ନୂଆଦିଲ୍ଲୀ,୨୩ା୧(ଏଜେନ୍ସି): ପ୍ଲାଷ୍ଟିକ୍‌ ବଳୟ ମଧ୍ୟରେ ଏବେ ଅଣନିଃଶ୍ୱାସୀ ହୋଇପଡ଼ିଛି ଭାରତ । ଦେଶରେ ପ୍ରତିଦିନ ୨୫,୯୪୦ ଟନ୍‌ ପ୍ଲାଷ୍ଟିକ୍‌ ଆବର୍ଜନା ସୃଷ୍ଟି ହେଉଛି । ଏଥିରୁ ୬୦% ଆବର୍ଜନାକୁ ସଂଗ୍ରହ କରାଯାଇ ନିରାପଦ ଭାବେ ନଷ୍ଟ କରାଯାଉଛି । କିନ୍ତୁ ବଳକା ୪୦%କୁ ସଂଗ୍ରହ କରାଯାଇ ପାରୁନାହିଁ । ଫଳରେ ସମୟକ୍ରମେ ଏହି ଆବର୍ଜନା ପ୍ରକୃତିକୁ ବିଭିନ୍ନ ଦିଗରୁ ଆକ୍ରାନ୍ତ କରିବାରେ ଲାଗିଛି ।
୪୦% ପ୍ଲାଷ୍ଟିକ୍‌ ପ୍ରତିଦିନ ସଂଗ୍ରହ କରାଯାଇ ପାରୁନଥିବାରୁ ଏହା ଡ୍ରେନେଜ୍‌ ବ୍ୟବସ୍ଥାକୁ ସବୁଠୁ ଅଧିକ ପ୍ରଭାବିତ କରୁଛି । ଫଳରେ ବିଭିନ୍ନ ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ଉପୁଜୁଛି । ପ୍ଲାଷ୍ଟିକ୍‌ ଓ ମଇଳା ପାଣି ଦୀର୍ଘଦିନ ଧରି ଜମି ରହିବା ଯୋଗୁ ମ୍ୟାଲେରିଆ, ହଇଜା ଭଳି ମହାମାରୀ ବ୍ୟାପୁଛି । ଏହାବ୍ୟତୀତ ଏହି ପ୍ଲାଷ୍ଟିକ୍‌ ଆବର୍ଜନା ମୃତ୍ତିକାର ଗୁଣବତ୍ତାକୁ ପ୍ରଭାବିତ କରିବା ସହ ନଦୀ ଜଳ ପ୍ରବାହକୁ ମଧ୍ୟ ଖରାପ କରିବାରେ ଲାଗିଛି ।
କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ଦ୍ୱାରା ହୋଇଥିବା ସର୍ଭେରୁ ଜଣାପଡ଼ିଛି ଯେ ଦିଲ୍ଲୀ, ଚେନ୍ନାଇ, କୋଲ୍‌କାତା, ମୁମ୍ବାଇ ଓ ବେଙ୍ଗାଲୁରୁରେ ୫୦%ରୁ ଅଧିକ ପ୍ଲାଷ୍ଟିକ୍‌ ଆବର୍ଜନା ସୃଷ୍ଟି ହେଉଛି । ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଯେତେ ସତର୍କତା ଜାରି କରାଗଲେ ସୁଦ୍ଧା ଏହି ମେଟ୍ରୋ ସହରଗୁଡ଼ିକ ଉପରେ କୌଣସି ପ୍ରଭାବ ପଡୁନାହିଁ ।
ସିପିସିବି ପକ୍ଷରୁ ଦେଶର ୬୦ ପ୍ରମୁଖ ସହରରେ ହେଉଥିବା ପ୍ଲାଷ୍ଟିକ୍‌ ଆବର୍ଜନା ପରିଚାଳନାକୁ ଦୃଷ୍ଟିରେ ରଖି ଏହି ରିପୋର୍ଟ ପ୍ରସ୍ତୁତ କରାଯାଇଛି । ଏଥିରୁ ଜଣାପଡ଼ିଛି ଯେ ପ୍ରତିଦିନ ଏହି ସହରଗୁଡ଼ିକ ମୋଟ ୪,୦୫୯ ଟନ୍‌ ପ୍ଲାଷ୍ଟିକ୍‌ ଆବର୍ଜନା ସୃଷ୍ଟି କରୁଛନ୍ତି ।
ଉଲ୍ଲେଖଯୋଗ୍ୟ, ଗତ ସୋମବାର କେନ୍ଦ୍ର ପରିବେଶ ସଚିବ ସି କେ ମିଶ୍ର ପ୍ଲାଷ୍ଟିକ୍‌ ବ୍ୟବହାର ବାବଦରେ ମାର୍ଗଦର୍ଶିକା ଜାରି କରିଥିଲେ । ୨୦୨୨ ସୁଦ୍ଧା ଥରେ ବ୍ୟବହାର ହେଉଥିବା ପ୍ଲାଷ୍ଟିକ୍‌କୁ କିଭଳି ସମ୍ପୂର୍ଣ୍ଣ ନିଷେଧ କରାଯିବ, ସେଥିପାଇଁ ଏହି ମାର୍ଗଦର୍ଶିକା ସହାୟକ ହେବ ବୋଲି କହିଥିଲେ । ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ଥରେ ବ୍ୟବହାର ହେଉଥିବା ପ୍ଲାଷ୍ଟିକ୍‌ର ଉôପାଦନକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛି ।