ସୁନ୍ଦରଗଡ଼,୨୮/୬: ସୁନ୍ଦରଗଡ଼ର ଭିଜିଲାନ୍ସ କୋର୍ଟର ସ୍ଵତନ୍ତ୍ର ବିଚାରପତି ଏକ ଲାଞ୍ଚ ମାମଲାର ଶୁଣାଣି କରି ଅଭିଯୁକ୍ତଙ୍କ ବିରୋଧରେ ରାୟ ଶୁଣାଇଛନ୍ତି। ରାୟ ଅନୁସାରେ ଅଭିଯୁକ୍ତ ଗୁରୁଣ୍ଡିଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ପୂର୍ବତନ ଫାର୍ମାସିଷ୍ଟ ସୁନିତ୍ କୁମାର ମହାନ୍ତି (ଖଇରଟୋଲା ପିଏଚସି, ହାତୀବାରି ସିଏଚସି ଅଧୀନରେ ଫାର୍ମାସିଷ୍ଟ ଭାବେ କାର୍ଯ୍ୟରତ)ଙ୍କୁ ୨ ବର୍ଷ କାରାଦଣ୍ଡ ସହ ୧୦,୦୦୦ ଟଙ୍କାର ଜରିମାନା ଆଦାୟ ପାଇଁ ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦେୟ ହେଲେ ଆଉ ୪ ମାସ କାରାଦଣ୍ଡରେ ଦଣ୍ଡିତ କରିବାକୁ ରାୟ ଦେଇଛନ୍ତି।
ସୂଚନା ଅନୁଯାୟୀ, ୨୦୧୩ ସେପ୍ଟେମ୍ବର ମାସରେ ଗୁରୁଣ୍ଡିଆ ବ୍ଲକ ଅଧୀନ ବଡ଼ଗାଁ ଗ୍ରାମର ଜିଦ୍ଦି ଓରାମକ ମାଆଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ଥିବାରୁ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ଥିଲେ। ସେଠାରେ ଥିବା ତତ୍କାଳୀନ ଫାର୍ମାସିଷ୍ଟ ଶ୍ରୀ ମହାନ୍ତି ଉତ୍ତମ ଔଷଧ ଦେବା ପାଇଁ ୧୨୦୦ ଟଙ୍କା ଲାଞ୍ଚ ମାଗିଥିଲେ। ଏ ନେଇ ଜିଦ୍ଦୀ ଗ୍ରାମର ଜୌରା ଓରାମଙ୍କୁ ଜଣାଇଥିଲେ। ଫଳରେ ଜୌରା ଭିଜିଲାନ୍ସରେ ଅଭିଯୋଗ କରିଥିଲେ। ଯୋଜନା ମୁତାବକ ୧୨୦୦ ଟଙ୍କା ଫାର୍ମାସିଷ୍ଟ ଶ୍ରୀ ମହାନ୍ତି ଲାଞ୍ଚ ନେବା ବେଳେ ଭିଜିଲାନ୍ସ ହାତରେ ଧରାପଡିଥିଲେ । ଏହି ମାମଲା ଭିଜିଲାନ୍ସ କୋର୍ଟରେ ବିଚାରଧୀନ ଚାଲିଥିବା ବେଳେ ଶନିବାର ବିଚାରପତି ଏହାର ଶୁଣାଣି କରି ରାୟ ଶୁଣାଇଛନ୍ତି। ସୁନ୍ଦରଗଡ଼ ଭିଜିଲାନ୍ସ,ବିଭାଗର ପୂର୍ବତନ ଡିଏସପି ପରମେଶ୍ୱର କିଷାନ ମାମଲାର ତଦନ୍ତ କରିଥିଲେ । ସୁନ୍ଦରଗଡ଼ ଭିଜିଲାନ୍ସ, ସ୍ୱତନ୍ତ୍ର ପି.ପି. ଶ୍ୟାମ ସୁନ୍ଦର ମିଶ୍ର ମାମଲା ପରିଚାଳନା କରିଥିଲେ। ଭିଜିଲାନ୍ସ ପକ୍ଷରୁ ସହାୟକ ପି.ପି. (କ୍ୟାଡର) ସନ୍ଦୀପ ପଣ୍ଡା ସହାୟତା କରିଥିଲେ।
