ଚନ୍ଦ୍ରଶେଖରପୁର, ୧୦/୧୦ : ପଟିଆ ଗଡ଼ ମହାବୀର ଦୁର୍ଗାପୂଜା କମିଟି ଚଳିତ ବର୍ଷ ରାଜସ୍ଥାନର ଅମ୍ବର ପ୍ୟାଲେସ୍ ନିର୍ମାଣ କରିଛି । ଏହାର ଉଚ୍ଚତା ୭୨ ଫୁଟ ରହିଥିଲା ବେଳେ ଓସାର ୮୦ ଫୁଟ । ୧୪ ଫୁଟର ମାଆଙ୍କ ମୃଣ୍ମୟୀ ମୂର୍ତ୍ତି ସହ ୧୬ ଫୁଟର ତାରକସୀ ମେଢ କାମ ଜାରି ରହିଛି । ଏହାକୁ କଟକର ଦକ୍ଷ କାରିଗରମାନେ ନିର୍ମାଣ କରୁଛନ୍ତି । ଏଥର ବିଶେଷ ଆକର୍ଷଣ ସାଜିବ ବୃହଦ୍କାୟ ଚାନ୍ଦି ମୁକୁଟ । ଏହା ୬ କେଜି ରୁପାରେ ଅତ୍ୟନ୍ତ ସୁକ୍ଷ୍ମ କାରୁକାର୍ଯ୍ୟରେ ନିର୍ମିତ ହୋଇଛି । ଏହାକୁ କଟକ ମାନସିଂପାଟଣାର କାରିଗରମାନେ ନିର୍ମାଣ କରିଛନ୍ତି । ମାଆଙ୍କ ମସ୍ତକରେ ଚାନ୍ଦି ମୁକୁଟ ଶୋଭା ପ । ଇ ବ । ସହିତ ସେ ରୁପା ଗହଣାରେ ସୁସଜ୍ଜିତ ହେବେ । ସେହିପରି ପାର୍ଶ୍ୱ ଦେବଦେବୀମାନେ ମଧ୍ୟ ଚାନ୍ଦି ମୁକୁଟ ଓ ରୁପା ଗହଣା ପରିଧାନ କରିବେ ।
ଚଳିତ ବର୍ଷ ପୂଜା ୨୭ ବର୍ଷରେ ପଦାର୍ପଣ କରିଛି । ଚଳିତବର୍ଷ ବଜେଟ୍ ୪୦ ଲକ୍ଷ ଟଙ୍କା ରଖାଯାଇଛି । ପୂଜାରେ ୨ ହଜାର ଭକ୍ତଙ୍କୁ ପ୍ରସାଦ ବଣ୍ଟନ କରାଯିବ । ନବମୀ ଦିନ କୁମାରୀ ପୂଜା, ଦହି ପଖାଳ ଭୋଗ, ଦଶମୀ ଦିନ ଅପରାଜିତା ପୂଜା, ପୂର୍ଣ୍ଣାହୁତି, ଘଟ ବିସର୍ଜନ ହେବ । ସପ୍ତମୀରେ ଭଜନ ସନ୍ଧ୍ୟା, ଅଷ୍ଟମୀ, ନବମୀ ଓ ଦଶମୀରେ ମେଲୋଡି ହେବାର କାର୍ଯ୍ୟକ୍ରମ ରହିଛି । ପୂଜା ପଡିଆରେ ମୀନା ବଜାର ଓ ରାମଦୋଳି ପଡିବ । ପୂଜା ମଣ୍ଡପରେ ଓ ବାହାରେ ଭିଡ ନିୟନ୍ତ୍ରଣ ପାଇଁ ୧୦୦ ଜଣ ସ୍ୱେଚ୍ଛାସେବୀ ନିୟୋଜିତ ରହିବେ । ଏଥିସହିତ ୧୧ଟି ସିସିଟିଭି କ୍ୟାମେରା ଲଗାଯିବ । ମଣ୍ଡପରେ ୬ଟି ଅଗ୍ନି ନିର୍ବାପକ ଯନ୍ତ୍ର ରଖାଯିବ । ମଣ୍ଡପକୁ ସଂଯୋଗ କରୁଥିବା ୪ଟି ରାସ୍ତାରେ ଏଲ୍ଇଡି ଲାଇଟ୍ର ଗେଟ୍ ହେବା ସହ ରଙ୍ଗିନ ଆଲୋକମାଳାରେ ସୁସଜ୍ଜିତ କରାଯିବ । ପାରମ୍ପରିକ ବାଦ୍ୟରେ ପଟିଆ ଗ୍ରାମ ପରିକ୍ରମା କରାଯାଇ ମାଆଙ୍କୁ ମେଲାଣି ଦିଆଯିବ ।
