ଜୁନାଗଡ଼ରେ ପ୍ରେସମିଟ ରାଜନୀତି ; ଯୋଜନାକୁ ନେଇ ବିଜେପି ଓ ବିଜେଡି ମଧ୍ୟରେ ଟଣା ଓଟରା  

ଜୁନାଗଡ଼, ୩୧/୩ :  କଳାହାଣ୍ଡି ଜିଲ୍ଲା ଜୁନାଗଡ଼ ଏନଏସି ରାଜନୀତି ଦିନକୁ ଦିନ ସରଗରମ ହେବାରେ ଲାଗିଛି । ଆଗାମୀ ୨୦୨୪ ସାଧାରଣ ନିର୍ବାଚନକୁ ନେଇ ଉଭୟ ବିଜେପି ଓ ବିଜେଡି ମୁହାଁମୁହିଁ ସ୍ଥିତିକୁ ଆସିଛନ୍ତି । ଗତକାଲି ବିଜେପି ପକ୍ଷରୁ ଏନଏସି ଅଧ୍ୟକ୍ଷ ମୁକେଶ ଅଗ୍ରୱାଲ ତାଙ୍କ ଦାୟିତ୍ୱ ନେବାର ଏକବର୍ଷ ପୂର୍ତ୍ତି ଉପଲକ୍ଷେ ଏକ ସାମ୍ବାଦିକ ସମ୍ମିଳନୀରେ ଜୁନାଗଡ଼ ସହରରେ ହେଉଥିବା ନୂଆ ବସଷ୍ଟାଣ୍ଡ ନିର୍ମାଣ, ଓଏଏସଆରଟିସି ବସଷ୍ଟାଣ୍ଡ, ଚିଲଡ୍ରେନ ପାର୍କ, ସାଧାରଣ ବଣ୍ଟନ ବ୍ୟବସ୍ଥାକୁ ତିନିଟି ଜାଗାରେ ବିଭାଗୀକରଣକରଣ, ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ନିର୍ମାଣ, ୧୧୬୫ଟି ଷ୍ଟ୍ରିଟ ଲାଇଟ, ୩୮୯ ଜଣଙ୍କୁ ଘରଡିହ ଆବଣ୍ଟନ, ୨ କଲ୍ୟାଣ ମଣ୍ଡପ, ଆହାର କେନ୍ଦ୍ର ରୋଷେଇଶାଳା, ୧୦୬୧ ଜଣଙ୍କୁ ଶୌଚାଳୟ ପ୍ରଦାନ ଆଦି ବିକାଶ ମୂଳକ କାର୍ଯ୍ୟକୁ ନେଇ ବିଷୟ ବସ୍ତୁ ଉପସ୍ଥାପନ କରିଥିଲେ ।

ହେଲେ ଆଜି ଏହାକୁ କାଉଣ୍ଟର କରିବା ପାଇଁ  ଜୁନାଗଡ଼ ବିଧାୟକ ଦିବ୍ୟ ଶଙ୍କର ମିଶ୍ରଙ୍କ ନିର୍ଦେଶକ୍ରମେ ବିଜେଡି ପକ୍ଷରୁ ଏନଏସି ଉପାଧ୍ୟକ୍ଷ ହିମାଦ୍ରୀ ନାଏକଙ୍କ ଅଧ୍ୟକ୍ଷତାରେ ପୂର୍ବତନ ଚେୟାରମ୍ୟାନ ମହେଶ ସାହୁ ଆଜି ଏକ ସାମ୍ବାଦିକ ସମ୍ମିଳନୀ କରିଥିଲେ । ଗତକାଲି ଅଧ୍ୟକ୍ଷ ସାମ୍ବାଦିକ ସମ୍ମିଳନୀରେ ଯେଉଁ ସବୁ କାର୍ଯ୍ୟ ଖସଡ଼ାର ବିବରଣୀ ପ୍ରଦାନ କରିଥିଲେ ତାହା ଅମୂଳକ ବୋଲି ବିଜେଡି ପକ୍ଷରୁ ବିଷାଦଗାର କରାଯାଇଥିଲା । ଆଗାମୀ ନିର୍ବାଚନ ୨୦୨୪କୁ ନେଇ ଜୁନାଗଡ଼ ସହରାଞ୍ଚଳରେ ଉଭୟ ବିଜେପି ବିଜେଡିର ତୁତୁ ମେ ମେ, ବାହା ବା ରାଜନୀତିକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ଚର୍ଚ୍ଚାର ବିଷୟ ହେବାରେ ଲାଗିଛି ।

ଏହି ସାମ୍ବାଦିକ ସମ୍ମିଳନୀରେ ବର୍ତ୍ତମାନର ୮ଜଣ କାଉନସିଲର ମଧ୍ୟ ଉପସ୍ଥିତଥିଲେ l ସୂଚାଯୋଗ୍ୟ ଯେ, ଜୁନାଗଡ଼   ଏନଏସିରେ ମୋଟ ୧୨ଟି ୱାର୍ଡରୁ ବିଜେଡିର ୧୦ଜଣ କାଉନସିଲର ଥିବାବେଳେ ବିଜେପିର ୨ଜଣ କାଉନସିଲର ଅଛନ୍ତି l ଅଧ୍ୟକ୍ଷ ପଦ ପାଇଁ ଏ ବର୍ଷ ଡ଼ାଇରେକ୍ଟ ଇଲେକ୍ସନ ହୋଇଥିଲା । ଏଥିରେ ଅଧ୍ୟକ୍ଷ ପଦ ବିଜେପି ହାତକୁ ଯାଇଥିବାରୁ ବିଜେଡି ଓ ବିଜେପି ମଧ୍ୟରେ ତୁ ତୁ ମେ ମେ ଚାଲିଛି ।