ଭୁବନେଶ୍ୱର,୨୧/୧୨: ଓଡ଼ିଶା ରିଅଲ ଇଷ୍ଟେଟ୍ ରେଗୁଲେଟୋରୀ ଅଥରିଟି (ଓରେରା) ଦ୍ୱାରା ଏକ ନୂତନ ୱେବ୍ସାଇଟ୍ (https://rera.odisha.gov.in) ଓରେରା ସଂସ୍କରଣ ୨.୦ ଆରମ୍ଭ କରାଯାଇଛି । ଶୁକ୍ରବାର ଆୟୋଜିତ ଏକ ସମାରୋହରେ ଓରେରା ଅଧ୍ୟକ୍ଷ ସିଦ୍ଧାନ୍ତ ଦାସ ଏହି ନୂତନ ୱେବ୍ସାଇଟ୍କୁ ଓରେରା (ସଦସ୍ୟ) ପ୍ରଦୀପ କୁମାର ବିଶ୍ୱାଳ, ଗୋପାଳ ଚନ୍ଦ୍ର ପଟ୍ଟନାୟକ ଏବଂ ଅନ୍ୟ ଅଧିକାରୀମାନଙ୍କ ଉପସ୍ଥିତିରେ ଉଦ୍ଘାଟନ କରିଛନ୍ତି ।
ଶ୍ରୀ ଦାସ ତାଙ୍କ ଅଭିଭାଷଣରେ କହିଲେ ଯେ, ବ୍ୟବସ୍ଥାରେ ସ୍ୱଚ୍ଛତା, ଦକ୍ଷତା ଏବଂ ଉତ୍ତରଦାୟିତ୍ୱକୁ ପ୍ରୋତ୍ସାହିତ କରିବାରେ ରେରା ପାଇଁ ଏହା ଏକ ଐତିହାସିକ ଦିନ । ରେକର୍ଡ ସମୟ ମଧ୍ୟରେ ଏହି ନୂତନ ୱେବ୍ସାଇଟ୍କୁ ସଫଳତାର ସହ କାର୍ଯ୍ୟକାରୀ କରିଥିବାରୁ ସେ ସମସ୍ତ ଅଧିକାରୀ ଏବଂ ଟିମ୍ ସଦସ୍ୟଙ୍କୁ ଅଭିନନ୍ଦନ ଜଣାଇଥିଲେ । ଏହା ବ୍ୟବହାରକାରୀ ଅନୁକୂଳ ଏବଂ ସମସ୍ତ ଅଂଶୀଦାରମାନଙ୍କ ପାଇଁ ସହାୟକ ହେବ ବାଲି ଆଶା କରିଛନ୍ତି ଶ୍ରୀ ଦାସ । ଓରେରା ସଚିବ ଶ୍ରବଣୀ ପଟ୍ଟନାୟକ ସ୍ୱାଗତ ଭାଷଣ ଦେଇଥିବା ବେଳେ ଅର୍ଥ ବିଭାଗ ଯୁଗ୍ମ ନିର୍ଦ୍ଦେଶକ ଦୀପକ କୁମାର ବେଶରା ଧନ୍ୟବାଦ ଅର୍ପଣ କରିଥିଲେ ।
ଭୁବନେଶ୍ୱରସ୍ଥିତ ଆଇଟି କମ୍ପାନି ସିଏସ୍ଏମ୍ ଟେକ୍ନୋଲୋଜିଜ୍ ଦ୍ୱାରା ବିକଶିତ ଏହି ଆପ୍ଲିକେସନ୍ରେ ଉଚ୍ଚମାନର ପ୍ରଯୁକ୍ତିବିଦ୍ୟା ସହିତ ଡ୍ୟାସ୍ବୋର୍ଡ, ଚାଟ୍ବୋଟ୍ ଇତ୍ୟାଦି ନୂତନ ବୈଶିଷ୍ଟ୍ୟ ରହିଛି । ଏହାଦ୍ୱାରା ପ୍ରମୋଟର, ଘର କ୍ରେତା, ରିଅଲ ଇଷ୍ଟେଟ୍ ଏଜେଣ୍ଟ ଏବଂ ଓକିଲମାନେ ନିରବଚ୍ଛିନ୍ନ କାରବାର କରିପାରିବା ସହ ଏହି ନୂତନ ବ୍ୟବସ୍ଥାରେ ଉପକୃତ ହେବେ ।
