କଟକ, ୨୬। ୬ (ବ୍ୟୁରୋ): କଟକ ଜିଲ୍ଲା କନ୍ଦରପୁର ରାଜସ୍ୱ ସର୍କଲର ଆରଆଇ ଓ ଅମିନ ଭିଜିଲାନ୍ସ ହାତରେ ଧରାପଡିଛନ୍ତି। ଜଣେ ବ୍ୟବସାୟୀଙ୍କଠାରୁ ୧୨ହଜାର ଟଙ୍କା ଲଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀ ଦୁଇ କର୍ମଚାରୀଙ୍କୁ ମାଡିବସିଥିଲେ। ଅଭିଯୁକ୍ତମାନେ ହେଲେ ଆରଆଇ ମନୋଜ କୁମାର ବେହେରା ଓ ଅମିନ ବିଚିତ୍ରାନନ୍ଦ ଶତପଥି।
ଆରଆଇ ଅଫିସ ନିକଟରେ ଦୋକାନ କରିଥିବା ଜଣେ ବ୍ୟବସାୟୀ ଚାଷ ଜମିର କିସମ ପରିଵର୍ତ୍ତନ କରି ଘରବାଡ଼ି ଢିହ ପଟ୍ଟା ପ୍ରଦାନ କରିବା ପାଇଁ ଆବେଦନ କରିଥିଲେ। ଆରଆଇ ଓ ଅମିନ ତାଙ୍କ ନିକଟରୁ ଏ ନେଇ ଟଙ୍କା ଦାବି କରି ଆସୁଥିଲେ। ବ୍ୟବସାୟୀ ଜଣକ କିଛି ଟଙ୍କା ଦେଇଥିଲେ । ଦୁଇ କର୍ମଚାରୀ ସେଥିରେ ସନ୍ତୁଷ୍ଟ ନଥିଲେ। ବ୍ୟବସାୟୀ ଜଣକ ଆରଆଇ ଅଫିସ କୁ ଦୀର୍ଘ ଦିନ ହେଲା ଦୌଡୁଥିଲେ ହେଁ ନିରାଶ ହୋଇ ଆସୁଥିଲେ। ଏଥିରେ ନିରାଶ ହୋଇ ସମ୍ପୃକ୍ତ ବ୍ୟବସାୟୀ ଜଣକ ଭିଜିଲାନ୍ସର ଦ୍ୱାରସ୍ଥ ହୋଇ ଥିଲେ। ଏହି ଘଟଣାରେ ଭିଜିଲାନ୍ସର ଯୋଜନା ମୁତାବକ ବ୍ୟବସାୟୀ ଜଣକ ନଗଦ ୧୨ହଜାର ଟଙ୍କାର କେମିକାଲ ବୋଳା ନୋଟ ନେଇ ଆରଆଇ ଅଫିସ ନିକଟରେ ପହଞ୍ଚିଥିଲେ। ବ୍ୟବସାୟୀ ଜଣକ ଟଙ୍କା ନେଇ ଆରଆଇ ଓ ଅମିନଙ୍କୁ ଟଙ୍କା ଦେବା ମାତ୍ରେ ସେଠାରେ ଛକି ରହିଥିବା ଭିଜିଲାନ୍ସ ଟିମ ଦୁଇ କର୍ମଚାରୀଙ୍କୁ ଟଙ୍କା ସହ କାବୁ କରି ନେଇଥିଲା। ଭିଜିଲାନ୍ସର ଆଉ ତିନୋଟି ଟିମ ଅଭିଯୁକ୍ତଙ୍କ ଘର ସମେତ ଅଫିସ ଉପରେ ଚଢ଼ଉ ଜାରି ରଖିଛି।
