ନୂଆଦିଲ୍ଲୀ,୦୪ /୧୦: ସ୍ପୋଟିଫାଏ, ୟୁଟ୍ୟୁବ୍ ଓ ଅନ୍ୟ ଡିଜିଟାଲ ସଙ୍ଗୀତ ଦୁନିଆରେ ରେଡିଓ ପୁରୁଣା ହୋଇଯାଇଛି । କିନ୍ତୁ ଉତ୍ତରପ୍ରଦେଶର ଅମରୋହା ଜିଲ୍ଲାର ଗଜରୌଲା ବାସିନ୍ଦା ରାମ ସିଂହ ବୌଧଙ୍କ ପାଇଁ ନୁହେଁ । ରେଡିଓ ସଂଗ୍ରହ ଜରିଆରେ ସେ ଗିନିଜ୍ ବିଶ୍ୱ ରେକର୍ଡସ୍ରେ ସ୍ଥାନ ପାଇଛନ୍ତି । ବୌଧଙ୍କ ପାଖରେ ୧୯୨୦ରୁ ୨୦୧୦ ମସିହା ପର୍ଯ୍ୟନ୍ତର ବିଭିନ୍ନ ମଡେଲର ରେଡିଓ ରହିଛି । ଦେଶର ବିଭିନ୍ନ ବଜାରରୁ ସେ ଏହି ରେଡିଓ କିଣିଛନ୍ତି । ତାଙ୍କ ପାଖରେ ୧୪୦୦ ରେଡିଓ ରହିଛି । କିନ୍ତୁ ଗିନିଜ୍ ମାର୍ଗଦର୍ଶିକା ଅନୁସାରେ, ସମସ୍ତ ରେଡିଓ ଅନନ୍ୟ ହେବା ଉଚିତ୍ । ତେଣୁ ୧୪୦୦ ରେଡିଓ ମଧ୍ୟରୁ ଏକାଭଳି ରେଡିଓକୁ ହଟାଇବା ପରେ ବୌଧଙ୍କ ସଂଗ୍ରହରେ ମୋଟ ୧,୨୫୭ ରେଡିଓ ରହିଲା । ଏହା ଜରିଆରେ ସେ ଗିନିଜ୍ ବିଶ୍ୱ ରେକର୍ଡସ୍ରେ ସ୍ଥାନ ପାଇଲେ । ଏଥିସହିତ ୬୨୫ ରେଡିଓ ସଂଗ୍ରହ କରି ପୂର୍ବରୁ ରେକର୍ଡ କରିଥିବା ଏମ୍ ପ୍ରକାଶଙ୍କ ରେକର୍ଡ ସେ ଭାଙ୍ଗିଛନ୍ତି ।
ଘରେ ରେଡିଓ ସଂଗ୍ରହାଳୟ କରିବାର ଉଦ୍ଦେଶ୍ୟ ବିଷୟରେ ବୌଧ କହିଛନ୍ତି, ସମାଜ ଉପରେ ରେଡିଓର ପ୍ରଭାବ ସମ୍ପର୍କରେ ସେ ଉତ୍ତର ପିଢ଼ିଙ୍କୁ ସଚେତନ କରିବାକୁ ଚାହୁଁଛନ୍ତି । ୧୦ ବର୍ଷ ତଳେ, ୨୦୧୪ ମସିହା, ଅକ୍ଟୋବର ୩ ତାରିଖରେ ପ୍ରଧାନମନ୍ତ୍ରୀ ମୋଦି ‘ମନ୍ କି ବାତ୍’ କାର୍ଯ୍ୟକ୍ରମ ଆରମ୍ଭ କରି ରେଡିଓ ଓ ଆକାଶବାଣିକୁ ନୂଆ ଜୀବନ ଦେଇଥିଲେ । ୨୦୨୩, ନଭେମ୍ବରରେ ମାସିକ ମନ୍ କି ବାତ୍ ରେଡିଓ କାର୍ଯ୍ୟକ୍ରମରେ ସେ ବୌଧଙ୍କ ଅନନ୍ୟ ପ୍ରୟାସକୁ ମାନ୍ୟତା ଦେଇଥିଲେ । କାର୍ଯ୍ୟକ୍ରମରେ ମୋଦି ବୌଧଙ୍କର ଚିଠିକୁ ଲୋକଲୋଚନକୁ ଆଣିଥିଲେ । ଚିଠିରେ ବୌଧ କହିଥିଲେ, ମନ୍ କି ବାତ୍ ପରେ ତାଙ୍କ ରେଡିଓ ସଂଗ୍ରହାଳୟକୁ ନେଇ ଲୋକଙ୍କ କୌତୁହଳ ବଢ଼ିଛି । ଚଳିତ ବର୍ଷ ନୂଆଦିଲ୍ଲୀଠାରେ ଅନୁଷ୍ଠିତ ସାଧାରଣତନ୍ତ୍ର ଦିବସ ପରେଡ୍ରେ ବୌଧଙ୍କୁ ଅତିଥି ରୂପେ ଆମନ୍ତ୍ରଣ କରାଯାଇଥିଲା । ୱେୟାରହାଉସ୍ କର୍ପୋରେସନ୍ ଅଫ୍ ଇଣ୍ଡିଆର ସୁପରଭାଇଜର ପୋଷ୍ଟ୍ରୁ ବୌଧ ଅବସର ନେଇଛନ୍ତି ।
