ହିନ୍ଦୀ ଏବଂ ବଙ୍ଗାଳୀ ଚଳଚ୍ଚିତ୍ରର ପ୍ରଖ୍ୟାତ ନିର୍ଦ୍ଦେଶକ ପ୍ରଦୀପ ସରକାରଙ୍କ ଦେହାନ୍ତ, ଦୀର୍ଘ ସମୟ ଧରି କିଡନୀ ଜନିତ ସମସ୍ୟାରେ ପୀଡିତ ଥିଲେ…
ନୂଆଦିଲ୍ଲୀ: ହିନ୍ଦୀ ଏବଂ ବଙ୍ଗାଳୀ ଚଳଚ୍ଚିତ୍ରର ପ୍ରଖ୍ୟାତ ନିର୍ଦ୍ଦେଶକ ପ୍ରଦୀପ ସରକାରଙ୍କର ଦେହାନ୍ତ ହୋଇଛି । ମୃତ୍ୟୁ ବେଳକୁ ତାଙ୍କର ବୟସ ୬୮ ବର୍ଷ ହୋଇଥିଲା । ସେ ଦୀର୍ଘ ସମୟ ଧରି କିଡନୀ ଜନିତ ସମସ୍ୟାରେ ପୀଡିତ ଥିଲେ ଏବଂ ତାଙ୍କର ଡାଏଲିସିସ୍ ମଧ୍ୟ ଚାଲିଥିଲା । କୁହାଯାଉଛି କି, ଗୁରୁବାର ବିଳମ୍ବିତ ରାତି ପ୍ରାୟ ୨.୩୦ ସମୟରେ ସେ ଅସୁବିଧା ଅନୁଭବ କରିଥିଲେ । ତାଙ୍କର ପୋଟାସିୟମ୍ ସ୍ତର ବହୁତ ନିମ୍ନ ସ୍ତରକୁ ଆସିଥିଲା । ଅବସ୍ଥା ଗୁରୁତର ହେବା ପରେ ତାଙ୍କୁ ରାତି ପ୍ରାୟ ୩ ଟା ସମୟରେ ମୁମ୍ବାଇର ଏକ ଡାକ୍ତରଖାନା ନିଆଯାଇଥିଲା । ଡାକ୍ତରଙ୍କ ବହୁ ଚେଷ୍ଟା ପରେ ମଧ୍ୟ ତାଙ୍କର ସ୍ବାସ୍ଥ୍ୟବସ୍ଥାରେ କୌଣସି ସୁଧାର ଆସି ପାରିଲା ନାହିଁ । ରାତି ସାଢେ ୩ଟା ରେ ତାଙ୍କର ମୃତ୍ୟୁ ହୋଇଥିଲା ।
କିଛି ସେଲିବ୍ରେଟି ପ୍ରଦୀପ୍ ସରକାରଙ୍କ ପରଲୋକକୁ ନେଇ ସୋସିଆଲ ମିଡିଆରେ ପୋଷ୍ଟ ସେୟାର କରି ଶୋକ ପ୍ରକାଶ କରିଛନ୍ତି । ନିର୍ଦ୍ଦେଶକ ଅଜୟ ଦେବଗନ୍ ଲେଖିଛନ୍ତି, ଆମଭଳି କିଛି ଲୋକଙ୍କ ପାଇଁ ପ୍ରଦୀପ ସରକାର ‘ଦାଦା’ ଙ୍କ ଦେହାନ୍ତ ଖବର ହଜମ କରିବା ଅତ୍ୟନ୍ତ କଷ୍ଟସାଧ୍ୟ । ମୁଁ ମୋର ଗଭୀର ସମବେଦନା ଜଣାଉଛି ।
ଆଜି ଅପରାହ୍ନରେ ପ୍ରଦୀପ୍ ସରକାରଙ୍କ ଅନ୍ତିମ ସଂସ୍କାର ସାନ୍ତାକ୍ରୁଜ୍ ଶବଦାହ ଗୃହରେ କରାଯିବ । ଚଳଚ୍ଚିତ୍ର ନିର୍ମାତା ସହିତ ସେ ଜଣେ ଜଣାଶୁଣା ବିଜ୍ଞାପନ ଚଳଚ୍ଚିତ୍ର ନିର୍ମାତା ମଧ୍ୟ ଥିଲେ । ଯାହା ପାଇଁ ସେ ଅନେକ ବଡ ପୁରସ୍କାର ଜିତିଥିଲେ । ପ୍ରଦୀପ ସରକାର ୨୦୦୫ ରେ ମୁକ୍ତିଲାଭ କରିଥିବା ‘ପରିଣୀତା’ ଫିଲ୍ମ ମାଧ୍ୟମରେ ବଲିଉଡ୍ ଏଣ୍ଟ୍ରି କରିଥିଲେ । ଯେଉଁଥିରେ ବିଦ୍ୟା ବାଲାନ, ସଞ୍ଜୟ ଦତ୍ତ ଏବଂ ସୈଫ ଅଲି ଖାନଙ୍କ ଭଳି ଷ୍ଟାର ଥିଲେ । ପରେ ସେ ରାନୀ ମୁଖାର୍ଜୀଙ୍କ ସହ ‘ଲଗା ଚୁନାରି ମେଁ ଦାଗ୍’, ‘ମରଦାନୀ’ ଏବଂ ‘ଲଫଙ୍ଗେ ପରିନ୍ଦେ’ ଭଳି ଚଳଚ୍ଚିତ୍ର କରିଥିଲେ ।
