କୋକସରା,୩୦/୦୮:କଳାହାଣ୍ଡି ଜିଲ୍ଲା କୋକସରା ବ୍ଲକ ଡେଙ୍ଗାଗୁଡା ବୋବରିଆ କେନାଲ ଚାଷ ଜମି ନିକଟରେ ବୁଲୁଥିଲା ବିଶାଳକାୟ ଅଜଗର । ଅଜଗରଟିକୁ ଉଦ୍ଧାର କଲା ଧର୍ମଗଡ ବନବିଭାଗର ଟିମ୍। ଉଦ୍ଧାର ହୋଇଥିବା ଅଜଗରଟିର ଲମ୍ୱ ୧୧ ଫୁଟ ରହିଛି ।
ସୂଚନା ମୁତାବକ, ଶନିବାର ସକାଳୁ କିଛି ସ୍ଥାନୀୟ ଲୋକେ ଚାଷ ଜମି ନିକଟରେ ଅଜଗରଟିକୁ ଦେଖିଥିଲେ । ଯାହାକୁ ନେଇ ସେମାନେ ଜଙ୍ଗଲ ବିଭାଗ କର୍ମଚାରୀଙ୍କୁ ସୂଚନା କରିଥିଲେ। ଖବର ମିଳିବା ପରେ ଆମପାଣି ଫରେଷ୍ଟ ସେକ୍ସନର କର୍ମଚାରୀ ସମେତ ଧର୍ମଗଡ ବନାଞ୍ଚଳ ଜୀବଜନ୍ତୁ ଉଦ୍ଧାରକାରୀ ଦଳର ସଦସ୍ୟ ସ୍ୱାଧୀନ ଦଣ୍ଡସେନା ଆସି କେନାଲରୁ ସୁରକ୍ଷିତ ଅବସ୍ଥାରେ ଅଜଗରକୁ ଉଦ୍ଧାର କରିଛନ୍ତି। ଉଦ୍ଧାର ହୋଇଥିବା ଅଜଗର ୧୦/୧୧ ବର୍ଷ ହୋଇଥିବା ବେଳେ ପ୍ରାୟ ୧୧ ଫୁଟ ଲମ୍ବ ଥିବା ଜଣାପଡିଛି। ତେବେ ଏତେବଡ ଅଜଗର ଉଦ୍ଧାର ଘଟଣା ଏହି ଅଞ୍ଚଳରେ ପ୍ରଥମ ଥର ଦେଖିବାକୁ ମିଳିଛି। ପରେ ଉଦ୍ଧାର ଅଜଗର ସାପକୁ ସାହାଜଖୋଲ ଜଙ୍ଗଲରେ ଛଡା ଯାଇଥିବାନେଇ ଜଙ୍ଗଲ ବିଭାଗ କର୍ମଚାରୀମାନେ ସୂଚନା ଦେଇଛନ୍ତି।
