ଦନ୍ତ ଚିକିତ୍ସାରେ ଡିଗ୍ରୀ, ପେସା କିନ୍ତୁ ସଂଗୀତ…ଏମିତି ରହିଛି ରିକି କେଜ୍ଙ୍କ ସଫଳତାର ଯାତ୍ରା
themeghalayan
ମୁମ୍ବାଇ ୦୭/୦୨: ୧୯୮୧ ମସିହାରେ ନର୍ଥ କାରୋଲିନାରେ ଜନ୍ମିତ ରିକି ଅଧା ପଞ୍ଜାବୀ ଓ ଅଧା ମାରୱାଡ଼ି । ୮ ବର୍ଷ ବୟସରୁ ସେ ବେଙ୍ଗାଲୁରୁରେ ରହୁଛନ୍ତି । ସେଠାରେ ଥିବା ବିଶପ୍ କଟନ୍ ସ୍କୁଲ୍ରେ ଅଧ୍ୟୟନ ଶେଷ କରି ଅକ୍ସଫୋର୍ଡ ଡେଣ୍ଟାଲ୍ କଲେଜ୍ରେ ଦନ୍ତ ଚିକିତ୍ସାରେ ସେ ସ୍ନାତକ ହାସଲ କଲେ । ୨୦୧୪ ମସିହାରେ ବାନ୍ଧବୀ ବର୍ଷାଙ୍କ ସହ ତାଙ୍କର ବିବାହ ହୋଇଥିଲା।
ରିକିଙ୍କ ପରିବାରରେ ଅଧିକାଂଶ ସଦସ୍ୟ ଚିକିତ୍ସା କ୍ଷେତ୍ରକୁ ବୃତ୍ତି କରିଥିଲେ । ତାଙ୍କ ବାପା ଓ ଜେଜେବାପା ଡାକ୍ତର ଥିଲେ । ରିକି କିନ୍ତୁ ସଙ୍ଗୀତରେ କ୍ୟାରିଅର୍ କରିବାକୁ ଚାହୁଁଥିଲେ । ତେଣୁ ସ୍ନାତକ ଶେଷ କରିବା ପରେ ସଙ୍ଗୀତ କ୍ଷେତ୍ରରେ ପାଦ ଦେବେ ବୋଲି ସେ ମା’ବାପାଙ୍କୁ କହିଲେ । ମା’ ପମ୍ମି ଭାବିଲେ ଯେ ତାଙ୍କ ପୁଅର ଏହି କଳା ବଂଶାନୁକ୍ରମିକ । ଜେଜେବାପା ଜାନକୀ ଦାସଙ୍କଠାରୁ ବୋଧହୁଏ ରିକିଙ୍କ ପାଖକୁ ଏହି କଳା ଆସିଛି । ତାଙ୍କ ଜେଜେବାପା ଜଣେ କଳାକାର, ଅଲିମ୍ପିକ୍ ସାଇକେଲ ଚାଳକ ଏବଂ ସ୍ୱାଧୀନତା ସଂଗ୍ରାମୀ ଥିଲେ ।
ପୂର୍ଣ୍ଣକାଳୀନ ମ୍ୟୁଜିକ୍ କମ୍ପୋଜର୍ ହେବା ପୂର୍ବରୁ ରିକି ରକ୍ ବ୍ୟାଣ୍ଡ୍ ଆଞ୍ଜେଲ୍ ଡଷ୍ଟରେ କିବୋର୍ଡ ବାଦକ ଭାବେ କାମ ଆରମ୍ଭ କଲେ । ସେ ନୁସ୍ରତ ଫତେ ଅଲି ଖାନ୍, ପଣ୍ଡିତ ରବି ଶଙ୍କର ଓ ପିଟର ଗାବ୍ରିଏଲଙ୍କୁ ନିଜର ପ୍ରେରଣା ମାନନ୍ତି । ୨୦୧୦ ମସିହାରେ, ନାଇକ୍ ଉପରେ ଏକ ଜିଙ୍ଗଲ୍ କମ୍ପୋଜ୍ କରି କାନ୍ ମହୋତ୍ସବରେ ପୁରସ୍କାର ପାଇଁ ସେ ମନୋନୀତ ହୋଇଥିଲେ । ୩୦୦୦ରୁ ଉଦ୍ଧ୍ୱର୍ ଜିଙ୍ଗଲ୍ ଏବଂ କନ୍ନଡ଼ ଫିଲ୍ମ ପାଇଁ ସେ ସଙ୍ଗୀତ ଦେଇଛନ୍ତି। ୨୦ରୁ ଉଦ୍ଧ୍ୱର୍ ଦେଶରେ ୧୦୦ରୁ ଅଧିକ ସଙ୍ଗୀତ ସମ୍ମାନ ସେ ଲାଭ କରିଛନ୍ତି।
