ଭୁବନେଶ୍ୱର,୨୭ା୧(ବ୍ୟୁରୋ): ଆକାଶ ଥିଲା ମେଘାଚ୍ଛନ । କୋହଲା ପାଗରେ ଦେହହାତ କୋଲ ମାରି ଯାଉଥିଲା । ପୁଣି ମଝିରେ ମଝିରେ ଦଲକାଏ ଲେଖାଏ ପବନ ଥରାଇ ଦେଉଥିଲା । ହେଲେ ଏସବୁ କିଛି କାଟୁନଥିଲା ଯୁବପିଢ଼ିଙ୍କୁ । ଘଣ୍ଟାକଣ୍ଟାରେ ୭ଟା ବାଜିବା କ୍ଷଣି ସମସ୍ତେ ପହଞ୍ଚି ଯାଇଥିଲେ ଜନପଥରେ ।
ଶୀତବସ୍ତ୍ର ଘୋଡ଼ିଘାଡ଼ି ହୋଇ ଯାଇଥିବା ଯୁବଗୋଷ୍ଠୀ ପଥ ଉତ୍ସବରେ ପହଞ୍ଚିବା କ୍ଷଣି ଶୀତ ଛାଡ଼ି ଯାଇଥିଲା । ଶୀତବସ୍ତ୍ର ଓହ୍ଲାଇ କିଛି ସମୟ ମଜି ଯାଇଥିଲେ ବ୍ୟାୟାମରେ । ଏହାପରେ ଆରମ୍ଭ ହୋଇଥିଲା ସେଲିବ୍ରେସନ୍‌ । ସାଙ୍ଗସାଥୀଙ୍କ ସହିତ ପ୍ରତିଟି ମୁହୂର୍ତ୍ତକୁ ମନଭରି ଉପଭୋଗ କରିଥିଲେ । ଆଉ ଏହାକୁ ସ୍ମରଣୀୟ କରିବାକୁ ବିଭିନ୍ନ ପ୍ରକାର ଫଟୋ ଉଠାଇ ସାଇତି ରଖିଥିଲେ ।
ଆଜି ପଥ ଉତ୍ସବରେ ଦେଶପ୍ରେମର ଝଲକ୍‌ ଦେଖିବାକୁ ମିଳିଥିଲା । ସାଧାରଣତନ୍ତ୍ର ଦିବସ ଦିନକ ପୂର୍ବରୁ ସରିଥିଲେ ମଧ୍ୟ ଲୋକମାନଙ୍କ ମନରେ ଉତ୍ସାହ କମି ନଥିଲା । ରଙ୍ଗୋଲିରେ ଭାରତମାତା ଓ ଭାରତ ମାନଚିତ୍ର ଅଙ୍କା ଯାଇଥିଲା । ସେହିପରି ଦେଶ ସ୍ୱାଧୀନ ପାଇଁ ବଳିଦାନ ଦେଇଥିବା ମହାପୁରୁଷମାନଙ୍କୁ ମଧ୍ୟ ସ୍ମରଣୀୟ କରାଯାଇଥିଲା । କେବଳ ଏମିତି ନୁହେଁ ମଞ୍ଚରେ ମଧ୍ୟ ଦେଶାତ୍ମକବୋଧକ ସଙ୍ଗୀତ ପରିବେଷଣ ହୋଇଥିଲା । ଯୁବତୀମାନେ ମୁହଁରେ ତ୍ରିରଙ୍ଗା କରୁଥିବା ଦେଖିବାକୁ ମିଳିଥିଲା । ଏଥିପାଇଁ ଅନ୍ୟଦିନ ଅପେକ୍ଷା ଆଜି ପଥ ଉତ୍ସବ ଟିକେ ନିଆରା ଲାଗୁଥିଲା ।