ପିଏମ ମୋଦୀଙ୍କ ଶିକ୍ଷାଗତ ଯୋଗ୍ୟତା ମାମଲାରେ ଅରବିନ୍ଦ କେଜ୍ରିୱାଲ ଏବଂ ଆପ୍ ନେତା ସଞ୍ଜୟ ସିଂଙ୍କୁ ସମନ, ଜୁନ୍ ୭ରେ ହାଜର ହେବାକୁ ନିର୍ଦ୍ଦେଶ…
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଡିଗ୍ରୀ ମାମଲାରେ ମଙ୍ଗଳବାର ଗୁଜରାଟ ଅହମ୍ମଦାବାଦର ଏକ କୋର୍ଟ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ଆପ୍ର ରାଜ୍ୟସଭା ସାଂସଦ ସଞ୍ଜୟ ସିଂଙ୍କୁ ସମନ ଜାରି କରିଛନ୍ତି । ପ୍ରଧାନମନ୍ତ୍ରୀଙ୍କ ଏକାଡେମିକ ଡିଗ୍ରୀ ସମ୍ପର୍କରେ ଗୁଜୁରାଟ ବିଶ୍ୱବିଦ୍ୟାଳୟ ପକ୍ଷରୁ ଦାଖଲ ହୋଇଥିବା ଅପରାଧିକ ମାନହାନି ମାମଲାରେ ଉଭୟଙ୍କୁ ଜୁନ୍ ୭ ରେ ହାଜର ହେବାକୁ କୁହାଯାଇଛି । ଅତିରିକ୍ତ ମୁଖ୍ୟ ମେଟ୍ରୋପଲିଟନ ମାଜିଷ୍ଟ୍ରେଟ ଏସ.ଜେ ପାଞ୍ଚାଲ ଅରବିନ୍ଦ କେଜ୍ରିୱାଲ ଏବଂ ସଞ୍ଜୟ ସିଂଙ୍କୁ ସମନ ଜାରି କରିଛନ୍ତି । ତେବେ ପୂର୍ବରୁ ଉଭୟଙ୍କୁ ଏହି ମାମଲାରେ ୨୩ ମେ ରେ ଅଦାଲତରେ ହଜାର ହେବା ପାଇଁ ଏକ ସମନ ପଠାଯାଇଥିଲା । ହେଲେ ଉଭୟ ଅନୁପସ୍ଥିତ ରହିଥିଲେ ।
ଅତିରିକ୍ତ ମୁଖ୍ୟ ମେଟ୍ରୋପଲିଟନ ମାଜିଷ୍ଟ୍ରେଟ୍ ଜୟେଶ ଚୋବାଟିୟାଙ୍କ ଅଦାଲତ ପ୍ରଧାନମନ୍ତ୍ରୀ ମୋଦିଙ୍କ ଶିକ୍ଷାଗତ ଯୋଗ୍ୟତା ସମ୍ପର୍କରେ ଗୁଜରାଟ ବିଶ୍ୱବିଦ୍ୟାଳୟ ପକ୍ଷରୁ ସେମାନଙ୍କ ‘ବ୍ୟଙ୍ଗାତ୍ମକ’ ଏବଂ ‘ଅପମାନଜନକ’ ବିବୃତ୍ତି ପାଇଁ ସମନ ଜାରି କରିଥିଲେ । ସୋମବାର ଦିନ AAP ର ଗୁଜୁରାଟ ୟୁନିଟର ଲିଗାଲ୍ ସେଲର ମୁଖ୍ୟ ପ୍ରଣବ ଠକର କହିଥିଲେ ଯେ, କେଜ୍ରିୱାଲ ଏବଂ ସଞ୍ଜୟ ସିଂଙ୍କୁ କୋର୍ଟ ଜାରି କରିଥିବା ସମନ ଏପର୍ଯ୍ୟନ୍ତ ମିଳିନାହିଁ ।
ଗୁଜରାଟ ବିଶ୍ୱବିଦ୍ୟାଳୟର ଆଡଭୋକେଟ ମଙ୍ଗଳବାର ଦିନ ନୂତନ ବିଚାରପତି ଏସ.ଜେ ପାଞ୍ଚାଲଙ୍କୁ ଏହି ମାମଲାର ସୂଚନା ଦେଇଛନ୍ତି ଏବଂ କହିଛନ୍ତି ଯେ ତାଙ୍କ ପୂର୍ବ ନ୍ୟାୟାଧିଶ ଅଭିଯୁକ୍ତଙ୍କୁ ୨୩ ମେରେ ଅଦାଲତରେ ହାଜର ହେବାପାଇଁ କହିଥିଲେ । ଯାହାକି ଏପ୍ରିଲ ୧୫ ରେ ନୋଟିସ ହୋଇଥିଲା । ଯେହେତୁ କୋର୍ଟରେ କେହି ଉପସ୍ଥିତ ହୋଇ ନାହାଁନ୍ତି, ସେମାନେ ସମନ ଗ୍ରହଣ କରିଛନ୍ତି କି ନାହିଁ ତାହା ସ୍ପଷ୍ଟ ହୋଇନାହିଁ । ଏହା ଉପରେ ଜଜ୍ କର୍ମଚାରୀଙ୍କୁ ଏହା ଦେଖିବା ପାଇଁ କହିଥିଲେ ଏବଂ ପରେ କେଜ୍ରିୱାଲ ଏବଂ ସିଂଙ୍କୁ ପୁଣିଥରେ ସମନ କରିବାକୁ ନିର୍ଦ୍ଦେଶ ଦେଇଥିଲେ ।
