ନୂଆଦିଲ୍ଲୀ,୧୭/୧୦: ନିଜର କିଛି ମୂଲ୍ୟବାନ ଜିନିଷ ହଜିଗଲେ କିମ୍ବା ଚୋରି ହୋଇଗଲେ ସମସ୍ତଙ୍କୁ କଷ୍ଟ ଲାଗେ । ତେବେ ଯଦି ତାହା ପ୍ରିୟଜନଙ୍କ ସ୍ମୃତି ସହ ଜଡ଼ିତ ହୋଇଥାଏ ତା’ ହେଲେ କଷ୍ଟ ବହୁଗୁଣିତ ହୋଇଯାଏ । ପୁନେର ଅଭୟ ଚୌଗୁଲେଙ୍କ କ୍ଷେତ୍ରରେ ତାହା ହିଁ ଘଟିଛି । ତାଙ୍କର କଳା ରଙ୍ଗର ସ୍କୁଟରଟି ଦଶହରା ଦିନ କୋଥ୍ରୁଡ୍ ନିକଟରେ ଥିବା ଛତ୍ରପତି ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ପାଖରୁ ଚୋରି ହୋଇଯାଇଥିଲା । ନିକଟବର୍ତ୍ତୀ ଅଞ୍ଚଳରେ ବହୁ ଖୋଜାଖୋଜି କରିବା ପରେ ବି ସ୍କୁଟର ନ ମିଳିବାରୁ ସେ ପୁଲିସ ନିକଟରେ ଅଭିଯୋଗ କରିଥିଲେ । ତାଙ୍କ ମା’ କର୍କଟରେ ପ୍ରାଣ ହରାଇବା ପୂର୍ବରୁ ସ୍କୁଟରଟି ତାଙ୍କୁ ଉପହାର ଦେଇଥିଲେ ।
ଏଭଳିସ୍ଥଳରେ ସ୍କୁଟର ଚୋରି ହୋଇଯିବାରୁ ଅଭୟ ମାନସିକ ଭାବେ ଭାଙ୍ଗି ପଡ଼ିଛନ୍ତି । ନିକଟରେ ଜେଏମ୍ ରୋଡ୍ରେ ଛିଡ଼ା ହୋଇ ହାତରେ ଏକ ପ୍ଲାକାର୍ଡ ଧରି ସେ ଲୋକଙ୍କୁ ସ୍କୁଟର ଖୋଜିବାରେ ସହାୟତା କରିବାକୁ ନିବେଦନ କରିଥିଲେ । ଏପରିକି ଚୋର ଯଦି ତାଙ୍କ ସ୍କୁଟରକୁ ଫେରାଇ ଦିଅନ୍ତି ତେବେ ତାଙ୍କୁ ସେ ଏକ ନୂଆ ସ୍କୁଟର କିଣିଦେବା କଥା ପ୍ଲାକାର୍ଡରେ ଲେଖିଥିଲେ । ଅଭୟ ମଧ୍ୟ ସୋସିଆଲ ମିଡିଆରେ ଏଥିଲାଗି ଆକୁଳ ନିବେଦନ କରି ଏକ ପୋଷ୍ଟ କରିଛନ୍ତି । ବହୁ ସଂଖ୍ୟାରେ ଲୋକ ତାଙ୍କ ପୋଷ୍ଟକୁ ସେୟାର କରି ସମର୍ଥନ ଜଣାଉଛନ୍ତି ।
