ଭୁବନେଶ୍ୱର ୦୭/୦୯: ଦୁଇ ଦୁଇ ଥର ପୁଲିସ୍ ସବ୍ ଇନ୍ସପେକ୍ଟର(ଏସ୍ଆଇ) ପରୀକ୍ଷା ବାତିଲ ପରେ ତୃତୀୟ ଥର ତାରିଖ ଧର୍ଯ୍ୟ ହୋଇଛି । ଆସନ୍ତା ଅକ୍ଟୋବର ୫ ଓ ୬ରେ ଏସ୍ଆଇ ପରୀକ୍ଷା ହେବ ବୋଲି ଓଡ଼ିଶା ପୁଲିସ୍ ରିକ୍ରୁଟମେଣ୍ଟ ବୋର୍ଡ ପକ୍ଷରୁ ବିଜ୍ଞପ୍ତି ଜାରି ହୋଇଛି । ପରୀକ୍ଷାର୍ଥୀମାନେ ସେପ୍ଟେମ୍ୱର ୨୦ ତାରିଖରୁ odishapolice.gov.in ରେ ଆଡମିଟ୍ କାର୍ଡ ଡାଉନ୍ଲୋଡ୍ କରିପାରିବେ ।
ପ୍ରଥମେ ସେପ୍ଟେମ୍ୱର ୨୧ ଓ ୨୨ ଦୁଇଦିନ ଧରି ଏସ୍ଆଇ ପରୀକ୍ଷା ହେବ ବାଲି ସ୍ଥିର ହୋଇଥିଲା । ଉକ୍ତ ତାରିଖରେ ଅନ୍ୟ ପରୀକ୍ଷା ଥିବାରୁ ଏହାକୁ ବୋର୍ଡ ପକ୍ଷରୁ ଘୁଞ୍ଚାଇ ଦିଆଯାଇଥିଲା । ସେପ୍ଟେମ୍ୱର ୨୧ ଓ ୨୨ ବଦଳରେ ଅକ୍ଟୋବର ୪ ଓ ୫ ତାରିଖକୁ ଧାର୍ଯ୍ୟ ହୋଇଥିଲା । କିଛି ପ୍ରମୁଖ ସହରରେ ୩ ଓ ୪ ତାରିଖରେ ଦୁର୍ଗାପୂଜା ଭସାଣି ରହିଛି । ସେଥିପାଇଁ ଏସ୍ଆଇ ପରୀକ୍ଷା ଅକ୍ଟୋବର ୪ ଓ ୫ ବଦଳରେ ୫ ଓ ୬ ତାରିଖକୁ ଧାର୍ଯ୍ୟ ହୋଇଛି । ତା’ଛଡା ଅକ୍ଟୋବର ୪ ତାରିଖ ଦିନ ଆଇବିପିଏସ୍ କ୍ଲରିକାଲ୍ ପରୀକ୍ଷା ରହିଛି । ଯେଉଁମାନେ ଏସ୍ଆଇ ଓ ଆଇବିପିଏସ୍ କ୍ଲରିକାଲ୍ ପରୀକ୍ଷା ଦେବାକୁ ଚାହିଁଥିବେ ସେମାନଙ୍କ ପାଇଁ ସମସ୍ୟା ରହିବ । ଏହାକୁ ନଜର ରଖି ତାରିଖ ଘୁଞ୍ଚାଯାଇଥିବା ଜଣାପଡ଼ିଛି ।
ସେପଟେ ଆସନ୍ତା ଅକ୍ଟୋବର ୬ ତାରିଖରେ ଗଜଲକ୍ଷ୍ମୀ ପୂଜା ରହିଛି । ଆଉ ୬ରେ ଏସ୍ଆଇ ପରୀକ୍ଷା ରହୁଛି । ତାରିଖ ବଦଳ ପାଇଁ ଦାବି ହେଉଛି । ଏସ୍ଆଇ ପରୀକ୍ଷା ପାଇଁ ରାଜ୍ୟର ବିଭିନ୍ନ ଜିଲ୍ଲାରେ ପରୀକ୍ଷା ସେଣ୍ଟର ହୋଇଛି । ପରୀକ୍ଷାର୍ଥୀମାନେ ଯେମିତି କୌଣସି ସମସ୍ୟାର ସମ୍ମୁଖୀନ ନ ହୁଅନ୍ତି ସେ ଦିଗରେ ପୁଲିସ୍ ରିକ୍ରୁଟମେଣ୍ଟ ବୋର୍ଡ ସବୁ ବ୍ୟବସ୍ଥା କରିଛି ।
