ଭୁବନେଶ୍ୱର,୨୨/୧: କଂଗ୍ରେସରୁ ଇସ୍ତଫା ଦେଇଥିବା ବରଗଡ଼ ଜିଲ୍ଲାର ବରିଷ୍ଠ ନେତା ପ୍ରଣୟ ସାହୁ ଆଜି ବିଜେଡ଼ିରେ ଯୋଗ ଦେଇଛନ୍ତି । ନବୀନ ନିବାସଠାରେ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ସେ ଦଳରେ ଯୋଗ ଦେଇଛନ୍ତି । ଗତକାଲି ସେ କଂଗ୍ରେସରୁ ଇସ୍ତଫା ଦେଇଥିଲେ । ଇସ୍ତଫା ଦେବାର ଗୋଟିଏ ଦିନ ପରେ ସେ ଆଜି ବିଜେଡ଼ିରେ ଯୋଗ ଦେଇଛନ୍ତି ।
ସୂଚନାଯୋଗ୍ୟ ଯେ ଗତକାଲି ପ୍ରଣୟ ସାହୁ ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଥିଲେ । ଗତବର୍ଷ ବିଜେପୁରରେ ଉପନିର୍ବାଚନ ସେ କଂଗ୍ରେସର ପ୍ରାର୍ଥୀ ଥିଲେ । ବିଜେପୁର ଉପନିର୍ବାଚନ ପରେ ଦଳ ତାଙ୍କୁ ଅଣଦେଖା କରିବାରୁ ସେ ଇସ୍ତଫା ଦେଇଥିଲେ ବୋଲି ସେ ଜଣାଇଛନ୍ତି । ତେବେ ପ୍ରଣୟ ଶ୍ରୀକାନ୍ତ ଜେନାଙ୍କ ସମର୍ଥକ ଥିଲେ । ଶ୍ରୀକାନ୍ତ ଜେନାକୁ କଂଗ୍ରେସ ବହିଷ୍କାର କରିବା ପ୍ରତିବାଦରେ ସେ କଂଗ୍ରେସ ଛାଡ଼ିଥିବା ଆଲୋଚନା ହୋଇଥିଲା । ବର୍ତମାନ ପ୍ରଣୟ ବିଜେଡ଼ିରେ ଯୋଗ ଦେବା ପରେ ବିଜେପୁର ତଥା ବରଗଡ଼ ଜିଲ୍ଲା ବିଜେଡ଼ିର ସ୍ଥିତି ଆହୁରି ମଜବୁତ ହୋଇଥିବା କୁହାଯାଉଛି ।