ସାରୋଇ ପାହାଡରେ ଚାଲିଥିବା ଦେଶୀ ମଦ ତିଆରି କାରଖାନାରେ ଚଢ଼ାଉ, ୨ ଗିରଫ
ଧର୍ମଶାଳା, ୩୦/୧୨ : ଯାଜପୁର ଜିଲ୍ଲା ସାରୋଇ ପାହାଡ଼ରେ ଦେଶୀ ମଦ ତିଆରି କାରଖାନାରେ ଅବକାରୀ ବିଭାଗର ଚଢାଉ। ବିପୁଳ ପରିମାଣର ରନ୍ଧା ଦେଶୀ ମଦ ଜବତ। ଏହି ଅଭିଯୋଗରେ ୨ ଜଣଙ୍କୁ ଗିରଫ କଲା ଅବକାରୀ ବିଭାଗ।
ସୂଚନାନୁଯାୟୀ, ସାରୋଇ ପାହାଡ଼ର ନିଛାଟିଆ ଜାଗାରେ ସ୍ଥାନୀୟ ଅଞ୍ଚଳର ଜଣେ ବ୍ୟକ୍ତି ଦୀର୍ଘ ଦିନ ହେଲା ଦେଶୀ ମଦ ତିଆରି କରି ବେଆଇନ ଭାବେ ବିକ୍ରୟ କରୁଥିଲେ। ଏସମ୍ପର୍କରେ ସୁରାକ ପାଇ ଯାଜପୁର ଅବକାରୀ ବିଭାଗ ପକ୍ଷରୁ ଆଜି ସକାଳୁ ସେଠାରେ ଚଢାଉ କରାଯାଇଥିଲା। ମଦ ତିଆରି ଚାଲିଥିବା ବେଳେ ଅବକାରୀ ବିଭାଗର କର୍ମଚାରୀମାନେ ଚଢାଉ କରିଥିଲେ। ଏହି ସମୟରେ ମୁଖ୍ୟ ଅଭିଯୁକ୍ତ ସାରୋଇ ଗ୍ରାମର ମାଧବାନନ୍ଦ ଦାସ ଓ ତାର ଜଣେ ସହଯୋଗୀକୁ ଅବକାରୀ ବିଭାଗ ଗିରଫ କରିବା ସହ ବିପୁଳ ପରିମାଣର ଦେଶୀ ରନ୍ଧା ମଦ ଜବତ କରିଥିଲା। ଏଥିସହ ବିପୁଳ ପରିମାଣର ମଦ ପୋଚ ନଷ୍ଟ କରିବା ସହ ମଦ ତିଆରି ପାଇଁ ଆନୁସାଙ୍ଗିକ ସାମଗ୍ରୀ ଡେକଚି, ପ୍ଲାଷ୍ଟିକ ଜାର ଆଦି ସାମଗ୍ରୀ ଜବତ କରିଥିଲା। ତେବେ ଧର୍ମଶାଳା ଥାନା ଅଞ୍ଚଳରେ ପ୍ରଥମ କରି ଏତେ ବଡ଼ ଧରଣର ଦେଶୀ ରନ୍ଧା ମଦ ତିଆରି କାରଖାନା ଠାବ କରାଯାଇଛି।
