୨ ବର୍ଷର ଦଣ୍ଡ ପରେ ରାହୁଲ ଗାନ୍ଧୀଙ୍କ ସଦସ୍ୟତା ଚାଲିଯିବ କି? ୬ ବର୍ଷ ପାଇଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା ଉପରେ ଲାଗିବ କି ପ୍ରତିବନ୍ଧକ? ଜାଣନ୍ତୁ କ’ଣ କହୁଛି ଆଇନ
Image Courtesy: Jansatta
ନୂଆଦିଲ୍ଲୀ,୨୩/୦୩: ରାହୁଲ ଗାନ୍ଧୀଙ୍କୁ ସୁରଟ କୋର୍ଟରୁ ଏକ ବଡ଼ ଝଟ୍କା ଲାଗିଛି। ମୋଦୀଙ୍କ ସାଙ୍ଗିଆକୁ ନେଇ ତାଙ୍କ ବିରୁଦ୍ଧରେ ଚାଲିଥିବା ମାନହାନୀ ମାମଲାରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରି ୨ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ୨୦୧୯ରେ କର୍ଣ୍ଣାଟକରେ ଲୋକସଭା ନିର୍ବାଚନ ସମୟରେ ରାହୁଲ ଗାନ୍ଧୀ ଏହି ମନ୍ତବ୍ୟ ଦେଇଥିଲେ। ଉଚ୍ଚ ନ୍ୟାୟାଳୟରେ ଆବେଦନ କରିବାକୁ ରାହୁଲ ଗାନ୍ଧୀଙ୍କୁ ୩୦ ଦିନ ସମୟ ଦିଆଯାଇଛି। ଏହି ସମୟ ମଧ୍ୟରେ ଏହି ଦଣ୍ଡ ତାଙ୍କ ପାଇଁ ଲାଗୁ ହେବ ନାହିଁ। ଏହାର ଅର୍ଥ କୋର୍ଟ ତାଙ୍କୁ ଏକ ମାସ ପାଇଁ ଜାମିନ ପ୍ରଦାନ କରିଛନ୍ତି। ରାହୁଲ ଗାନ୍ଧୀଙ୍କୁ ୨ ବର୍ଷ ଦଣ୍ଡ ମିଳିବା ପରେ ତାଙ୍କ ଲୋକସଭା ସଦସ୍ୟତା ଉପରେ ସଙ୍କଟ ମଧ୍ୟ ଆହୁରି ଗଭୀର ହୋଇଛି।
କ‘ଣ କହୁଛି ଆଇନ?
ଲୋକ ପ୍ରତିନିଧୀ ଆଇନ ଅନୁଯାୟୀ, ଯଦି କୌଣସି ସାଂସଦ କିମ୍ବା ବିଧାୟକଙ୍କୁ ୨ କିମ୍ବା ୨ ବର୍ଷରୁ ଅଧିକ ଦଣ୍ଡିତ କରାଯାଏ, ତେବେ ସେମାନଙ୍କର ସଦସ୍ୟତା (ସଂସଦ ଏବଂ ବିଧାନସଭାରୁ) ବାତିଲ ହୋଇଯିବ। କେବଳ ଏତିକି ନୁହେଁ, ସେ ଏହି ସଜା ସରିବାର ୬ ବର୍ଷ ପର୍ଯ୍ୟନ୍ତ ନିର୍ବାଚନ ମଧ୍ୟ ଲଢ଼ିବାକୁ ଅଯୋଗ୍ୟ ଅଟନ୍ତି। ଏହି ଆଇନର ଧାରା ୭ (ଗ) ରେ କୁହାଯାଇଛି ଯେ ଯଦି ଦୋଷୀ ସାବ୍ୟସ୍ତ ହୋଇ ଦୁଇ ବର୍ଷରୁ କମ୍ ଜେଲ ଦଣ୍ଡ ଭୋଗନ୍ତି ତେବେ ସଂସଦର ଜଣେ ସଦସ୍ୟ ଭାବରେ ତାଙ୍କୁ ଅଯୋଗ୍ୟ କୁହାଯାଇପାରିବେ।
ଚାଲିଯିବ କି ରାହୁଲ ଗାନ୍ଧୀଙ୍କ ସଦସ୍ୟତା?
ଏହି ଆଇନର ଧାରା ୮ (ଘ) ରେ ମଧ୍ୟ କୁହାଯାଇଛି ଯେ ଦୋଷୀ ସାବ୍ୟସ୍ତ ହେବାର ତିନି ମାସ ପରେ ସମ୍ପୃକ୍ତ ନେତାଙ୍କୁ ଅଯୋଗ୍ୟ ଘୋଷଣା କରାଯିବ। ତେବେ ୨୦୧୩ ରେ ସୁପ୍ରିମକୋର୍ଟ ଏହି ଧାରାକୁ ଏହି ଧାରାକୁ ଖଣ୍ଡନ କରିଥିଲେ। ଏହାର ଅର୍ଥ କେବଳ ଏକ ଆବେଦନ ଦାଖଲ କଲେ କିଛି ହେବ ନାହିଁ। ଦୋଷୀ ସାଂସଦଙ୍କୁ ଟ୍ରାଏଲ କୋର୍ଟର ଦଣ୍ଡ ବିରୋଧରେ ଏକ ନିର୍ଦ୍ଦିଷ୍ଟ ଆଦେଶ ସୁରକ୍ଷିତ କରିବାକୁ ପଡ଼ିବ। ଯଦି ଏହି ସୂଚନା ସୁରଟ କୋର୍ଟରୁ ଲୋକସଭା ସଚିବାଳୟକୁ ପଠାଯାଏ ଏବଂ ଲୋକସଭାର ବାଚସ୍ପତି ଏହାକୁ ଗ୍ରହଣ କରନ୍ତି, ତେବେ ରାହୁଲ ଗାନ୍ଧୀଙ୍କ ସଦସ୍ୟତା ଶେଷ ହୋଇଯିବ। କେବଳ ଏତିକି ନୁହେଁ, ଦଣ୍ଡ ଶେଷ ହେବା ପରେ ସେ ୬ ବର୍ଷ ପର୍ଯ୍ୟନ୍ତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ।
ସମ୍ପୁର୍ଣ୍ଣ ମାମଲା କ‘ଣ?
୨୦୧୯ ଲୋକସଭା ନିର୍ବାଚନରେ ଏକ ରାଲିରେ ରାହୁଲ ଗାନ୍ଧୀ କହିଥିଲେ ଯେ ସବୁ ଚୋରଙ୍କ ସାଙ୍ଗିଆ ମୋଦୀ କାହିଁକି ଅଟେ। ନିରବ ମୋଦୀ, ଲଲିତ ମୋଦୀ, ନରେନ୍ଦ୍ର ମୋଦୀଙ୍କ ସାଙ୍ଗିଆ କାହିଁକି ଏତେ ସାଧାରଣ? ତେବେ ତମାମ ମାମଲାରେ ରାହୁଲ ଗାନ୍ଧୀ ତିନିଥର କୋର୍ଟରେ ହାଜର ହୋଇଥିଲେ। କର୍ଣ୍ଣାଟକର ତତ୍କାଳୀନ ନିର୍ବାଚନ ଅଧିକାରୀ ଏବଂ ନିର୍ବାଚନ ଆୟୋଗର ଭିଡିଓ ରେକର୍ଡର ବୟାନ କୋର୍ଟରେ ଦାଖଲ କରାଯାଇଛି। ରାହୁଲ ଗାନ୍ଧୀଙ୍କୁ ଆଇପିସିର ଧାରା ୪୯୯ ଏବଂ ୫୦୦ ଅନୁଯାୟୀ ଦୋଷୀ ସାବ୍ୟସ୍ତ କରାଯାଇଛି।
