ପାରିକରଙ୍କ ସ୍ଥିତି ଗମ୍ଭୀର: ସଙ୍କଟରେ ଗୋଆ ସରକାର, ଦଳର ଅନ୍ୟ କେହି ନେତା ହୋଇପାରନ୍ତି ମୁଖ୍ୟମନ୍ତ୍ରୀ
ପାଣାଜୀ,୧୭।୩: ଗୋଆର ମୁଖ୍ୟମନ୍ତ୍ରୀ ମନୋହର ପାରିକରଙ୍କ ସ୍ବାସ୍ଥ୍ୟବସ୍ଥା ଦିନକୁ ଦିନ ଖରାପ ହେବାରେ ଲାଗିଛି। ତେଣୁ ପାରିକରଙ୍କ ସ୍ଥାନରେ ଦଳର ଅନ୍ୟ କେହି ନେତା ମୁଖ୍ୟମନ୍ତ୍ରୀ ହୋଇପାରନ୍ତି। ଦଳର ବରିଷ୍ଠ ନେତା ଓ ଉପ-ମୁଖ୍ୟମନ୍ତ୍ରୀ ମାଇକେଲ ଲୋବୋଙ୍କ କହିବା ଅନୁସାରେ ଦଳରେ ପାରିକରଙ୍କ ସ୍ଥାନରେ ଅନ୍ୟ କାହାକୁ ମୁଖ୍ୟମନ୍ତ୍ରୀ କରିବା ନେଇ ଚର୍ଚ୍ଚା ହୋଇଛି। ତେବେ ସେ ଏହା ସ୍ପଷ୍ଟ କରିନାହାନ୍ତି ଯେ କାହାକୁ ମୁଖ୍ୟମନ୍ତ୍ରୀ କରାଯିବାର ପ୍ରସ୍ତାବ ଦିଆଯାଇଛି। ଏନେଇ ଦଳର ନେତା ଓ ବିଧାୟକଙ୍କ ଭିତରେ ବୈଠକ ହେବାପରେ ସ୍ଥିର କରାଯିବ। ଅନ୍ୟପକ୍ଷେ ଦଳର ନେତା ଦୟାନନ୍ଦ ମାଡରେକର କହିଛନ୍ତି ପାରିକରଙ୍କ ସ୍ବାସ୍ଥ୍ୟବସ୍ଥା ଖୁବ୍ ଗମ୍ଭୀର ହୋଇପଡିଛି।
ଉପ-ମୁଖ୍ୟମନ୍ତ୍ରୀ ଲୋବୋ କହିଛନ୍ତି ମୁଖ୍ୟମନ୍ତ୍ରୀ ପାରିକରଙ୍କ ସ୍ବାସ୍ଥ୍ୟକୁ ନେଇ ଦଳର ନେତା ଓ ବିଧାୟକ ଖୁବ୍ ଚିନ୍ତାରେ ଅଛନ୍ତି। ତାଙ୍କର ଯଦି କିଛି ହୋଇଯାଏ ତେବେ ଗୋଆର ଆଗାମୀ ମୁଖ୍ୟମନ୍ତ୍ରୀ ହିଁ ବିଜେପିର ରହିବେ। ଆଜି ଦଳର ବରିଷ୍ଠ ନେତା ମଧ୍ୟ ଆସୁଛନ୍ତି। ତେଣୁ ସମସ୍ତେ ବସି ଏସମ୍ପର୍କରେ ନିଷ୍ପତ୍ତି ନେବୁ। ଏହି ବୈଠକରେ ଗୋଆ ଫରଓ୍ବାର୍ଡ ପାର୍ଟି ଓ ମହାରାଷ୍ଟ୍ରବାଦୀ ଗୋମଣ୍ଟକ ପାର୍ଟି ସହିତ ମେଣ୍ଟ ଉପରେ ମଧ୍ୟ ଚର୍ଚ୍ଚା ହେବ। କୁହାଯାଉଛି ଯେ ଦଳର କୌଣସି ନେତାଙ୍କୁ ମୁଖ୍ୟମନ୍ତ୍ରୀ ହୋଇପାରେ।
