ଦଶମନ୍ତପୁର, ୬/୮ : ମଶାଣି ଯିବାକୁ ରାସ୍ତା ସୁବିଧା ନାହିଁ। ବାଟରେ ପଡୁଛି ଭରା ନଦୀ। ଗାଁରେ କାହାର ମୃତ୍ୟୁ ହେଲେ ଜୀବନକୁ ବାଜି ଲଗାଇ ଭରା ନଦୀ ପାର ହୋଇ ଶବ ଧରି ମଶାଣି ଯିବାକୁ ପଡୁଛି। ଏଭଳି ଦୃଶ୍ୟ ଦେଖିବାକୁ ମିଳିଛି କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଅନ୍ତର୍ଗତ ଗାଦିଆ ଗୁଡା ପଞ୍ଚାୟତ ଅଧିନସ୍ଥ ବଗେଇ ପଦର ଗାଁରେ।
ଏହି ଗାଁରେ ରହୁଥିବା ରାଜା ଗରଡାଙ୍କ ମଙ୍ଗଳବାର ସନ୍ଧ୍ୟାରେ ଅକାଳ ମୃତ୍ୟୁ ହୋଇଥିଲା। ତାଙ୍କ ଶବ ସତ୍କାର ପାଇଁ ବାହାରିଥିଲେ ସମ୍ପର୍କିୟ, ପରିବାର ବର୍ଗ ଏବଂ ବନ୍ଧୁବାନ୍ଧବ। ହେଲେ ମଶାଣି ଯିବା ପୂର୍ବରୁ ବାଟ ଓଗାଳୁଛି ମୁରାନ ନଦୀ। ସ୍ଥାୟୀ ପୋଲ ନ ଥିବାରୁ ଛାତି ଉପରେ ପ୍ରଭାବିତ ହେଉଥିବା ଭରା ନଦୀରେ ଜୀବନକୁ ବାଜି ଲଗାଇ କୋକେଇରେ ମୃତଦେହ ଧରି ମଶାଣି ନେଉଥିବା ଦେଖିବାକୁ ମିଳିଛି। ଏଭଳି ଘଟଣା ଦିନେ କି ଦୁଇଦିନର ନୁହେଁ। ପୂର୍ବ ପୁରୁଷ ଅମଳରୁ ଏଭଳି ଦୁର୍ଦ୍ଦଶା ଭୋଗୁଥିବା ଗାଁର ତ୍ରିନାଥ ଗରଡା, ବିଦୁ ଖରା, ବୈଦ୍ୟନାଥ ଡଙ୍ଗ୍ରି, ଲବ ଭତ୍ରା ପ୍ରମୁଖ ପ୍ରକାଶ କରିଛନ୍ତି।
କେବଳ ଏହି ଗୋଟିଏ ଗାଁ ଲୋକ ନୁହେଁ ଏହିପରି ତଳ ଗଦ୍ରି ଏବଂ ପରଜା ଗଦ୍ରି ଗ୍ରାମବାସୀ ମଧ୍ୟ ସମସ୍ୟା ଭୋଗୁଛନ୍ତି। ଖରାଦିନେ ନଦୀରେ କମ ପାଣି ଥିବାରୁ ସେତେଟା ବିପଦ ନାହିଁ। କିନ୍ତୁ ବର୍ଷା ଦିନେ ଗାଁର କାହାର ମୃତ୍ୟୁ ହେଲେ ଏହି ଭଳି ତିନି ଖଣ୍ଡ ଗ୍ରାମବାସୀ ବହୁତ ସମସ୍ୟା ଭୋଗୁଛନ୍ତି।
