ନୂଆଦିଲ୍ଲୀ, ୨୦।୩: କୋରାଲ ସାଗରରେ ସୃଷ୍ଟି ହୋଇଥିବା ଭୟଙ୍କର ସାମୁଦ୍ରିକ ଝଡ଼ 'ନରେଲ୍' ବର୍ତ୍ତମାନ କ୍ୟାଟେଗୋରୀ-୫ ରୂପ ନେଇ କୁଇନ୍ସଲ୍ୟାଣ୍ଡ ଉପକୂଳ ଆଡ଼କୁ ମାଡ଼ି ଆସୁଛି । ଏହି ବାତ୍ୟା ବର୍ତ୍ତମାନ କୁକଟାଉନ୍ଠାରୁ ପ୍ରାୟ ୩୫୦ କିଲୋମିଟର ଦୂରରେ କେନ୍ଦ୍ରୀଭୂତ ରହିଛି । ବାତ୍ୟାର କେନ୍ଦ୍ରସ୍ଥଳରେ ପବନର ସ୍ଥିର ବେଗ ଘଣ୍ଟାପ୍ରତି ୨୦୫ କିଲୋମିଟର ରହିଥିବା ବେଳେ, ଝଟକା ପବନର ବେଗ ୨୮୫ କିଲୋମିଟର ପର୍ଯ୍ୟନ୍ତ ପହଞ୍ଚୁଛି । ଏହା ଘଣ୍ଟାପ୍ରତି ୨୬ କିଲୋମିଟର ବେଗରେ 'କେପ୍ ୟର୍କ' ଆଡ଼କୁ ବଢ଼ୁଛି । ଶୁକ୍ରବାର ସକାଳେ ଏହା ଲକହାର୍ଟ ରିଭର ଏବଂ କେପ୍ ମେଲଭିଲ୍ ମଧ୍ୟରେ ସ୍ଥଳଭାଗ ଅତିକ୍ରମ କରିବାର ସମ୍ଭାବନା ଅଛି । ସ୍ଥଳଭାଗ ଛୁଇଁବା ବେଳେ ଏହାର ତୀବ୍ରତା ସାମାନ୍ୟ କମି 'କ୍ୟାଟେଗୋରୀ-୪' ରେ ରହିପାରେ ।
ଏହା ବି ପଢ଼ନ୍ତୁ... ବିଶ୍ୱକୁ ଘାରିଛି ଭୋକର ଭୟ ! ମଧ୍ୟପ୍ରାଚ୍ୟରୁ ସାର ରପ୍ତାନି ବନ୍ଦ, ଆକାଶଛୁଆଁ ହେଲାଣି ୟୁରିଆ ମୂଲ୍ୟ
କାହିଁକି ଏତେ ଶକ୍ତିଶାଳୀ ହେଲା 'ନରେଲ୍' ?
ସମୁଦ୍ର ପତ୍ତନର ତାପମାତ୍ରା ସ୍ୱାଭାବିକଠାରୁ ୦.୫ ରୁ ୧.୦°C ଅଧିକ ରହିବା କାରଣରୁ ଏହି ବାତ୍ୟା ଖୁବ୍ ଶୀଘ୍ର ଭୟଙ୍କର ରୂପ ଧାରଣ କରିଛି । ସାଧାରଣତଃ କୋରାଲ ସାଗରରେ ସୃଷ୍ଟି ହେଉଥିବା ବାତ୍ୟାର ଗତିପଥ ଅନିଶ୍ଚିତ ଥାଏ, କିନ୍ତୁ 'ନରେଲ୍' ଏକ ନିର୍ଦ୍ଦିଷ୍ଟ ପଶ୍ଚିମ ଦିଗରେ ଗତି କରୁଥିବାରୁ ଏହାକୁ ପାଣିପାଗ ବିଜ୍ଞାନୀମାନେ ଅସ୍ୱାଭାବିକ ବୋଲି କହୁଛନ୍ତି । ପ୍ରିନ୍ସେସ୍ ଚାର୍ଲୋଟ୍ ବେ ଅଞ୍ଚଳରେ ସମୁଦ୍ର ଜୁଆର ସ୍ୱାଭାବିକଠାରୁ ବହୁତ ଉଚ୍ଚକୁ ଉଠିପାରେ । ଫଳରେ ଉପକୂଳବର୍ତ୍ତୀ ଅଞ୍ଚଳରେ ଗୁରୁତର ସାମୁଦ୍ରିକ ବନ୍ୟା ପରିସ୍ଥିତି ସୃଷ୍ଟି ହେବାର ଆଶଙ୍କା ରହିଛି । ଏହି ବାତ୍ୟାକୁ ୧୮୯୯ ମସିହାର ବିନାଶକାରୀ ବାତ୍ୟା 'ମାହିନା' ସହ ତୁଳନା କରାଯାଉଛି ।
ପରବର୍ତ୍ତୀ ପ୍ରଭାବ:
୧. କୋଏନ୍: ଏହି ଛୋଟ ସହରଟି ବାତ୍ୟାର ସିଧାସଳଖ ଟାର୍ଗେଟ୍ରେ ରହିଛି ।
୨. ଉତ୍ତର ଅଞ୍ଚଳ: ସ୍ଥଳଭାଗ ଅତିକ୍ରମ କରିବା ପରେ ଏହା କ୍ୟାଟେଗୋରୀ-୨ କୁ ଦୁର୍ବଳ ହୋଇଯିବ, କିନ୍ତୁ କାର୍ପେଣ୍ଟାରିଆ ଗଲ୍ଫର ଉଷ୍ମ ଜଳରାଶି ସଂସ୍ପର୍ଶରେ ଆସି ପୁଣି ଥରେ ଶକ୍ତିଶାଳୀ ହୋଇପାରେ ।
୩. କିମ୍ବରଲି ଉପକୂଳ: ଆସନ୍ତା ସପ୍ତାହ ବେଳକୁ ଏହା ପଶ୍ଚିମ ଅଷ୍ଟ୍ରେଲିଆର କିମ୍ବରଲି ଉପକୂଳ ଦେଇ ଭାରତ ମହାସାଗର ଆଡ଼କୁ ଚାଲିଯିବ ।
'ନରେଲ୍' ଏକ କମ୍ପାକ୍ଟ ବାତ୍ୟା ହୋଇଥିବାରୁ ଏହାର କେନ୍ଦ୍ରସ୍ଥଳରୁ ୫୦ କିଲୋମିଟର ପର୍ଯ୍ୟନ୍ତ ଅତ୍ୟନ୍ତ ବିନାଶକାରୀ ପବନ ବହିବ । ୧୯୭୪ର 'ଟ୍ରେସି' ଏବଂ ୨୦୦୬ର 'ଲ୍ୟାରି' ବାତ୍ୟା ଭଳି ଏହା ବଡ଼ ଧରଣର କ୍ଷୟକ୍ଷତି କରିବାର କ୍ଷମତା ରଖିଛି ।
