ବାଣିପଙ୍ଗା ଆଶ୍ରମ ସ୍କୁଲ ଛାତ୍ରୀ ମୃତ୍ୟୁ ଘଟଣା, ଜାତୀୟ ମାନବ ଅଧିକାର କମିଶନରୁ ଏସ୍ପିଙ୍କୁ ପୁଣି ରିପୋର୍ଟ ତଲବ
ଭବାନୀପାଟଣା,୨୪ା୫: ଆଦିବାସୀ ଉନ୍ନୟନ ବିଭାଗ ଦ୍ୱାରା ପରିଚାଳିତ ଲାଞ୍ଜିଗଡ଼ ବ୍ଲକ୍ ବାଣିପଙ୍ଗା ଆଶ୍ରମ ସ୍କୁଲର ୬ବର୍ଷିୟ ଛାତ୍ରୀ ରୀମା ମାଝୀ ମୃତ୍ୟୁ ମାମଲାରେ କଳାହାଣ୍ଡି ଏସ୍ପିଙ୍କୁ ତଦନ୍ତ ରିପୋର୍ଟ ମାଗିଥିଲେ ଜାତୀୟ ମାନବ ଅଧିକାର କମିଶନ । ତେବେ ଗତ ଦୁଇ ମାସ ଉପରାନ୍ତ ମଧ୍ୟ ଏସ୍ପି କୌଣସି ରିପୋର୍ଟ ଦେଇ ନଥିବାରୁ ଅସନ୍ତୋଷ ପ୍ରକାଶ କରିବା ସହ ପୁଣି ରିପୋର୍ଟ ତଲବ କରିଛନ୍ତି । ଆସନ୍ତା ୪ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ କହିଛନ୍ତି। ଏହି ନୋଟିସ୍ର ନକଲ ରାଜ୍ୟ ପୁଲିସ୍ ନିର୍ଦ୍ଦେଶକଙ୍କ ନିକଟକୁ ମାନବ ଅଧିକାର କମିଶନରୁ ପ୍ରେରଣ କରାଯାଇଥିବା ବେଳେ ଏଦିଗରେ ତଦାରଖ କରିବାକୁ ନିର୍ଦ୍ଦେଶ ଦିଆଯାଇଥିବା ଜଣାଯାଇଛି ।
ପ୍ରକାଶ ଥାଉକି, ଗତ ୨୦୨୨ ଡିସେମ୍ବରରେ ବାଣୀପଙ୍ଗା ଆଶ୍ରମ ବିଦ୍ୟାଳୟର ୬ବର୍ଷିୟ ଛାତ୍ରୀ ରୀମା ମାଝୀ ଜ୍ମରରେ ଆକ୍ରାନ୍ତ ହୋଇଥିବାରୁ ଲାଞ୍ଜିଗଡ଼ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଉଥିବା ବେଳେ ମୃତ୍ୟୁ ହୋଇସାରିଥିଲା । ଶିଶୁଟିର ଶବ ବ୍ୟବଚ୍ଛେଦ କରାନଯାଇ ମୃତ ଶରୀର ହସ୍ତାନ୍ତର ହୋଇଥିବା ଅଭିଯୋଗ ହୋଇଥିଲା । ଏହି ମାମଲାରେ ଜାତୀୟ ମାନବ ଅଧିକାର କମିଶନ ତଦନ୍ତ ରିପୋର୍ଟ ଦାଖଲ କରିବାକୁ କଳାହାଣ୍ଡି ଏସ୍ପିଙ୍କୁ ନୋଟିସ୍ ଜାରି କରିଥିଲେ ।
