ପାକିସ୍ତାନରେ ୩୫ ଟଙ୍କା ବଢ଼ିଲା ପେଟ୍ରୋଲ ଦର, କିରୋସିନ ଏବଂ ଲାଇଟ ଡିଜେଲ ଦର ୧୮ ଟଙ୍କା ବୃଦ୍ଧି
ନୂଆଦିଲ୍ଲୀ,୩୦/୦୧: ପାକିସ୍ତାନ ସରକାର ପେଟ୍ରୋଲ ଏବଂ ଡିଜେଲ ଦରରେ ବୃହତ୍ତ ବୃଦ୍ଧି କରିଛନ୍ତି । ସେଠାରେ ଉଭୟ ଇନ୍ଧନ ଦର ପାକିସ୍ତାନ ମୁଦ୍ରାରେ ୩୫ ଟଙ୍କା ବଢ଼ିଛି । ପାକିସ୍ତାନ ଅର୍ଥମନ୍ତ୍ରୀ ଇସାକ ଧର ଏ ସମ୍ପର୍କରେ ଘୋଷଣା କରିଛନ୍ତି । ଜାନୁଆରି ୨୯ ଦିନ ୧୧ଟା ପରଠାରୁ ଏହି ଦର ଲାଗୁ ହେବ ବୋଲି ସେଠାକାର ଡନ୍ ଖବରକାଗଜରେ ପ୍ରକାଶ ପାଇଛି ।
ସେହିଭଳି କିରୋସିନ ଏବଂ ଲାଇଟ ଡିଜେଲ ଦର ୧୮ ଟଙ୍କା ବୃଦ୍ଧି ହେବ ବୋଲି ଜଣାପଡିଛି । ପାକିସ୍ତାନ ଅର୍ଥମନ୍ତ୍ରୀ ଏକ ଟୁଇଟରେ କହିଛନ୍ତି, ପେଟ୍ରୋଲ ୨୪୯.୮୦ ଟଙ୍କା ଏବଂ ଡିଜେଲ ୨୬୨.୮୦ ଟଙ୍କାରେ ବିକ୍ରି ହେଉଛି । କିରୋସିନର ଲିଟର ପିଛା ଦର ୧୮୯.୮୩ ଟଙ୍କା ଏବଂ ଲାଇଟ ଡିଜେଲ ଦର ୧୮୭ ଟଙ୍କା ଛୁଇଁଛି । ପ୍ରଧାନମନ୍ତ୍ରୀ ସେହେବାଜ ସରିଫଙ୍କ ନିଷ୍ପତ୍ତିକ୍ରମେ ଇନ୍ଧନ ଦର ବୃଦ୍ଧି କରାଯାଇଛି ।
ଗତ ଅକ୍ଟୋବର ପରଠାରୁ ସେଠାରେ ଇନ୍ଧନ ଦର ବୃଦ୍ଧି ହୋଇ ନ ଥିଲା । ତେବେ ପାକିସ୍ତାନି ଟଙ୍କାର ଅବମୂଲ୍ୟାୟନ ଯୋଗୁ ଏବେ ଦରରେ ବୃଦ୍ଧି କରାଯାଇଛି । ତେବେ ଦେଶ ମଧ୍ୟରେ ଏବେ ଇନ୍ଧନ ଯୋଗାଣରେ କୌଣସି ସମସ୍ୟା ନାହିଁ ବୋଲି ସେ ଉଲ୍ଲେଖ କରିଛନ୍ତି । ଫେବୃଆରି ପହିଲାରୁ ଇନ୍ଧନ ଦର ୪୫ରୁ ୮୦ ଟଙ୍କା ବଢ଼ିବ ବୋଲି ସୋସିଆଲ ମିଡିଆରେ ବିଭିନ୍ନ ଖବର ଭାଇରାଲ ହେଉଥିଲା । ତେବେ ଏହି ଖବରକୁ ଧର୍ ଖଣ୍ଡନ କରିଛନ୍ତି ।
