ନୂଆଦିଲ୍ଲୀ: ଇଜିପ୍ଟର ରାଷ୍ଟ୍ରପତି ଅବଦେଲ ଫତ୍ତହ ଅଲ-ସିସି ଆଜି (ମଙ୍ଗଳବାର) ସନ୍ଧ୍ୟାରେ ଦିଲ୍ଲୀରେ ପହଞ୍ଚିଛନ୍ତି । ବିମାନବନ୍ଦରରେ ତାଙ୍କୁ ସୁସ୍ୱାଗତ କରାଯାଇଛି । ରାଷ୍ଟ୍ରପତି ଅବଦେଲ ଫତ୍ତହ ଏଲ୍-ସିସି ମୁଖ୍ୟ ଅତିଥି ଭାବରେ ଗଣତନ୍ତ୍ର ଦିବସ ପରେଡରେ ସାମିଲ ହେବେ । ଏହି ଗସ୍ତ ସମୟରେ ସେ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ ଜୟଶଙ୍କରଙ୍କୁ ମଧ୍ୟ ଭେଟିବେ ।

ଜାନୁଆରୀ ୨୪-୨୭ ପର୍ଯ୍ୟନ୍ତ ତାଙ୍କର ଏହି ସରକାରୀ ଗସ୍ତରେ ତାଙ୍କ ସହ ପାଞ୍ଚ ଜଣ ମନ୍ତ୍ରୀ ଏବଂ ବରିଷ୍ଠ ଅଧିକାରୀଙ୍କ ସମେତ ଏକ ଉଚ୍ଚ ସ୍ତରୀୟ ପ୍ରତିନିଧୀ ଦଳ ମଧ୍ୟ ଅଛନ୍ତି । ଅବଦେଲ ଫତ୍ତହ ଅଲ-ସିସି ନୂଆଦିଲ୍ଲୀରେ ପହଞ୍ଚିବା ମାତ୍ରେ ତାଙ୍କୁ ସ୍ୱାଗତ କରିବା ପାଇଁ ପାରମ୍ପାରିକ ଲୋକ ନୃତ୍ୟ ଉପସ୍ଥାପନ କରାଯାଇଥିଲା ।

ସବୁଠାରୁ ବଡ କଥା ହେଉଛି , ପ୍ରଥମ ଥର ପାଇଁ ଗଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ଇଜିପ୍ଟର ରାଷ୍ଟ୍ରପତିଙ୍କୁ ନିମନ୍ତ୍ରଣ କରାଯାଇଛି । ସୂଚନାଥାଉକି, ଭାରତ ଏବଂ ଇଜିପ୍ଟ ଚଳିତ ବର୍ଷ କୂଟନୈତିକ ସମ୍ପର୍କ ପ୍ରତିଷ୍ଠା ହେବାର ୭୫ ବର୍ଷ ପାଳନ କରୁଛନ୍ତି । ଭାରତ ମଧ୍ୟ ଜି -20 ଅଧ୍ୟକ୍ଷ ଥିବା ସମୟରେ ଇଜିପ୍ଟକୁ 'ଅତିଥି ଦେଶ' ଭାବରେ ନିମନ୍ତ୍ରଣ କରିଛି ।

ବୈଦେଶିକ ମନ୍ତ୍ରଣାଳୟ ଦ୍ବାରା ଜାରି ବିବୃତ୍ତି ଅନୁଯାୟୀ, ରାଷ୍ଟ୍ରପତି ଅବଦେଲ ଫତ୍ତହ ଅଲ-ସିସିଙ୍କୁ ବୁଧବାର ଦିନ ରାଷ୍ଟ୍ରୀୟ ଭବନରେ ସ୍ୱାଗତ କରାଯିବ । ସେ ଅନ୍ୟମାନଙ୍କ ମଧ୍ୟରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କରଙ୍କୁ ଭେଟିବାର କାର୍ଯ୍ୟକ୍ରମ ରହିଛି, ଯାହାଙ୍କ ସହ ସେ ରାଷ୍ଟ୍ରିୟ ଭବନରେ ଏକ ବୈଠକ କରିବେ । ସେହି ଦିନ ସେ ରାଜଘାଟ, ଜାତିର ପିତା ମହାତ୍ମା ଗାନ୍ଧୀଙ୍କ ସମାଧିସ୍ଥଳରେ ପୁଷ୍ପମାଲ୍ୟ ଅର୍ପଣ କରିବେ ।