ନୂଆଦିଲ୍ଲୀ,୦୮/୦୮: ରାଜସ୍ଥାନର ଅନେକ ଅଞ୍ଚଳରେ ଅସ୍ତ୍ରଶସ୍ତ୍ର ସହ  ଡ୍ରଗ୍ସ ଚୋରା ଚାଲାଣ ମାମଲାରେ ଏନଆଇଏର ବଡ଼ କାର୍ଯ୍ୟାନୁଷ୍ଠାନ। ଶୁକ୍ରବାର ସକାଳେ ଏନଆଇଏ ଶ୍ରୀ ଗଙ୍ଗାନଗରର ୧୩ଟି ସ୍ଥାନରେ ଚଢାଉ କରିଛି। ଏଥିସହ ହନୁମାନଗଡର ସାଙ୍ଗରିଆ ଅଞ୍ଚଳରେ ମଧ୍ୟ ଚଢାଉ ହୋଇଛି। ତେବେ NIAର ଏହି କାର୍ଯ୍ୟାନୁଷ୍ଠାନ ଏକ ବଡ଼ ଚୋରା ଚାଲାଣ ନେଟୱାର୍କର ପର୍ଦ୍ଦାଫାସ ହେବାର ସମ୍ଭାବନା ରହିଥିବା ବେଳେ ଏନେଇ କୌଣସି ସରକାରୀ ବିବୃତ୍ତି ଜାରି କରାଯାଇ ନାହିଁ।

ବର୍ତ୍ତମାନ ଶ୍ରୀଗଙ୍ଗାନଗର ଜିଲ୍ଲାର ୧୨ରୁ ଅଧିକ ଅଞ୍ଚଳରେ NIA ଚଢାଉ ଜାରି ରଖିଛି। କୁହାଯାଉଛି ଯେ ଏହି ଚଢାଉ ଲରେନ୍ସ ବିଷ୍ନୋଇ ଏବଂ ତାଙ୍କ ଗ୍ୟାଙ୍ଗର ନେଟୱାର୍କ ସହିତ ଜଡିତ ସନ୍ଦିଗ୍ଧ ଲୋକଙ୍କ ଉପରେ କରାଯାଇଛି। ଗତ କିଛି ଦିନ ଧରି NIA ସୀମା ଚୋରା ଚାଲାଣ ମାମଲାଗୁଡ଼ିକର ନିରନ୍ତର ତଦନ୍ତ କରୁଛି। ଯଦିଓ ଏନଆଇଏ ଦ୍ୱାରା ଏହି ମାମଲା ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇ ନାହିଁ, କିନ୍ତୁ କୁହାଯାଉଛି ଯେ ଏହି କାର୍ଯ୍ୟାନୁଷ୍ଠାନ ଅଧୀନରେ, ଏଜେନ୍ସି ଆତଙ୍କୀ ପାଣ୍ଠି ଏବଂ ଅବୈଧ ଅସ୍ତ୍ରଶସ୍ତ୍ର ଯୋଗାଣର ତଦନ୍ତ କରାଯାଉଥିଲା। ଏନେଇ ସେଠାକାର ସ୍ଥାନୀୟ ପୁଲିସ କହିଛି ଯେ, ଏନଆଇଏ ସେମାନଙ୍କୁ ଚଢାଉ ସମ୍ପର୍କରେ କୌଣସି ସୂଚନା ଦେଇନାହିଁ। ସେମାନେ ନିଜ ସ୍ତରରେ ଏହି ଘଟଣାର ତଦନ୍ତ କରୁଛନ୍ତି। ଏହି ଚଢାଉ ସମ୍ପର୍କରେ NIA ପକ୍ଷରୁ କୌଣସି ସରକାରୀ ବୟାନ ଆସିନାହିଁ। ପ୍ରକାଶ ଥାଉକି,  ନିକଟରେ NIA ଦୌସାର ଅନେକ ଧାର୍ମିକ ସ୍ଥାନରେ ଚଢ଼ାଉ କରିଥିଲା। କିଛି ଦିନ ପୂର୍ବେ NIA ଲରେନ୍ସ ବିଷ୍ନୋଇ ଗ୍ୟାଙ୍ଗ ସହିତ ଜଡିତ ଜଣେ ଅପରାଧୀଙ୍କୁ ଦାଦାବଟି ଆଦାୟ, ଧମକ ଏବଂ ଅସ୍ତ୍ରଶସ୍ତ୍ର ଚାଲାଣ ଅଭିଯୋଗରେ ଅଟକ ରଖିଥିଲା।