ପ୍ରେମୀ ଯୁଗଳଙ୍କ ଝୁଲନ୍ତା ମୃତଦେହ ଠାବ
ବଘିଆପଡା, ୦୬/୦୨ : ପ୍ରେମୀ ଯୁଗଳଙ୍କ ଝୁଲନ୍ତା ମୃତଦେହ ଠାବ । ବୌଦ୍ଧ ଥାନା ବଘିଆପଡା ଫାଣ୍ଡି ଗୌଡ଼ଦେଇ ଇଞ୍ଜିନିୟରିଂ କଲେଜ ପଛ ପାଖ ଜଙ୍ଗଲରୁ ଏକ ଗଛରେ ଉଭୟଙ୍କ ଝୁଲନ୍ତା ମୃତଦେହ ଠାବ ହୋଇଛି। ମୃତ ଯୁବକ ଜଣଙ୍କ ଜମୁପାଲିର ଅଜିତ ଭୋଇ ହୋଇଥିବା ବେଳେ ଯୁବତୀଙ୍କ ପରିଚୟ ମିଳୁନାହିଁ ।
ସୂଚନା ଅନୁଯାୟୀ, ବୌଦ୍ଧ ଜିଲ୍ଲା ବଘିଆପଡା ଫାଣ୍ଡି ଅନ୍ତର୍ଗତ ଜମୁପାଲିର ଅଜିତ ଭୋଇ ଜଣେ ବିବାହିତ ଯୁବକ। ତାଙ୍କର ଗୋଟିଏ ଝିଅ ଓ ପୁଅ ରହିଛି। ତେବେ ଅଜିତ କାମ କରିବାକୁ ତାମିଲନାଡୁ ଯାଇଥିବା ବେଳେ ସେଠାରେ ଜଣେ ଓଡ଼ିଆ ଯୁବତୀଙ୍କୁ ପ୍ରେମ କରି ଘରକୁ ଆଣିଥିଲେ । ଏହି କଥାକୁ ଘର ଲୋକ ଓ ସ୍ତ୍ରୀ ସହଜରେ ଗ୍ରହଣ କରି ନପାରି ତାଙ୍କ ସ୍ତ୍ରୀ ତାଙ୍କୁ ଛାଡି ବାପ ଘରକୁ ଚାଲିଯାଇଥିଲେ। ଅଜିତ ନିଜର ପ୍ରେମିକାଙ୍କ ସହ ରହୁଥିବା ଘର ଲୋକଙ୍କୁ ବି ପସନ୍ଦ ନଥିଲା। ତେବେ ଆଜି ସକାଳୁ ଗୌଡ଼ଦେଇ ସ୍ଥିତ ସରକାରୀ ଇଂଜିନିୟରିଂ କଲେଜ ପଛପଟ ଜଙ୍ଗଲରୁ ଉଭୟ ପ୍ରେମୀ ଯୁଗଳଙ୍କ ମୃତ ଦେହ ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଏନେଇ ପୁଲିସ ଖବର ପାଇ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
