ବିବାଦୀୟ ବୟାନ ଦେଇ ପୁଣି ଅଡ଼ୁଆରେ ରାହୁଲ ଗାନ୍ଧୀ; ଆର୍ଏସ୍ଏସ୍କୁ କହିଲେ ‘ଏକବିଂଶ ଶତାବ୍ଦୀର କୌରବ’
Image Courtesy: PTI
ନୂଆଦିଲ୍ଲୀ,୩୧/୦୩: ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଅଡ଼ୁଆ କମିବା ପରି ମନେ ହେଉନାହିଁ। ମୋଦୀଙ୍କ ଉପନାମ ସମ୍ପର୍କରେ ଦିଆଯାଇଥିବା ବିବୃତ୍ତିକୁ ନେଇ ଉତ୍ତେଜନା ଏପର୍ଯ୍ୟନ୍ତ ଥମିନଥିବା ବେଳେ ସେପଟେ ଆଉ ଏକ ବିବାଦୀୟ ବିବୃତ୍ତି ରାହୁଲଙ୍କ ପାଇଁ ଅସୁବିଧା ସୃଷ୍ଟି କରିଛି। ଭାରତ ଯୋଡ଼ୋ ଯାତ୍ରା ସମୟରେ ସେ ଏହି ବିବୃତ୍ତି ଦେଇଥିଲେ। ତାଙ୍କ ବିବୃତ୍ତି ବିରୋଧରେ ମାନହାନି ମକଦ୍ଦମା ଦାୟର କରାଯାଇଛି। ସୂଚନାଥାଉକି, ଜାନୁଆରୀରେ ଭାରତ ଯୋଡୋ ଯାତ୍ରା ସମୟରେ ରାହୁଲ ଗାନ୍ଧୀ ରାଷ୍ଟ୍ରୀୟ ସ୍ବୟମ୍ ସେବକ ସଂଘକୁ କୌରବଙ୍କ ସହ ତୁଳନା କରି ଏହାକୁ ଏକବିଂଶ ଶତାବ୍ଦୀର କୌରବ ବୋଲି ବିବେଚନା କରିଥିଲେ। ତେବେ ଏହି ବିବାଦୀୟ ବୟାନ ପରେ ତାଙ୍କ ବିରୁଦ୍ଧରେ ହରିଦ୍ୱାର କୋର୍ଟରେ ମାନହାନୀ ମାମଲା ରୁଜୁ ହୋଇଛି।
ତେବେ ତମାମ ଅଭିଯୋଗ ଓକିଲ ଅରୁଣ ଭଦୋରିଆଙ୍କ ପକ୍ଷରୁ ଦାଖଲ କରାଯାଇଛି। ଓକିଲ ଭଦୋରିଆ ଜଣେ ଆରଏସ୍ଏସ୍ ସ୍ବେଚ୍ଛାସେବୀ ଭାବରେ କାର୍ଯ୍ୟ କରନ୍ତି। ଏପ୍ରିଲ ୧୨ ରେ କୋର୍ଟ ଏହି ମାମଲାର ଶୁଣାଣି କରିବେ। ରାହୁଲ ଗାନ୍ଧୀଙ୍କ ବିରୋଧରେ ମାମଲା ଆଇପିସିର ଧାରା ୪୯୯ ଏବଂ ୫୦୦ ଅନୁଯାୟୀ ପଞ୍ଜିକୃତ ହୋଇଛି।
କ‘ଣ ଥିଲା ରାହୁଲ ଗାନ୍ଧୀଙ୍କ ବୟାନ:
ରାହୁଲ ଗାନ୍ଧୀ ଏହି ବୟାନ କୁରୁକ୍ଷେତ୍ରରେ ଭାରତ ଯୋଡ଼ୋ ଯାତ୍ରା ସମୟରେ ଦେଇଥିଲେ। ରାହୁଲ ଗାନ୍ଧୀ ଆରଏସଏସର ତୁଳନା ଏକବିଂଶ ଶତାବ୍ଦୀର କୌରବଙ୍କ ସହିତ କରିଥିଲେ। ସେ କହିଥିଲେ ଯେ, ‘ଏକବିଂଶ ଶତାବ୍ଦିର କୌରବମାନେ ଅଧା ଖାକି ପ୍ୟାଣ୍ଟ ପିନ୍ଧନ୍ତି, ହାତରେ ବାଡ଼ି ଠିଆ ହୁଅନ୍ତି ଓ ନୂଆ ନୂଆ ଶାଖା ଖୋଲନ୍ତି। ତାଙ୍କ ସହ ୨-୩ଜଣ ବିଲିୟନେୟାର ଠିଆ ହୋଇଛନ୍ତି। ସୂଚନା ଅନୁଯାୟୀ, ଜାନୁଆରୀ ୧୧ ରେ ରାହୁଲ ଗାନ୍ଧୀଙ୍କୁ ଏକ ଆଇନଗତ ନୋଟିସ ପଠାଯାଇଥିଲା, ଯାହାକୁ ନେଇ ସେ କୌଣସି ପ୍ରତିକ୍ରିୟା ଦେଇନାହାଁନ୍ତି। ଓକିଲ ଭଦୋରିଆ ଏହି ନୋଟିସ ପଠାଇଛନ୍ତି।
ତେବେ ୨୦୧୯ ମସିହାରେ ମୋଦୀ ଉପନାମ ସମ୍ପର୍କିତ ବିବାଦୀୟ ବିବୃତ୍ତିରେ ମାନହାନୀ ମକଦ୍ଦମାରେ ରାହୁଲଙ୍କୁ ୨ ବର୍ଷ ଦଣ୍ଡିତ ହେବା ପରେ ଏହି ଖବର ସାମ୍ନାକୁ ଆସିଛି। ଏହା ପରେ ଲୋକସଭାରୁ ତାଙ୍କ ସଦସ୍ୟତା ମଧ୍ୟ ବାତିଲ କରାଯାଇଥିଲା। ୨୦୧୯ ରେ ଲୋକସଭା ନିର୍ବାଚନ ସମୟରେ ସେ ଏହି ବିବୃତ୍ତି ଦେଇଥିଲେ। ଏଥିରେ ସେ ‘ସବୁ ମୋଦୀ ସଜ୍ଞାଧାର ଚୋର’ ବୋଲି ସମ୍ବୋଧନ କରି ବିବାଦଘେରକୁ ଆସିଥିଲେ।
.
