ନବରଙ୍ଗପୁର,୨୯/୦୬: ପୁରୀ ଶରଧାବାଲି ଅଘଟଣକୁ ନେଇ ଉଠୁଛି ପଡ଼ୁଛି ରାଜ୍ୟ । ଦଳାଚକଟା ଏବେ ଜାତୀୟ ଗଣମାଧ୍ୟମର ଖବର ସିରୋନାମା ପାଲଟିଛି । ଏପଟେ ସରକାରଙ୍କୁ ଟାର୍ଗେଟ୍ କରିବାରେ ଲାଗି ପଡ଼ିଛନ୍ତି ବିରୋଧୀ । ପିସିସି ସଭାପତି ଭକ୍ତ ଚରଣ ଦାସ ପୁରୀ ଠେଲାପେଲାରେ ୩ଜଣଙ୍କ ମୃତ୍ୟୁକୁ ନେଇ ସରକାରଙ୍କ ଉପରେ ବର୍ଷିଛନ୍ତି । ସେ କହିଛନ୍ତି, ରଥଯାତ୍ରା ଭକ୍ତ ଓ ଭଗବାନଙ୍କ ବଦଳରେ ଭିଆଇପି କେନ୍ଦ୍ରୀତ ଥିଲା । ଘୋଷଯାତ୍ରା ପରିଚାଳନାରେ ବ୍ୟାପକ ବିଶୃଙ୍ଖଳା ହୋଇଛି ବୋଲି ପିସିସି ସଭାପତି ଭକ୍ତ ଦାସ କହିଛନ୍ତି ।
ଜୟପୁରରେ କଂଗ୍ରେସର ଏକ କାର୍ଯ୍ୟକ୍ରମରେ ଯୋଗ ଦେଇ ସେ ଆହୁରି କହିଛନ୍ତି, ପ୍ରତିବର୍ଷ ରଥଯାତ୍ରାରେ ପ୍ରବଳ ଭିଡ଼ ହୋଇଥାଏ । କିନ୍ତୁ ଦୁର୍ଭାଗ୍ୟବଶତଃ ଏଥର ପରିଚାଳନାକୁ ଜୋର୍ ଜବରଦସ୍ତି କରାଯାଇଛି। ଚଳିତ ଥର ଭକ୍ତ ଓ ଭଗବାନଙ୍କ ବଦଳରେ ଭିଆଇପିଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦିଆଯାଇଛି । ରବିବାର ରଥଯାତ୍ରା ଦେଖିବାକୁ ଆସିଥିବା ୩ ଜଣ ଭକ୍ତ ଜୀବନ ଚାଲିଯାଇଛି। ଦଳାଚକଟାରେ ବର୍ତମାନ ସୁଧା ୬୦୦ ଜଣ ଭକ୍ତ ଆହତ ହୋଇଛନ୍ତି ବୋଲି ପିସିସି ସଭାପତି ଅଭିଯୋଗ କରିଛନ୍ତି । ଏଭଳି ଅବ୍ୟବସ୍ଥା ଯୋଗୁଁ ଲକ୍ଷାଧିକ ଭକ୍ତ ମହାପ୍ରଭୁଙ୍କୁ ଦର୍ଶନ କରିପାରିଲେ ନାହିଁ। ତେଣୁ ରଥଯାତ୍ରା ପରିଚାଳନା କେଉଁମାନେ ଦାୟିତ୍ଵରେ ଥିଲେ। ଏଭଳି ଅଘଟଣ ପାଇଁ ଯେଉଁମାନେ ଉତ୍ତରଦାୟୀ, ସେମାନଙ୍କ ବିରୋଧରେ ମୁଖ୍ୟମନ୍ତ୍ରୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ଭକ୍ତ ଦାସ।
