ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ଏକ ବଡ଼ ସମସ୍ୟା । ତେଣୁ ଏହାକୁ ରୋକିବା ପାଇଁ ଦିଲ୍ଲୀ ସରକାର ବଡ଼ ପଦକ୍ଷେପ ନେଇଛନ୍ତି। ପ୍ରଦୂଷଣକୁ ଦୃଷ୍ଟିରେ ରଖି, ସରକାର ପୁରୁଣା ଯାନବାହନ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରସ୍ତୁତି ଚଳାଇଛନ୍ତି। ଏବେ ପୁରୁଣା ଯାନର ପଞ୍ଜୀକରଣ ବାତିଲ କରିବାକୁ ନିଷ୍ପତ୍ତି ନିଆଯାଇଛି। ସରକାର ୧୫ ବର୍ଷରୁ ପୁରୁଣା ଯାନର ପଞ୍ଜୀକରଣ ବାତିଲ କରିଛନ୍ତି। ଦିଲ୍ଲୀରେ ୧୫ ବର୍ଷରୁ ଅଧିକ ପୁରୁଣା ୫୫ ଲକ୍ଷରୁ ଅଧିକ ଯାନବାହନ ଅଛି।
ପରିବହନ ବିଭାଗ ଦ୍ୱାରା ଜାରି ସୂଚନା ଅନୁଯାୟୀ, ୨୦୨୪ ମସିହାରୁ ଦିଲ୍ଲୀରେ ୧୦ ବର୍ଷରୁ ପୁରୁଣା ଡିଜେଲ ଗାଡ଼ି ଏବଂ ୧୫ ବର୍ଷରୁ ପୁରୁଣା ପେଟ୍ରୋଲ/ସିଏନଜି ଗାଡ଼ିର ପଞ୍ଜୀକରଣ ବାତିଲ କରାଯାଇଛି। ଏହି ଯାନଗୁଡ଼ିକରେ ଟ୍ରକ୍, କ୍ୟାବ୍, କାର, ମୋଟରସାଇକେଲ୍ ଏବଂ ଅଟୋରିକ୍ସା ମଧ୍ୟ ଅନ୍ତର୍ଭୁକ୍ତ। ସାର୍ବଜନୀନ ସ୍ଥାନରେ ଏହି ଯାନବାହାନ ରଖିବା ସମ୍ପୂର୍ଣ୍ଣ ନିଷେଧ। ଏଥିରେ ଘର ବାହାର ସ୍ଥାନ ମଧ୍ୟ ଅନ୍ତର୍ଭୁକ୍ତ ।
ଯାନବାହାନ ମାଲିକମାନେ ଏହି ଯାନଗୁଡ଼ିକୁ କେବଳ ସେମାନଙ୍କର ବ୍ୟକ୍ତିଗତ ପାର୍କିଂ ସ୍ଥାନରେ ପାର୍କ କରିପାରିବେ । ଯଦି ଦିଲ୍ଲୀରେ ଏହି ପୁରୁଣା ଯାନଗୁଡ଼ିକ ସାର୍ବଜନୀନ ସ୍ଥାନରେ ଚାଲୁଥିବା କିମ୍ବା ପାର୍କିଂ ହୋଇଥିବା ଦେଖାଯାଏ, ତେବେ ସେଗୁଡ଼ିକୁ ଜବତ କରାଯିବ । ଏହା ବ୍ୟତୀତ ୫ ହଜାର କିମ୍ବା ୧୦ ହଜାର ଟଙ୍କା ଜରିମାନା ମଧ୍ୟ ହୋଇପାରେ। ଏହା ସହିତ, ଏପରି ଯାନ ପାଇଁ ପେଟ୍ରୋଲ-ଡିଜେଲ ଏବଂ ସିଏନଜି ମଧ୍ୟ ଉପଲବ୍ଧ ହେବ ନାହିଁ।
ପରିବେଶ ସୁରକ୍ଷା, ଟ୍ରାଫିକ୍ ଜାମ୍ ହ୍ରାସ ଏବଂ ସଡ଼କ ସୁରକ୍ଷା ଭଳି ବିଷୟଗୁଡ଼ିକୁ ଧ୍ୟାନରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି। ପରିବହନ ବିଭାଗ, ଦିଲ୍ଲୀ ଟ୍ରାଫିକ୍ ପୋଲିସ, ନୂଆଦିଲ୍ଲୀ ପୌର ପରିଷଦ, ଦିଲ୍ଲୀ ନଗର ନିଗମ ଏବଂ ଦିଲ୍ଲୀ କ୍ୟାଣ୍ଟନମେଣ୍ଟ ବୋର୍ଡ ଏପରି ଯାନଗୁଡ଼ିକୁ ଜବତ କରିପାରିବେ। ପୁରୁଣା ଯାନବାହାନ ପରିଚାଳନା ସମ୍ପର୍କରେ ଦିଲ୍ଲୀ ସରକାର ନିର୍ଦ୍ଦେଶାବଳୀ ଜାରି କରିଛନ୍ତି।
