ଆଠଗଡ଼, ୨୯/୦୮ : ଗର୍ଭବତୀଙ୍କ ସନ୍ଦେହଜନକ ମୃତ୍ୟୁ। ହତ୍ୟା ଅଭିଯୋଗରେ ସ୍ଵାମୀ ଓ ଶ୍ଵଶୁର ଗିରଫ। କଟକ ଜିଲ୍ଲା ତିଗିରିଆ ଥାନା ନୂଆପାଟଣା ଗାଁ ତେଲି ସାହିରେ ଏହି ଘଟଣା ଘଟିଛି। ଝିଅକୁ ବିଷ ପିଆଇ ଶାଶୁଘର ଲୋକ ହତ୍ୟା କରିଥିବା ମୃତକଙ୍କ ବାପା ଅଭିଯୋଗ କରିଛନ୍ତି।
ସୂଚନାନୁଯାୟୀ, ଗତ ୯ ବର୍ଷ ତଳେ ମାଣିଆବନ୍ଧ ଥାନା ଅଭିମାନପୁର ମୁକ୍ତା ନଗରର କଳ୍ପନା ଦତ୍ତ ତିଗିରିଆ ଥାନା ନୂଆପାଟଣା ତେଲି ସାହିର ଦୀପକ ଦତ୍ତଙ୍କୁ ବିବାହ କରିଥିଲେ। ଏହାରି ଭିତରେ କଳ୍ପନାଙ୍କ ଏକ ୭ ବର୍ଷର ଝିଅ ଥିବା ବେଳେ ଏବେ ସେ ୭ ମାସର ଗର୍ଭବତୀ ଥିଲେ। ହଠାତ୍ ଝିଅର ଦେହ ଖରାପ ଥିବା ଖବର ପାଇ କଳ୍ପନାଙ୍କ ବାପଘର ଲୋକେ ଆଠଗଡ଼ ଉପଖଣ୍ଡ ଡାକ୍ତରଖାନାରେ ପହଞ୍ଚି ଝିଅର ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ମାନସିକ ନିର୍ଯାତନା ଦେଇ ଝିଅକୁ ଶାଶୁ ଶ୍ଵଶୁର ବିଷ ପିଆଇ ହତ୍ୟା କରିଥିବା କଳ୍ପନାଙ୍କ ବାପା ତିଗିରିଆ ଥାନାରେ ଅଭିଯୋଗ କରିଥିଲେ। ଏହାପରେ ପୁଲିସ ମୃତଦେହ ଜବତ କରି ଆଠଗଡ଼ ସହକାରୀ ଜିଲ୍ଲାପାଳ ମାନସ ରଞ୍ଜନଙ୍କ ଉପସ୍ଥିତିରେ ଶବ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି। ହତ୍ୟା ଅଭିଯୋଗରେ ପୁଲିସ ମୃତକଙ୍କ ସ୍ଵାମୀ ଦୀପକ ଦତ୍ତ ଓ ଶ୍ୱଶୁର ପ୍ରହଲ୍ଲାଦ ଦତ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି।
