁରଙ୍କୁ ପୂଜାର୍ଚ୍ଚନା କରିଥିଲେ। ତାପରେ ଭେଙ୍କଟପଲମ୍ ଯାଇ ବିଶାଳ ଜଳ ପ୍ରକଳ୍ପର ତଦାରଖ କରି ତୁରନ୍ତ କାର୍ଯ୍ୟ ସାରିବା ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
ମାଲକାନଗିରି ଜିଲ୍ଲା କାଲିମେଳା ଠାରେ ମେଗା ପାଇପ୍ ଜଳ ଯୋଗାଣ ପ୍ରକଳ୍ପ ଅଗ୍ରଗତିର ସମୀକ୍ଷା କରିଥିଲେ। ମୋଟ ୩୭ କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ଏହି ମେଗା ପ୍ରକଳ୍ପ ଦ୍ବାରା ମୋଟ ୫ଟି ଗ୍ରାମ ପଞ୍ଚାୟତର ୨୨ ଟି ଗ୍ରାମରେ ଥିବା ମୋଟ ୫୮୬୫ ଟି ଗୃହକୁ ଜଳ ଯୋଗାଣ କରାଯିବ।
ଗ୍ରାମବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ସୁନିଶ୍ଚିତ କରାଯାଉଛି। ଏହି ପ୍ରକଳ୍ପ ଦ୍ବାରା ଅଞ୍ଚଳର ଜଳ ସମସ୍ୟାର ସ୍ଥାୟୀ ସମାଧାନ ହେବ। ଏହା ମୁଖ୍ୟତଃ ଗ୍ରାମୀଣ ଅଞ୍ଚଳର ଲୋକଙ୍କୁ ଶୁଦ୍ଧ ପାନୀୟ ଜଳ ଯୋଗାଣ କରି ସ୍ବାସ୍ଥ୍ୟ ସୁରକ୍ଷା ନିଶ୍ଚିତ କରିବ । ଏହି ଯୋଜନା ମାଧ୍ୟମରେ ଜଳସ୍ରୋତର ସମ୍ପୂର୍ଣ ବ୍ୟବସ୍ଥାପନ ଏବଂ ବିତରଣ ବୃଦ୍ଧି ପାଇବ, ଯାହା ଦୂର୍ଗମ ଅଞ୍ଚଳର ଲୋକଙ୍କୁ ଉପକୃତ କରିବ ବୋଲି ମନ୍ତ୍ରୀ ଶ୍ରୀ ନାୟକ କହିଛନ୍ତି। ମନ୍ତ୍ରୀଙ୍କ ସହିତ ମାଲକାନଗିରି ବିଧାୟକ ନରସିଂହ ମାଡକାମୀ, ଜିଲ୍ଲା ବିଜେପି ସଭାପତି ଅଶୋକ ପରିଡା,ଦଳୀୟ ନେତା ଓ କର୍ମୀ,ଜିଲ୍ଲାପାଳ ଆଶିଷ ଈଶ୍ୱର ପାଟିଲ ପ୍ରମୁଖ ଅଧିକାରୀ ଉପସ୍ଥିତ ଥିଲେ।
