ଭୁବନେଶ୍ଵର, ୦୭/୦୫ : ଯୁଦ୍ଧ ହେବ କି ନାହିଁ ଜଣା ନାହିଁ । କେବଳ ନାଗରିକ ପ୍ରତିରକ୍ଷା ମକ୍ ଡ୍ରିଲ୍ ପାଇଁ ନିର୍ଦ୍ଦେଶ ହୋଇଛି । ଏତିକିରେ ଲୋକେ ଛାନିଆ । ସନ୍ଧ୍ୟାରେ ଟିଭିରେ ଯୁଦ୍ଧ କଥା ଶୁଣି ସିଧା ମାର୍କେଟ ମୁହାଁ । ଭିଡ଼ ଜମାଇଲେ ଆଳୁ, ପିଆଜ ଦୋକାନରେ । ୟୁନିଟ୍-୧ ପରିବା ହାଟରେ ମଙ୍ଗଳବାର ସନ୍ଧ୍ୟାରେ ଖଚାଖଚ୍ ଗହଳି ହୋଇଥିଲା । ବିଶେଷ କରି ଆଳୁ ଦୋକାନରେ ଭିଡ଼ ବେଶି ଜମିଥିଲା। ସେଠାରେ ଆଳୁ ଓ ପିଆଜ କିଣିବାକୁ ଯେମିତି ପ୍ରତିଯୋଗିତା ଚାଲିଥିଲା । ଖାଲି ପରିବା ହାଟ ନୁହେଁ, ଡାଲି, ଚାଉଳ, ଚୁଡ଼ା ଏବଂ ଅତ୍ୟାବଶକ ସାମଗ୍ରୀ ଦୋକାନରେ ମଧ୍ୟ ପୂର୍ବାପେକ୍ଷା ଆଜି ସନ୍ଧ୍ୟାରେ ଭିଡ଼ ବଢ଼ିଥିଲା । ଲୋକେ ଆବଶ୍ୟକତା ଠାରୁ ଅଧିକ କିଣୁଛନ୍ତି ।
ଖାଲି ହାଟ ନୁହେଁ, ସହରର ବିଭିନ୍ନ ଛୋଟ ତେଜରାତି ଦୋକାନ, ମଲ୍ ଓ ପରିବା ଦୋକାନରେ ମଧ୍ୟ ଭିଡ଼ ପରିଲକ୍ଷିତ ହୋଇଛି । ଲୋକଙ୍କ ଭୟକୁ ଦେଖି ବେପାରୀ ବି ମାତିଲେଣି । ମାର୍କେଟରେ ପର୍ଯ୍ୟାପ୍ତ ପରିମାଣର ଆଳୁ ଥିବା ସତ୍ତ୍ଵେ ଆଜି କିଛି ଦୋକାନୀ ଆଳୁ ବିକ୍ରି କରିନଥିଲେ । କଳାବଜାରୀ ପାଇଁ ଗଚ୍ଛିତ ରଖିଥିଲେ । କିଛି କିଛି ସ୍ଥାନରେ ଉଚ୍ଚା ଦରରେ ବିକ୍ରି ହୋଇଥିବା ନେଇ ଅଭିଯୋଗ ମଧ୍ୟ ହୋଇଛି । ଆଳୁ କେଜି ପିଛା ୨୦ ବଦଳରେ ୨୫ ଟଙ୍କାରେ ବିକ୍ରି ହୋଇଛି । ସେହିପରି ପିଆଜ ୩୦ରୁ ୩୫ ଟଙ୍କା ଏବଂ ପରିବା ମଧ୍ୟ ପୂର୍ବାପେକ୍ଷା ସାମାନ୍ୟ ଉଚ୍ଚା ଦରରେ ବିକ୍ରି ହୋଇଛି । କୁବେରପୁରୀ ଆଳୁ ବ୍ୟବସାୟୀ ସଂଘର ସମ୍ପାଦକ ଶକ୍ତିଶଙ୍କର ମିଶ୍ର କହିଛନ୍ତି, ପର୍ଯ୍ୟାପ୍ତ ପରିମାଣର ଆଳୁ ବର୍ତ୍ତମାନ ଗଚ୍ଛିତ ରହିଛି । ତେଣୁ ଭୟ କରିବାର କୌଣସି ଆବଶ୍ୟକତା ନାହିଁ । ଲୋକେ ଯେତିକି ପରିମାଣର ଆଳୁ ଦରକାର ସେତିକି ବଜାରରୁ ନିଅନ୍ତୁ । ନହେଲେ ଆଳୁ ଅଭାବ ପଡ଼ିବ । ଭୁବନେଶ୍ୱର ଅତିରିକ୍ତ ଜିଲ୍ଲାପାଳ ରୁଦ୍ରନାରାୟଣ ମହାନ୍ତି କହିଛନ୍ତି, କଳାବଜାରୀ ନେଇ କୌଣସି ଖବର ହସ୍ତଗତ ହୋଇନାହିଁ । ଯଦି କଳାବଜାରୀ ହୁଏ, ତାହାଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ।
ଏହି ଖବରଟିକୁ ପଢନ୍ତୁ-Operation Sindoor: ସିନ୍ଦୂରର ପ୍ରତିଶୋଧ ସିନ୍ଦୂରରେ, 'ମୋ ସ୍ୱାମୀଙ୍କ ଆତ୍ମାକୁ ଶାନ୍ତି ମିଳିଲା'
