ନୂଆଦିଲ୍ଲୀ,୧୫।୩: ଆମେଥି ନିର୍ବାଚନ ମଣ୍ଡଳୀରୁ ୩ଥର ସାଂସଦ ହୋଇ ସାରିଥିବା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଏଥର ଆଉ ଏକ ଆସନରୁ ନିର୍ବାଚନ ଲଢିପାରନ୍ତି। ଚଳିତ ସାଧାରଣ ନିର୍ବାଚନରେ ରାହୁଲ ଗାନ୍ଧୀ ୨ଟି ନିର୍ବାଚନମଣ୍ଡଳୀରୁ ପ୍ରାର୍ଥୀପତ୍ର ଦାଖଲ କରିବା ନେଇ ଚର୍ଚ୍ଚା ହେଉଛି। ଦକ୍ଷିଣ ଭାରତର କୌଣସି ରାଜ୍ୟରୁ ରାହୁଲ ଗାନ୍ଧୀ ନିର୍ବାଚନ ଲଢ଼ିବା ପାଇଁ ଦଳ ଭିତରୁ ଦାବି ହୋଇଆସୁଛି। ତେବେ ଦଳ କିମ୍ବା କଂଗ୍ରେସ ଅଧ୍ୟକ୍ଷ ନିଜେ କିଛି ଏ ବାବଦରେ ପ୍ରତିକ୍ରିୟା ରଖିନାହାନ୍ତି। ଦକ୍ଷିଣ ଭାରତରେ ନିର୍ବାଚନ ଲଢିବା ଚର୍ଚ୍ଚା ପୂର୍ବରୁ ଶୁଣିବାକୁ ମିଳିଥିଲା ଯେ ରାହୁଲ ମହାରାଷ୍ଟ୍ରର ନାନ୍ଦେଡରୁ କିମ୍ବା ମଧ୍ୟପ୍ରଦେଶର କୌଣସି ସଂରକ୍ଷିତ ଆସନରୁ ଲୋକସଭା ନିର୍ବାଚନ ଲଢିପାରନ୍ତି

ରାହୁଲ ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଦାଙ୍କ ଅନୁସରଣ କରିଛନ୍ତି। ସୂଚନାଯୋଗ୍ୟ, ଗତ ସାଧାରଣ ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୁଇଟି ଆସନରୁ ନିର୍ବାଚନ ଲଢିଥିଲେ। ଉଭୟ ଆସନରୁ ଜିତିବା ପରେ ଗୁଜରାଟ ଭଦୋଦରା ଆସନ ଛାଡ଼ିଦେଇ ଥିଲେ। ତେବେ ଚଳିତଥର କେବଳ ଉତ୍ତର ପ୍ରଦେଶ ବାରଣାସୀରୁ ମୋଦି ପ୍ରାର୍ଥୀପତ୍ର ଦାଖଲ କରିବେ ବୋଲି ଜଣାପଡ଼ିଛି ।