‘ଫିଲଡ୍ ନିୟନ୍ତ୍ରଣ କରିବାରେ ଧୋନି ହେଉଛନ୍ତି ମାଷ୍ଟର’, ଗୁଜରାଟ ବିପକ୍ଷ ବିଜୟ ପରେ ମାହିଙ୍କୁ ରବି ଶାସ୍ତ୍ରୀଙ୍କ ପ୍ରଶଂସା
ନୂଆଦିଲ୍ଲୀ ୨୪/ ୦୫: କ୍ବାଲିଫାୟର-୧ ମୁକାବିଲାରେ ଗୁଜରାଟକୁ ହରାଇ ରୋମାଞ୍ଚକର ବିଜୟ ହାସଲ କରିଛି ଚେନ୍ନାଇ ସୁପର୍ କିଙ୍ଗସ୍ । ମଙ୍ଗଳବାର ଖେଳାଯାଇଥିବା ମୁକାବିଲାରେ ଗୁଜରାଟକୁ ୧୫ ରନରେ ପରାସ୍ତ କରି ୧୦ମ ଥର ପାଇଁ ଆଇପିଏଲ ଫାଇନାଲରେ ପ୍ରବେଶ କରିଛି ଧୋନି ବାହିନୀ ।
ସିଏସ୍କେର ବିଜୟକୁ ନେଇ ଟିମ୍ ଇଣ୍ଡିଆର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ କହିଛନ୍ତି, ୨୦୨୨ ସିଜିନରେ ୯ମ ସ୍ଥାନରେ ରହିଥିଲା ଚେନ୍ନାଇ ସୁପର କିଙ୍ଗସ୍ । ଚଳିତ ବର୍ଷ ନିଜ ପ୍ରୟାସ ବଳରେ ଦଳ ଫାଇନାଲରେ ପହଞ୍ଚି ଯାଇଛି । ଯୁବ ଖେଳାଳି ଓ ଅଭିଜ୍ଞଙ୍କ ମିଳିତ ପ୍ରୟାସରେ ଏହା ସମ୍ଭବପର ହୋଇପାରିଛି । ପୂର୍ବରୁ ୩ ଥର ଗୁଜରାଟ ଟାଇଟନ୍ସ ଠାରୁ ପରାସ୍ତ ହୋଇଥିଲେ ବି କ୍ବାଲିଫାୟର ମୁକାବିଲାରେ ଦମଦାର ବିଜୟ ହାସଲ କରିଛି ଚେନ୍ନାଇ । ୧୬୦ ରନ୍ ଉପରକୁ ସ୍କୋର କରିଲେ ତାହା ଚେନ୍ନାଇ ପାଇଁ ବୋନସ୍ ଭଳି ଲାଗେ । ଅର୍ଥାତ୍ ଦଳ ୧୬୦ ମଧ୍ୟରେ ବି କୌଣସି ଟିମକୁ ରୋକିବାରେ ସକ୍ଷମ ।
ମହେନ୍ଦ୍ର ସିଂହ ଧୋନୀଙ୍କୁ ପ୍ରଶଂସା କରି ଶାସ୍ତ୍ରୀ କହିଛନ୍ତି, ‘ପଡିଆ ମଧ୍ୟରେ ନିୟନ୍ତ୍ରଣ କରିବାରେ ଧୋନି ହେଉଛନ୍ତି ମାଷ୍ଟର୍ । ଫିଲଡ୍ ସେଟ୍ କରିବା ହେଉ କିମ୍ବା ବୋଲରଙ୍କ ମଧ୍ୟରେ ସମନ୍ବୟ ରକ୍ଷା କରି ବିପକ୍ଷ ଦଳର ବ୍ୟାଟର୍ଙ୍କୁ ରୋକିବା ହେଉ ସବୁଥିରେ ପାରଙ୍ଗମ ଧୋନି । ପାଓ୍ବାର ପ୍ଲେ ପରେ ସ୍ପିନର୍ଙ୍କ ବ୍ୟବହାର କରିବା, ସ୍ଥିତି ଅନୁଯାୟୀ ବୋଲିଂରେ ପରିବର୍ତ୍ତନ କରିବାରେ ଧୋନି ହେଉଛନ୍ତି ମାହିର୍’।
କ୍ବାଲିଫାୟର ମୁକାବିଲାରେ ଚେନ୍ନାଇକୁ ବିଜୟୀ କରାଇବାରେ ପ୍ରମୁଖ ଭୂମିକା ତୁଲାଇଥିବା ଋତୁରାଜ ଗାଏକ୍ବାଡଙ୍କୁ ମଧ୍ୟ ପ୍ରଶଂସା କରିଛନ୍ତି ରବି ଶାସ୍ତ୍ରୀ । ସେ କହିଛନ୍ତି, ‘ଅନ୍ୟ ବ୍ୟାଟରମାନେ ଖେଳିବାକୁ ସଂଘର୍ଷ କରୁଥିବା ବେଳେ ଋତୁରାଜ ଗାଏକ୍ବାଡ କିନ୍ତୁ ଅତି ସହଜରେ ବ୍ୟାଟିଂ ଜାରି ରଖିଥିଲେ’।
